16ಕ್ಕೆ AIIMS, 22ಕ್ಕೆ IAS - ಬಳಿಕ ಉದ್ಯೋಗ ತೊರೆದು ರೂ.2,000 ಕೋಟಿ ಕಂಪನಿ ಕಟ್ಟಿದ ರೋಮನ್ ಸೈನಿ ಕಥನ!

•   Sun, Jul 12 2026 07:40:02 AM



• ನವದೆಹಲಿ, ಜು. 12 (DaijiworldNews/TA): ದೇಶದ ಲಕ್ಷಾಂತರ ವಿದ್ಯಾರ್ಥಿಗಳು ಏಮ್ಸ್‌ ಪ್ರವೇಶ ಅಥವಾ ಯುಪಿಎಸ್‌ಸಿ ನಾಗರಿಕ ಸೇವಾ ಪರೀಕ್ಷೆಯಲ್ಲಿ ಯಶಸ್ಸು ಸಾಧಿಸಲು ವರ್ಷಗಳ ಕಾಲ ಶ್ರಮಿಸುತ್ತಾರೆ. ಆದರೆ, ಈ ಎರಡೂ ಪ್ರತಿಷ್ಠಿತ ಸಾಧನೆಗಳನ್ನು 23 ವರ್ಷ ತುಂಬುವ ಮೊದಲೇ ಸಾಧಿಸಿ, ನಂತರ ಐಎಎಸ್‌ ಹುದ್ದೆಗೆ ರಾಜೀನಾಮೆ ನೀಡಿ ಉದ್ಯಮಿಯಾಗಿ ಯಶಸ್ಸಿನ ಹೊಸ ಅಧ್ಯಾಯ ಬರೆದವರು ರೋಮನ್ ಸೈನಿ.

  

  ರಾಜಸ್ಥಾನದ ಜೈಪುರದ ಮಧ್ಯಮ ವರ್ಗದ ಕುಟುಂಬದಲ್ಲಿ ಜನಿಸಿದ ರೋಮನ್ ಸೈನಿ, ಕೇವಲ 16ನೇ ವಯಸ್ಸಿನಲ್ಲಿ ಏಮ್ಸ್‌ ಪ್ರವೇಶ ಪರೀಕ್ಷೆಯಲ್ಲಿ ಉತ್ತೀರ್ಣರಾಗಿ ನವದೆಹಲಿಯ ಏಮ್ಸ್‌ನಲ್ಲಿ ವೈದ್ಯಕೀಯ ಶಿಕ್ಷಣ ಆರಂಭಿಸಿದರು. ಬಳಿಕ 21ನೇ ವಯಸ್ಸಿನಲ್ಲಿ ಎಂಬಿಬಿಎಸ್‌ ಪೂರ್ಣಗೊಳಿಸಿ, ಏಮ್ಸ್‌ನಲ್ಲೇ ಜೂನಿಯರ್ ರೆಸಿಡೆಂಟ್ ವೈದ್ಯರಾಗಿ ಸೇವೆ ಸಲ್ಲಿಸಿದರು.

  ವೈದ್ಯಕೀಯ ಕ್ಷೇತ್ರದಲ್ಲೇ ಮುಂದುವರಿಯುವ ಬದಲು, ದೇಶದ ಅತ್ಯಂತ ಕಠಿಣ ಪರೀಕ್ಷೆಗಳಲ್ಲಿ ಒಂದಾದ ಯುಪಿಎಸ್‌ಸಿ ನಾಗರಿಕ ಸೇವಾ ಪರೀಕ್ಷೆ ಬರೆಯಲು ಅವರು ನಿರ್ಧರಿಸಿದರು. ತಮ್ಮ ಮೊದಲ ಪ್ರಯತ್ನದಲ್ಲೇ 22ನೇ ವಯಸ್ಸಿನಲ್ಲಿ ಅಖಿಲ ಭಾರತ 18ನೇ ರ‍್ಯಾಂಕ್ ಪಡೆದು ಐಎಎಸ್‌ ಅಧಿಕಾರಿಯಾಗಿ ಆಯ್ಕೆಯಾದರು. ಮಧ್ಯಪ್ರದೇಶ ಕೇಡರ್‌ಗೆ ನಿಯೋಜನೆಯಾಗುವ ಮೂಲಕ ದೇಶದ ಅತ್ಯಂತ ಕಿರಿಯ ಐಎಎಸ್‌ ಅಧಿಕಾರಿಗಳಲ್ಲಿ ಒಬ್ಬರಾಗಿದ್ದರು.

  ಬಹುತೇಕರ ಕನಸಿನ ಸರ್ಕಾರಿ ಹುದ್ದೆಯನ್ನು ಪಡೆದಿದ್ದರೂ, ಶಿಕ್ಷಣ ಕ್ಷೇತ್ರದಲ್ಲಿ ತಂತ್ರಜ್ಞಾನವನ್ನು ಬಳಸಿಕೊಂಡು ಹೆಚ್ಚಿನ ವಿದ್ಯಾರ್ಥಿಗಳಿಗೆ ಗುಣಮಟ್ಟದ ಶಿಕ್ಷಣ ತಲುಪಿಸುವ ಗುರಿಯಿಂದ ರೋಮನ್ ಸೈನಿ ಐಎಎಸ್‌ ಹುದ್ದೆಗೆ ರಾಜೀನಾಮೆ ನೀಡಿದರು. ಬಳಿಕ ಗೌರವ್ ಮುಂಜಾಲ್ ಹಾಗೂ ಹೇಮೇಶ್ ಸಿಂಗ್ ಅವರೊಂದಿಗೆ ಸೇರಿ ಅನ್‌ಅಕಾಡೆಮಿಯನ್ನು ಸಹ-ಸ್ಥಾಪಿಸಿದರು. ಆರಂಭದಲ್ಲಿ ಉಚಿತ ಶೈಕ್ಷಣಿಕ ವಿಡಿಯೊಗಳನ್ನು ನೀಡುತ್ತಿದ್ದ ಯೂಟ್ಯೂಬ್ ಚಾನೆಲ್ ಆಗಿದ್ದ ಅನ್‌ಅಕಾಡೆಮಿ, ಇಂದು ದೇಶದ ಪ್ರಮುಖ ಎಡ್‌ಟೆಕ್ ಸಂಸ್ಥೆಗಳಲ್ಲಿ ಒಂದಾಗಿ ಬೆಳೆದಿದೆ.

  ಇತ್ತೀಚಿನ ಅಂದಾಜುಗಳ ಪ್ರಕಾರ, ಅನ್‌ಅಕಾಡೆಮಿ ಸಂಸ್ಥೆಯ ಮೌಲ್ಯ ರೂ. 2,000 ಕೋಟಿಗೂ ಅಧಿಕವಾಗಿದೆ. ವೈದ್ಯರಿಂದ ಐಎಎಸ್‌ ಅಧಿಕಾರಿಯಾಗಿ, ಅಲ್ಲಿಂದ ಯಶಸ್ವಿ ಉದ್ಯಮಿಯಾಗಿ ಬೆಳೆದ ರೋಮನ್ ಸೈನಿ ಅವರ ಪಯಣ, ಗುರಿ, ಪರಿಶ್ರಮ ಮತ್ತು ವಿಭಿನ್ನ ಚಿಂತನೆಯ ಮೂಲಕ ಯಶಸ್ಸು ಸಾಧಿಸಬಹುದು ಎಂಬುದಕ್ಕೆ ಪ್ರೇರಣಾದಾಯಕ ಉದಾಹರಣೆಯಾಗಿದೆ.