ಸ್ವದೇಶಕ್ಕೆ ಮರಳಲು 12 ಗಂಟೆಗಳಲ್ಲಿ9,000 ಭಾರತೀಯರ ನೋಂದಣಿ

•   Fri, May 01 2020 02:46:59 PM



• ದುಬೈ, ಮೇ 1 (Daijiworld News/MSP): ಕೊರೊನ ವೈರಸ್ ನಿಯಂತ್ರಣಕ್ಕಾಗಿ ವಿಧಿಸಲಾಗಿರುವ ಬೀಗಮುದ್ರೆಯ ಹಿನ್ನೆಲೆಯಲ್ಲಿ, ೧೨ಗಂಟೆಯಲ್ಲಿ 9,000 ಭಾರತೀಯರ ನೋಂದಣಿ ಯುಎಇಯಲ್ಲಿ ಸಿಕ್ಕಿಹಾಕಿಕೊಂಡಿರುವ ಭಾರತೀಯರು, ಸ್ವದೇಶಕ್ಕೆ ಮರಳಲು ಉತ್ಸುಕರಾಗಿದ್ದಾರೆ. ಭಾರತೀಯರ ವಾಪಸಾತಿಗಾಗಿ ಇಲ್ಲಿನ ಭಾರತೀಯ ದೂತಾವಾಸಗಳು ಇ-ರಿಜಿಸ್ಟ್ರೇಶನ್ ಆರಂಭಿಸಿದ್ದು, 12 ಗಂಟೆಗಳಲ್ಲಿ ಸುಮಾರು 9,000 ಭಾರತೀಯರು ತಮ್ಮ ಹೆಸರುಗಳನ್ನು ನೋಂದಾಯಿಸಿದ್ದಾರೆ.

  

  ಜನರು ತಮ್ಮ ಹೆಸರುಗಳನ್ನು ನೋಂದಾಯಿಸಲು ಭಾರೀ ಪ್ರಮಾಣದಲ್ಲಿ ಮುಗಿಬಿದ್ದ ಹಿನ್ನೆಲೆಯಲ್ಲಿ, ವೆಬ್‌ಸೈಟ್ ಹಲವು ಬಾರಿ ಸ್ಥಗಿತಗೊಂಡಿತು. ಹೆಸರುಗಳನ್ನು ನೋಂದಾಯಿಸಲು ಸಾಧ್ಯವಾಗುವವರೆಗೆ ಮುಂದಿನ ಕೆಲವು ದಿನಗಳಲ್ಲಿ ಪದೇ ಪದೇ ಪ್ರಯತ್ನಗಳನ್ನು ನಡೆಸುವಂತೆ ಅರ್ಜಿದಾರರಿಗೆ ತಿಳಿಸಲಾಗಿದೆ. ಸ್ವದೇಶಕ್ಕೆ ವಾಪಸಾತಿಗಾಗಿ ಅರ್ಜಿಗಳನ್ನು ಸ್ವೀಕರಿಸಲಾಗುವುದು ಎಂಬುದಾಗಿ ಅಬುಧಾಬಿಯಲ್ಲಿರುವ ಭಾರತೀಯ ರಾಯಭಾರ ಕಚೇರಿ ಮತ್ತು ದುಬೈಯಲ್ಲಿರುವ ಭಾರತೀಯ ಕೌನ್ಸುಲೇಟ್ ಕಚೇರಿ ಬುಧವಾರ ರಾತ್ರಿ ಘೋಷಿಸಿದವು. ಘೋಷಣೆಯ ಕೆಲವೇ ನಿಮಿಷಗಳಲ್ಲಿ ವೆಬ್‌ಸೈಟ್ ತಾಂತ್ರಿಕ ಸಮಸ್ಯೆಗಳನ್ನು ಎದುರಿಸಿತು. ಆಗ ನೋಂದಣಿ ಮಾಡುವುದಾಗಿ ಘೋಷಿಸಿದ್ದ ಟ್ವೀಟ್‌ಗಳನ್ನು ರಾಯ ಭಾರ ಕಚೇರಿಗಳು ಅಳಿಸಿಹಾಕಿದವು ಹಾಗೂ ಗಂಟೆಗಳ ಬಳಿಕ ಅದನ್ನು ಮರುಪೋಸ್ಟ್ ಮಾಡಿದವು.

  ತಾಂತ್ರಿಕ ದೋಷಗಳ ಹೊರತಾಗಿಯೂ ಸುಮಾರು 9,000 ಮಂದಿ ತಮ್ಮ ವಿವರಗಳನ್ನು ನೋಂದಾಯಿಸುವಲ್ಲಿ ಯಶಸ್ವಿಯಾಗಿದ್ದಾರೆ ಎಂದು ದುಬೈಯಲ್ಲಿರುವ ಭಾರತೀಯ ಕೌನ್ಸುಲ್ ಜನರಲ್ ವಿಪುಲ್ ಗಲ್ಫ್ ನ್ಯೂಸ್‌ಗೆ ಹೇಳಿದರು.

  ಮೊದಲಿಗೆ ಇವರಿಗೆ ಆದ್ಯತೆ:

  ಆರಂಭದಲ್ಲಿ ನೋಂದಣಿ ಮಾಡಿದವರನ್ನು ಆರಂಭಿಕ ವಿಮಾನಗಳಲ್ಲಿ ಕಳುಹಿಸಬೇಕೆಂದೇನೂ ಇಲ್ಲ ಎಂದು ಕೌನ್ಸುಲ್ ಜನರಲ್ ಹೇಳಿದ್ದಾರೆ. ತುರ್ತಾಗಿ ಭಾರತಕ್ಕೆ ಹೋಗ ಬೇಕಾದ ಅಗತ್ಯವಿರುವವರನ್ನು ಆದ್ಯತೆಯ ಮೇಲೆ ಆರಂಭಿಕ ವಿಮಾನಗಳಲ್ಲಿ ಕಳುಹಿಸಲಾಗುವುದು ಎಂದರು. ಭಾರೀ ಕಷ್ಟದಲ್ಲಿರುವ ಕಾರ್ಮಿಕರು, ವೈದ್ಯಕೀಯ ಚಿಕಿತ್ಸೆಯ ಅಗತ್ಯವಿರುವವರು, ಗರ್ಭಿಣಿಯರು, ಹಿರಿಯರು ಮತ್ತು ದುಬೈ ವಿಮಾನ ನಿಲ್ದಾಣದಲ್ಲಿ ಸಿಕ್ಕಿಹಾಕಿಕೊಂಡಿ ರುವವರನ್ನು ಆದ್ಯತೆಯ ಮೇಲೆ ಭಾರತಕ್ಕೆ ಕಳುಹಿಸಲಾಗುವುದು ಎಂದು ಅವರು ತಿಳಿಸಿದರು.