ಮೇಕೆಗಳನ್ನು ರಕ್ಷಿಸಲು ಹೋಗಿ ರೈಲು ಢಿಕ್ಕಿ-ಬಾಲಕ ಸಾವು

•   Sat, Jan 28 2023 01:33:15 PM



• ಬಲ್ಲಿಯಾ(ಉತ್ತರ ಪ್ರದೇಶ), ಜ 28 (DaijiworldNews/DB): ರೈಲು ಹಳಿ ಬಳಿ ಮೇಯುತ್ತಿದ್ದ ಮೇಕೆಗಳಿಗೆ ರೈಲು ಢಿಕ್ಕಿ ಹೊಡೆಯುವುದನ್ನು ತಪ್ಪಿಸಲು ಹೋಗಿ ರೈಲು ಢಿಕ್ಕಿಯಾಗಿ ಬಾಲಕ ಮೃತಪಟ್ಟ ಘಟನೆ ರಾಸ್ದಾ ಕೊತ್ವಾಲಿ ಪೊಲೀಸ್ ಠಾಣಾ ವ್ಯಾಪ್ತಿಯ ಚಿತನ್ಹರಾ ಗ್ರಾಮದಲ್ಲಿ ನಡೆದಿದೆ.

  ಸಂತೋಷ್ ಕುಮಾರ್ ಚೌಹಾಣ್ (13 ) ಮೃತ ಬಾಲಕ. ಚಿತನ್ಹರಾ ಗ್ರಾಮದಲ್ಲಿ ಮೇಕೆಗಳು ರೈಲು ಹಳಿಗಳ ಬಳಿ ಮೇಯುತ್ತಿದ್ದವು. ಈ ವೇಳೆ ಎದುರಿನಿಂದ ರೈಲು ಬಂದಿದ್ದು, ಕೂಡಲೇ ಬಾಲಕ ಮೇಕೆಗಳಿಗೆ ರೈಲು ಢಿಕ್ಕಿಯಾಗುವುದನ್ನು ತಪ್ಪಿಸಲು ಬಳಿ ಬಳಿ ಓಡಿದ್ದಾನೆ. ಅಷ್ಟರಲ್ಲಾಗಲೇ ಮೌವಿನಿಂದ ಬಲ್ಲಿಯಾಗೆ ತೆರಳುತ್ತಿದ್ದ ಗರೀಬ್ ನವಾಜ್ ರೈಲು ತೀರಾ ಸನಿಹಕ್ಕೆ ಬಂದಿದ್ದು, ಬಾಲಕನಿಗೆ ಢಿಕ್ಕಿ ಹೊಡೆದಿದೆ. ಪರಿಣಾಮ ಬಾಲಕ ಸಂತೋಷ್ ಸ್ಥಳದಲ್ಲೇ ಸಾವನ್ನಪ್ಪಿದ್ದಾನೆ.

  ಬಾಲಕ ಮೃತಪಟ್ಟಿರುವ ಸುದ್ದಿ ತಿಳಿದು ಕೂಡಲೇ ಪೊಲೀಸರು ಸ್ಥಳಕ್ಕಾಗಮಿಸಿದ್ದು, ಮೃತದೇಹವನ್ನು ಮರಣೋತ್ತರ ಪರೀಕ್ಷೆಗೆ ರವಾನಿಸಿದ್ದಾರೆ.