ಒಂದೇ ಕುಟುಂಬದ ಮೂವರ ಹತ್ಯೆ ಪ್ರಕರಣ - ಪಶ್ಚಾತ್ತಾಪವೇ ಇಲ್ಲ ಎಂದ ಆರೋಪಿ ಚೆಂತಮರನಿಗೆ ಗಲ್ಲು ಶಿಕ್ಷೆ

•   Mon, Jul 20 2026 05:46:35 PM



• ಪಾಲಕ್ಕಾಡ್, ಜು. 20 (DaijiworldNews/TA): ಕೇರಳದ ಪಾಲಕ್ಕಾಡ್ ಜಿಲ್ಲೆಯ ನೆನ್ಮಾರದಲ್ಲಿ 2025ರಲ್ಲಿ ನಡೆದಿದ್ದ ಬಹುಚರ್ಚಿತ ಅವಳಿ ಹತ್ಯೆ ಪ್ರಕರಣದ ಆರೋಪಿ 61 ವರ್ಷದ ಚೆಂತಮರನಿಗೆ ನ್ಯಾಯಾಲಯ ಮರಣದಂಡನೆ ಶಿಕ್ಷೆ ವಿಧಿಸಿದೆ. ಪ್ರಕರಣವನ್ನು "ಅಪರೂಪದಲ್ಲೇ ಅಪರೂಪದ ಪ್ರಕರಣ" ಎಂದು ಪರಿಗಣಿಸಿದ ಪಾಲಕ್ಕಾಡ್ ಹೆಚ್ಚುವರಿ ಸೆಷನ್ಸ್ ನ್ಯಾಯಾಲಯದ ನ್ಯಾಯಾಧೀಶ ಕೆನೆತ್ ಜಾರ್ಜ್ ಸೋಮವಾರ ಈ ಮಹತ್ವದ ತೀರ್ಪು ನೀಡಿದ್ದಾರೆ.

  

  2025ರ ಜನವರಿ 27ರಂದು ಪೊತುಂಡಿ ಪ್ರದೇಶದಲ್ಲಿ ತನ್ನ ನೆರೆಮನೆಯವರಾದ ಸುಧಾಕರನ್ (56) ಹಾಗೂ ಅವರ ತಾಯಿ ಲಕ್ಷ್ಮಿ (74) ಅವರನ್ನು ಚೆಂತಮರ ಅತ್ಯಂತ ಕ್ರೂರವಾಗಿ ಹತ್ಯೆ ಮಾಡಿದ್ದನು. ಈ ದ್ವಿಹತ್ಯೆಯೊಂದಿಗೆ, ಇದೇ ಕುಟುಂಬದ ಮೂವರನ್ನು ಕೊಂದ ಆರೋಪಿಯಾಗಿ ಆತ ಗುರುತಿಸಿಕೊಂಡಿದ್ದಾನೆ.

  ಪ್ರಕರಣದ ವಿಚಾರಣೆ ವೇಳೆ ಆರೋಪಿ, "ನನಗೆ ಈ ಕೊಲೆಗಳ ಬಗ್ಗೆ ಯಾವುದೇ ಪಶ್ಚಾತ್ತಾಪವಿಲ್ಲ" ಎಂದು ನ್ಯಾಯಾಲಯದಲ್ಲೇ ಹೇಳಿಕೆ ನೀಡಿದ್ದಾನೆ. ಈ ಹೇಳಿಕೆ ಸೇರಿದಂತೆ ಪ್ರಕರಣದ ಎಲ್ಲ ಸಂದರ್ಭಗಳನ್ನು ಪರಿಗಣಿಸಿದ ನ್ಯಾಯಾಲಯ, ಆರೋಪಿ ಸಮಾಜಕ್ಕೆ ನಿರಂತರ ಅಪಾಯವಾಗಿದ್ದು, ಕಠಿಣ ಶಿಕ್ಷೆ ವಿಧಿಸುವುದು ಅನಿವಾರ್ಯ ಎಂದು ಅಭಿಪ್ರಾಯಪಟ್ಟಿದೆ.

  ಚೆಂತಮರ ವಿರುದ್ಧ ಇದೇ ಕುಟುಂಬದ ಮತ್ತೊಬ್ಬ ಸದಸ್ಯೆ ಸಜಿತಾ ಅವರ 2019ರ ಕೊಲೆ ಪ್ರಕರಣವೂ ದಾಖಲಾಗಿತ್ತು. ಆ ಪ್ರಕರಣದಲ್ಲಿ ಜಾಮೀನಿನ ಮೇಲೆ ಬಿಡುಗಡೆಯಾಗಿದ್ದ ಆತ, ವೈಯಕ್ತಿಕ ದ್ವೇಷದಿಂದ ಸುಧಾಕರನ್ ಕುಟುಂಬವನ್ನು ಸಂಪೂರ್ಣವಾಗಿ ಮುಗಿಸುವ ಉದ್ದೇಶದಿಂದ 2025ರಲ್ಲಿ ಈ ದ್ವಿಹತ್ಯೆ ಎಸಗಿದ್ದಾನೆ ಎಂದು ತನಿಖೆಯಲ್ಲಿ ಬೆಳಕಿಗೆ ಬಂದಿತ್ತು.

  ಈ ಮೂಲಕ ಒಂದೇ ಕುಟುಂಬದ ಮೂವರು ಸದಸ್ಯರನ್ನು ವಿವಿಧ ಸಂದರ್ಭಗಳಲ್ಲಿ ಹತ್ಯೆ ಮಾಡಿದ ಅಪರಾಧ ಸಾಬೀತಾದ ಹಿನ್ನೆಲೆಯಲ್ಲಿ, ನ್ಯಾಯಾಲಯ ಮರಣದಂಡನೆ ಶಿಕ್ಷೆ ವಿಧಿಸಿದ್ದು, ಪ್ರಕರಣ ಕೇರಳದ ಅಪರಾಧ ಇತಿಹಾಸದಲ್ಲಿ ಅತ್ಯಂತ ಕ್ರೂರ ಕೃತ್ಯಗಳಲ್ಲಿ ಒಂದಾಗಿ ದಾಖಲಾಗಿದೆ.