'ಬಾಂಧವ್ಯ ಟ್ರೋಫಿ'ಗೆ ಮುತ್ತಿಕ್ಕಿದ ಪೊಲೀಸ್ ಇಲೆವೆನ್, ರನ್ನರ್ಸ್ ಆಗಿ ಹೊರ ಹೊರಹೊಮ್ಮಿದ ಪ್ರೆಸ್ ಇಲೆವೆನ್

•   Mon, Feb 15 2021 11:33:16 AM



• ಪುತ್ತೂರು, ಫೆ.15(DaijiworldNews/PY): ವಿವಿಧ ಇಲಾಖೆಗಳನ್ನು ಒಗ್ಗೂಡಿಸಿಕೊಂಡು 'ಬಾಂಧವ್ಯ' ಟ್ರೋಫಿ ಕ್ರಿಕೆಟ್ ಟೂರ್ನಮೆಂಟ್ ನಗರದ ವಿವೇಕಾನಂದ ಕಾಲೇಜಿನಲ್ಲಿ ನಡೆಯಿತು.

  

  

  ವಿವಿಧ ಇಲಾಖೆಗಳ ಸುಮಾರು 16 ತಂಡಗಳು ಟೂರ್ನಿಯಲ್ಲಿ ಪಾಲ್ಗೊಂಡು ತಮ್ಮ ಬಲ ಪ್ರದರ್ಶನಗೈದರು.

  ಈ ಪಂದ್ಯಾ ಕೂಟದ ಮೊದಲ ಸೆಮಿಫೈನಲ್ ಪಂದ್ಯ ಭಾರೀ ರಣರೋಚಕದಿಂದ ಕೂಡಿತ್ತು. ಮೆಸ್ಕಾಂ ಹಾಗೂ ಪ್ರೆಸ್ ಇಲೆವೆನ್ ನಡುವಿನ ಜಿದ್ದಾ ಜಿದ್ದಿನ ಪಂದ್ಯ ನೆರೆದಿದ್ದ ಕ್ರೀಡಾ ಪ್ರೇಮಿಗಳನ್ನು ಪಂದ್ಯಾಟದ ಕೊನೇ ಎಸೆತದವರೆಗೂ ತುದಿಗಾಳಿಲ್ಲಿ ನಿಲ್ಲುವಂತೆ ಮಾಡಿತ್ತು. 4 ಓವರ್‌ಗಳ ಪಂದ್ಯಾಟದಲ್ಲಿ ಮೊದಲು ಬ್ಯಾಟಿಂಗ್ ಮಾಡಿದ ಮೆಸ್ಕಾಂ, ಪ್ರೆಸ್ ಇಲೆವೆನ್‌ಗೆ 34 ರನ್‌‌ಗಳ ಕಠಿಣ ಟಾರ್ಗೆಟ್ ಅನ್ನು ನೀಡಿತು. ಇದನ್ನ ಬೆನ್ನಟ್ಟಿದ ಪ್ರೆಸ್ ಇಲೆವೆನ್ ಆರಂಭದಲ್ಲೇ ಪೆವಿಲಿಯನ್ ಪರೇಡ್ ಮಾಡಿ ಸೋಲಿನ ದವಡೆಗೆ ಸಿಲುಕಿತ್ತು. ಆದ್ರೆ ಆರಂಭಿಕ ಆಟಗಾರ ವೀಕ್ಷಿತ್ ಒಂದು ಕಡೆ ಭದ್ರವಾಗಿಯೇ ಉಳಿದಿದ್ದರು. ಕೊನೆಯೇ ಎರಡು ಓವರ್‌ಗಳಲ್ಲಿ ಮಾತ್ರ ನಡೆದಿದ್ದು ಎಲ್ಲವೂ ಮ್ಯಾಜಿಕ್. ವೀಕ್ಷಿತ್ ಅಬ್ಬರದ ಬ್ಯಾಟಿಂಗ್‌‌ಗೆ ತಬ್ಬಿಬ್ಬಾದ ಮೆಸ್ಕಾಂ ಇಲೆವೆನ್ ಕೊನೇ ಓವರ್‌ನ ಒಂದು ಎಸೆತದಲ್ಲಿ ಸೋಲೊಪ್ಪಿಕೊಂಡಿತು. ಈ ಮೂಲಕ ಪ್ರೆಸ್ ಫೈ‌ನಲ್ ಪ್ರವೇಶಿಸಿತು.

