'ಎಎಪಿ ಕಾರ್ಯಕರ್ತನಾಗಿರುವ ಅಭಿಜಿತ್ ದೀಪ್ಕೆ ವಿದ್ಯಾರ್ಥಿ ಹೇಗೆ ಆದರು?'- ಕೇಂದ್ರ ಸಚಿವ ಕಿರಣ್ ರಿಜಿಜು

•   Tue, Aug 18 2026 12:20:21 PM



• ನವದೆಹಲಿ, ಆ. 18 (DaijiworldNews/AA): ಕಾಕ್ರೋಚ್ ಜನತಾ ಪಾರ್ಟಿ (ಸಿಜೆಪಿ) ಸಂಸ್ಥಾಪಕ ಅಭಿಜಿತ್ ದೀಪ್ಕೆ ಮಹಾರಾಷ್ಟ್ರದವರಾಗಿದ್ದರೂ, ಅವರು ಆಮ್ ಆದ್ಮಿ ಪಕ್ಷದ ಕಾರ್ಯಕರ್ತ. ಅವರು ಹೇಗೆ ವಿದ್ಯಾರ್ಥಿ ಆದರು? ಎಂದು ಕೇಂದ್ರ ಸಂಸದೀಯ ವ್ಯವಹಾರಗಳ ಸಚಿವ ಕಿರಣ್ ರಿಜಿಜು ಪ್ರಶ್ನಿಸಿದ್ದಾರೆ.

  ಮಂಗಳವಾರ ಸುದ್ದಿಗಾರರೊಂದಿಗೆ ಮಾತನಾಡಿದ ಅವರು, "ಅಭಿಜಿತ್ ದೀಪ್ಕೆ ಆಮ್ ಆದ್ಮಿ ಪಕ್ಷದ (ಎಎಪಿ) ಕಾರ್ಯಕರ್ತನಾಗಿದ್ದು, ಜಂತರ್ ಮಂತರ್‌ನಲ್ಲಿ ಯುವಕರ ನೇತೃತ್ವದ ಪ್ರತಿಭಟನೆಯ ನಡುವೆ ತಮ್ಮನ್ನು ತಾವು ವಿದ್ಯಾರ್ಥಿ ನಾಯಕ ಎಂದು ಬಿಂಬಿಸಿಕೊಳ್ಳಲು ಪ್ರಯತ್ನಿಸುತ್ತಿದ್ದಾರೆ" ಎಂದು ಆರೋಪಿಸಿದರು.

  "ಪ್ರತಿಭಟನಾನಿರತ ವಿದ್ಯಾರ್ಥಿಗಳು ಎತ್ತಿರುವ ಕಳವಳಗಳು ನಿಜವಾದವು. ಆದರೆ, ಆಮ್ ಆದ್ಮಿ ಪಕ್ಷ ಮತ್ತು ಇತರರು ತಮ್ಮ ಸ್ವಂತ ರಾಜಕೀಯ ಹಿತಾಸಕ್ತಿಗಳಿಗಾಗಿ ಚಳುವಳಿಯನ್ನು 'ಹೈಜಾಕ್' ಮಾಡಲು ಪ್ರಯತ್ನಿಸಿದೆ" ಎಂದರು.

  "ವಿದ್ಯಾರ್ಥಿಗಳ ನಿಜವಾದ ಬೇಡಿಕೆಗಳ ಕುರಿತು ನೇರವಾಗಿ ಅವರೊಂದಿಗೆ ಮಾತುಕತೆ ನಡೆಸಲು ಸರ್ಕಾರ ಮುಕ್ತವಾಗಿದೆ. ಆದರೆ, ಚುನಾವಣಾ ಹಿನ್ನಡೆಗಳ ನಂತರ ರಾಜಕೀಯ ಪಕ್ಷಗಳು ಆ ಚಳವಳಿಯನ್ನು ದುರುಪಯೋಗಪಡಿಸಿಕೊಳ್ಳುತ್ತಿವೆ. ವಿದ್ಯಾರ್ಥಿಗಳಿಗೆ ಒಂದು ನಿರ್ದಿಷ್ಟ ಉತ್ಸಾಹವಿದೆ ಮತ್ತು ಅವರೊಂದಿಗೆ ಸಂವಾದದಲ್ಲಿ ತೊಡಗಬಹುದು. ಆದರೆ, ರಾಜಕೀಯ ಪಕ್ಷಗಳು ವಿದ್ಯಾರ್ಥಿಗಳ ಹಿಂದೆ ಅಡಗಿಕೊಂಡು ತಮ್ಮದೇ ಆದ ರಾಜಕೀಯ ಅಜೆಂಡಾಗಳನ್ನು ಹೇರಲು ಪ್ರಯತ್ನಿಸಿದಾಗ - ಅದು ಸರಿಯಲ್ಲ" ಎಂದು ಹೇಳಿದರು.