ಸರಕು ಸಾಗಣೆಗೆ ಬಂತು ‘ಸೂಪರ್‌ ಸ್ಪೀಡ್’ - 2,800 ಕಿ.ಮೀ. ಕಾರಿಡಾರ್‌ ರಾಷ್ಟ್ರಕ್ಕೆ ಸಮರ್ಪಣೆ

•   Tue, Sep 08 2026 03:24:54 PM



• ವಡೋದರಾ, ಸೆ. 08 (DaijiworldNews/TA): ದೇಶದ ಸರಕು ಸಾಗಣೆ ಹಾಗೂ ಸಾರಿಗೆ ವ್ಯವಸ್ಥೆಗೆ ಹೊಸ ವೇಗ ನೀಡುವ ಮಹತ್ವದ 2,800 ಕಿ.ಮೀ. ಉದ್ದದ ಮೀಸಲಾದ ಸರಕು ಸಾಗಣೆ ಕಾರಿಡಾರ್ ಯೋಜನೆ ಸಂಪೂರ್ಣವಾಗಿ ಪೂರ್ಣಗೊಂಡಿದೆ. ಗುಜರಾತ್‌ನ ವಡೋದರಾದಲ್ಲಿ ಪ್ರಧಾನಿ ನರೇಂದ್ರ ಮೋದಿ ಅವರು ಪಶ್ಚಿಮ ಮೀಸಲಾದ ಸರಕು ಸಾಗಣೆ ಕಾರಿಡಾರ್‌ನ ಅಂತಿಮ ವಿಭಾಗಗಳನ್ನು ರಾಷ್ಟ್ರಕ್ಕೆ ಸಮರ್ಪಿಸಿದರು.

  

  ಸುಮಾರು ರೂ. 20,700 ಕೋಟಿ ವೆಚ್ಚದಲ್ಲಿ ನಿರ್ಮಿಸಲಾಗಿರುವ ಪಶ್ಚಿಮ ಕಾರಿಡಾರ್‌ನ ಮೂರು ಪ್ರಮುಖ ವಿಭಾಗಗಳ ಲೋಕಾರ್ಪಣೆಯೊಂದಿಗೆ ದೇಶದ ಪೂರ್ವ ಮತ್ತು ಪಶ್ಚಿಮ ಸರಕು ಸಾಗಣೆ ಕಾರಿಡಾರ್‌ಗಳ ಸಂಪೂರ್ಣ ಜಾಲ ಕಾರ್ಯನಿರ್ವಹಣೆಗೆ ಸಿದ್ಧವಾಗಿದೆ. ಈ ಯೋಜನೆಯಿಂದ ಸರಕು ಸಾಗಣೆ ಸಮಯ ಹಾಗೂ ವೆಚ್ಚದಲ್ಲಿ ಗಣನೀಯ ಇಳಿಕೆಯಾಗಲಿದ್ದು, ದೇಶದ ವ್ಯಾಪಾರ ಮತ್ತು ವಾಣಿಜ್ಯ ಕ್ಷೇತ್ರಕ್ಕೆ ಇದು ಹೊಸ ಬೆನ್ನೆಲುಬಾಗಿ ಪರಿಣಮಿಸಲಿದೆ ಎಂದು ಪ್ರಧಾನಿ ಮೋದಿ ಹೇಳಿದ್ದಾರೆ.

  ಸರಕು ಸಾಗಣೆಗಾಗಿ ನಿರ್ಮಿಸಲಾಗಿರುವ ಈ ಪ್ರತ್ಯೇಕ ರೈಲು ಮಾರ್ಗಗಳಲ್ಲಿ ಪ್ರತಿದಿನ 430ಕ್ಕೂ ಅಧಿಕ ಗೂಡ್ಸ್ ರೈಲುಗಳು ಸಂಚರಿಸುತ್ತಿವೆ. ಈ ಹಿಂದೆ ಸರಕು ರೈಲುಗಳು 100 ಕಿ.ಮೀ. ಕ್ರಮಿಸಲು ಸುಮಾರು 6.5 ಗಂಟೆ ತೆಗೆದುಕೊಳ್ಳುತ್ತಿದ್ದರೆ, ಇದೀಗ ಅದಕ್ಕಿಂತ ಅರ್ಧಕ್ಕಿಂತ ಕಡಿಮೆ ಸಮಯದಲ್ಲಿ ಗಮ್ಯಸ್ಥಾನ ತಲುಪುವಂತಾಗಿದೆ.

  ರಸ್ತೆ ಮಾರ್ಗದಲ್ಲಿ ಟ್ರಕ್‌ಗಳ ಮೂಲಕ ಸರಕು ಸಾಗಿಸಲು ಸುಮಾರು 30 ಗಂಟೆ ಬೇಕಾಗುವ ದೂರವನ್ನು, ಮೀಸಲಾದ ಸರಕು ಸಾಗಣೆ ಕಾರಿಡಾರ್ ಮೂಲಕ ಕೇವಲ 10ರಿಂದ 12 ಗಂಟೆಗಳಲ್ಲಿ ಕ್ರಮಿಸಲು ಸಾಧ್ಯವಾಗುತ್ತಿದೆ. ಇದರಿಂದ ಸಾರಿಗೆ ಸಮಯ ಕಡಿಮೆಯಾಗುವುದರ ಜೊತೆಗೆ ಇಂಧನ ಬಳಕೆ ಮತ್ತು ಸಾಗಣೆ ವೆಚ್ಚವೂ ಇಳಿಕೆಯಾಗಲಿದೆ. ಸರಕು ಸಾಗಣೆ ಹೆಚ್ಚು ಪರಿಣಾಮಕಾರಿಯಾಗುವುದರಿಂದ ಪರಿಸರ ಮಾಲಿನ್ಯ ಕಡಿಮೆ ಮಾಡುವಲ್ಲಿಯೂ ಈ ಯೋಜನೆ ನೆರವಾಗಲಿದೆ.