  ಇನ್ನೊಂದೆಡೆ ಎರಡನೇ ಸೆಮಿಫೈನಲ್‌ನಲ್ಲಿ ಸುದ್ದಿ ಬಿಡುಗಡೆ ತಂಡ ಹಾಗೂ ಪೊಲೀಸ್ ಇಲೆವೆನ್ ನಡುವೆ ನಡೆದ ಹೋರಾಟದಲ್ಲಿ ಪೊಲೀಸ್ ಇಲೆವೆನ್ ಸುದ್ದಿಬಿಡುಗಡೆಯ ಬೌಲರ್‌ಗಳನ್ನು ಬೆವರಿಲಿಸಿ ಬೆಂಡೆತ್ತಿದ್ದರು. ನಾಲ್ಕು ಓವರ್‌ಗಳಲ್ಲಿ ಬರೋಬ್ಬರಿ 57 ರನ್ ಚಚ್ಚಿದ ಪೊಲೀಸ್ ಇಲೆವೆನ್ ಬ್ಯಾಟ್ ಮೂಲಕ ರುಚಿ ತೋರಿಸಿದರು. ಇದನ್ನ ಬೆನ್ನತ್ತಿದ ಸುದ್ದಿ ಬಿಡುಗಡೆ ತಂಡ ಮೊದಲ ಓವರ್‌ನಿಂದಲೇ ಡಾಟ್ ಮೇಲೆ ಡಾಟ್ ಮಾಡಿ ರನ್ ತೆಗೆಯಲು ಪೇಚಾಡಿದರು. ಈ ಮೂಲಕ ಹೀನಾಯ ಸೋಲನ್ನೊಪ್ಪಿಕೊಂಡರು. ಇದರೊಂದಿಗೆ ಪೊಲೀಸ್ ಇಲೆವೆನ್ ಫೈನಲ್ ಹಂತಕ್ಕೆ ಪ್ರವೇಶಿಸಿತು.

  ಇನ್ನು ಫೈನಲ್‌‌ನ ಹೋರಾಟದಲ್ಲಿ ಎರಡು ಬಲಾಡ್ಯ ತಂಡಗಳಾದ ಪೊಲೀಸ್ ಇಲೆವೆನ್ ಹಾಗೂ ಪ್ರೆಸ್ ಇಲೆವೆನ್ ನಡುವೆ ಕುತೂಹಲ ಹುಟ್ಟು ಹಾಕಿತು. ಮೈದಾನದ ಸುತ್ತಲೂ ನೆರೆದಿದ್ದ ಜನ ಯಾರ ಪಾಲಿಗೆ ಬಾಂಧವ್ಯ ಟ್ರೋಪಿ ಒಲಿಯುತ್ತೆ ಅಂತ ಕಾತರರಾಗಿದ್ದರು.

  ನಾಲ್ಕು ಓವರ್‌ಗಳ ಪಂದ್ಯಾಟದಲ್ಲಿ ಮೊದಲು ಟಾಸ್ ಸೋತು ಮೊದಲು ಬ್ಯಾಟಿಂಗ್‌ಗೆ ಇಳಿದ ಪೊಲೀಸ್ ಇಲೆವೆನ್ ಮೊದಲ ಓವರ್‌‌ನಲ್ಲೇ ರನ್‌‌ಗಾಗಿ ಪೇಚಾಡಿದರು. ಎರಡನೇ ಓವರ್‌ನಲ್ಲೂ ರನ್‌‌ಗಾಗಿ ಹೋರಾಟ ಮುಂದುವರಿಸಿದತು. ಆದರೆ, ಕೊನೆಯ ಎರಡು ಓವರ್‌ನಲ್ಲಿ ರನ್ ಮಳೆ ಸುರಿಸಿದ ಪೊಲೀಸ್ ಇಲೆವೆನ್, ಪ್ರೆಸ್ ಇಲೆವೆನ್‌‌ಗೆ 43 ರನ್‌ನ ಬೃಹತ್ ಟಾರ್ಗೆಟ್ ನೀಡಿತು. ಇದನ್ನ ಬೆನ್ನಟ್ಟಿದ ಪ್ರೆಸ್ ಇಲೆವೆನ್ ಆರಂಭಿಕ ಆಟಗಾರ ಮೊದಲ ಎಸೆತವನ್ನೇ ಸಿಕ್ಸರ್‌‌ಗೆ ಅಟ್ಟುವ ಮೂಲಕ ತಂಡದ ಆಟಗಾರಿಗೆ ಗೆಲುವಿನ ಸೂಚನೆಯನ್ನ ತೋರಿಸಿದರು. ಆದರೆ, ಬಲಿಷ್ಠ ಬೌಲಿಂಗ್ ಲೈನಪ್‌ಗಳನ್ನು ಹೊಂದಿದ್ದ ಪೊಲೀಸ್ ಇಲೆವೆನ್ ಪ್ರೆಸ್ ಇಲೆವೆನ್ ತಂಡದ ಆಟಗಾರರನ್ನ ಕಟ್ಟಿ ಹಾಕುವಲ್ಲಿ ಯಶಸ್ವಿಯಾದರು.

  ಕೊನೆಯೇ ಎರಡು ಬಾಲ್‌‌ನಲ್ಲಿ ಎರಡು ಸಿಕ್ಸರ್ ಅವಶ್ಯಕತೆ ಇತ್ತು. ಒಂದು ಬಾಲ್‌ಗೆ ವಿಕೆಟ್ ಪತನವಾದರೆ, ಮತ್ತೊಂದು ಬಾಲ್‌ಗೆ ಪ್ರೆಸ್ ಇಲೆವೆನ್ ತಂಡದ ಆಟಗಾರ ಪ್ರಜ್ವಲ್ ಅಮೀನ್ ಸಿಕ್ಸರ್ ಸಿಡಿಸುವ ಮೂಲಕ ಪ್ರೆಸ್ ಇಲೆವೆನ್ ಐದು ರನ್‌‌ನ ಸೋಲೊಪ್ಪಿಕೊಂಡಿತು. ಈ ಮೂಲಕ ಬಾಂಧವ್ಯ ಟ್ರೋಫಿಗೆ ಪೊಲೀಸ್ ಇಲೆವೆನ್ ಮುತ್ತಿಕ್ಕಿತು. ರನ್ನರ್ಸ್ ಆಗಿ ಪ್ರೆಸ್ ಇಲೆವೆನ್ ತಂಡ ಹೊರಹೊಮ್ಮಿತು.

  ಇನ್ನು ಬಾಂಧವ್ಯ ಟ್ರೋಫಿಯನ್ನು ಸ್ಕರಿಯ ಅವರ ನೇತೃತ್ವದಲ್ಲಿ ಯಶಸ್ವಿಯಾಗಿ ನಡೆಯಿತು. ಪಂದ್ಯಾಟದ ಬೆಸ್ಟ್ ಬ್ಯಾಟ್ಸ್ ಮನ್ ಹಾಗೂ ಬೆಸ್ಟ್ ಬೌಲರ್‌ಗಳಾಗಿ ಪ್ರೆಸ್ ಕ್ಲಬ್ ತಂಡ ಸದಸ್ಯರು ಪಡೆದುಕೊಂಡರು. ಈ ಟೂರ್ನಿಯ ಸರಣಿ ಶ್ರೇಷ್ಠ ಪ್ರಶಸ್ತಿಗೆ ಪೊಲೀಸ್ ಇಲೆವನ್ ತಂಡದ ಸದಸ್ಯ ಭಾಜನರಾಗಿದ್ದಾರೆ.