  ಯೋಜನೆ ಜಾರಿಯಾಗಲು ತಡವಾದ ವಿಚಾರವನ್ನು ಪ್ರಸ್ತಾಪಿಸಿದ ಪ್ರಧಾನಿ ಮೋದಿ, 2004ರಲ್ಲಿ ಯೋಜನೆ ಪ್ರಸ್ತಾಪಗೊಂಡು, 2006ರಲ್ಲಿ ಕಂಪನಿ ಸ್ಥಾಪನೆಯಾದರೂ 2014ರವರೆಗೆ ಕಡತಗಳು ಒಂದು ಮೇಜಿನಿಂದ ಮತ್ತೊಂದು ಮೇಜಿಗೆ ಓಡಾಡುತ್ತಿದ್ದವು ಎಂದು ಹಿಂದಿನ ಯುಪಿಎ ಸರ್ಕಾರದ ವಿರುದ್ಧ ವ್ಯಂಗ್ಯವಾಡಿದರು. “ಕಡೆಪಕ್ಷ ಆ ಫೈಲ್‌ಗಳಿಗೂ ಒಂದು ಪ್ರತ್ಯೇಕ ಕಾರಿಡಾರ್ ಸಿಗಲಿಲ್ಲ” ಎಂದು ಮೋದಿ ಟೀಕಿಸಿದರು.

  ವಡೋದರಾದಲ್ಲಿ ಪ್ರಧಾನಿ ಮೋದಿ ಅವರು ಸನಂದ್-ಮಕರಪುರ, ನ್ಯೂ ಉಂಬರ್ಗಾಂವ್-ನ್ಯೂ ಸಫಲೆ ಹಾಗೂ ನ್ಯೂ ಸಫಲೆ-ಜೆಎನ್‌ಪಿಟಿ ಒಳಗೊಂಡ ಒಟ್ಟು 326 ಕಿ.ಮೀ. ಮಾರ್ಗವನ್ನು ರಾಷ್ಟ್ರಕ್ಕೆ ಸಮರ್ಪಿಸಿದರು. ಈ ಮಾರ್ಗಗಳು ದೇಶದ ಪ್ರಮುಖ ಕೈಗಾರಿಕಾ ಪ್ರದೇಶಗಳನ್ನು ಬಂದರುಗಳೊಂದಿಗೆ ವೇಗವಾಗಿ ಸಂಪರ್ಕಿಸಲಿವೆ. ವಿಶೇಷವಾಗಿ ಜೆಎನ್‌ಪಿಟಿ (ಜವಾಹರಲಾಲ್ ನೆಹರು ಬಂದರು)ಗೆ ನೇರ ಹಾಗೂ ಅಡೆತಡೆಯಿಲ್ಲದ ಸರಕು ರೈಲು ಸಂಪರ್ಕ ದೊರೆಯುವುದರಿಂದ ಕಂಟೈನರ್ ಸಾಗಣೆಗೆ ಮತ್ತಷ್ಟು ವೇಗ ಸಿಗಲಿದೆ.

  ಮೀಸಲಾದ ಸರಕು ಸಾಗಣೆ ರೈಲುಗಳಿಗೆ ಪ್ರತ್ಯೇಕ ಹಳಿಗಳನ್ನು ನಿರ್ಮಿಸಿರುವುದರಿಂದ ಸಾಮಾನ್ಯ ರೈಲ್ವೆ ಜಾಲದ ಮೇಲಿನ ಒತ್ತಡವೂ ಕಡಿಮೆಯಾಗಲಿದೆ. ಇದರಿಂದ ಪ್ರಯಾಣಿಕರ ಎಕ್ಸ್‌ಪ್ರೆಸ್ ರೈಲುಗಳಿಗೆ ಹೆಚ್ಚಿನ ಟ್ರ್ಯಾಕ್ ಸಾಮರ್ಥ್ಯ ಲಭ್ಯವಾಗಲಿದ್ದು, ರೈಲುಗಳ ವೇಗ ಮತ್ತು ಸಮಯಪಾಲನೆ ಸುಧಾರಿಸುವ ನಿರೀಕ್ಷೆಯಿದೆ. ಸರಕು ಸಾಗಣೆಗೆ ಪ್ರತ್ಯೇಕ ವ್ಯವಸ್ಥೆ ರೂಪಿಸುವ ಮೂಲಕ ಕೈಗಾರಿಕೆ, ವ್ಯಾಪಾರ, ಬಂದರು ಹಾಗೂ ರೈಲ್ವೆ ಜಾಲವನ್ನು ಮತ್ತಷ್ಟು ಪರಿಣಾಮಕಾರಿಯಾಗಿ ಜೋಡಿಸುವ ಈ ಯೋಜನೆ ಭಾರತದ ಲಾಜಿಸ್ಟಿಕ್ಸ್ ವ್ಯವಸ್ಥೆಯಲ್ಲಿ ಮಹತ್ವದ ಬದಲಾವಣೆಗೆ ಕಾರಣವಾಗಲಿದೆ.