ಆತ್ಮನಿರ್ಭರ ಭಾರತಕ್ಕೆ ಮತ್ತೊಂದು ಗರಿ - ಭಾರತ ನಿರ್ಮಿತ ಮೊದಲ C-295 ವಿಮಾನ ಯಶಸ್ವಿ ಹಾರಾಟ

•   Thu, Jun 11 2026 10:33:23 AM



• ನವದೆಹಲಿ, ಜೂ. 11 (DaijiworldNews/TA): ಭಾರತದಲ್ಲಿ ನಿರ್ಮಿಸಲಾದ ಮೊದಲ C-295 ಮಿಲಿಟರಿ ಸಾರಿಗೆ ವಿಮಾನ ತನ್ನ ಪ್ರಥಮ ಪರೀಕ್ಷಾ ಹಾರಾಟವನ್ನು ಯಶಸ್ವಿಯಾಗಿ ಪೂರ್ಣಗೊಳಿಸಿದ್ದು, ಇದನ್ನು ಭಾರತೀಯ ವಾಯುಪಡೆ (IAF) ಮಹತ್ವದ ಸಾಧನೆ ಎಂದು ಬಣ್ಣಿಸಿದೆ.

  

  ಈ ಕುರಿತು ಮಾಹಿತಿ ಹಂಚಿಕೊಂಡಿರುವ ವಾಯುಪಡೆ, ದೇಶೀಯ ಉತ್ಪಾದನೆಯ ಮೊದಲ C-295 ವಿಮಾನದ ಯಶಸ್ವಿ ಹಾರಾಟದ ಹಿಂದೆ ಶ್ರಮಿಸಿದ ಸಂಪೂರ್ಣ ತಂಡಕ್ಕೆ ಅಭಿನಂದನೆ ಸಲ್ಲಿಸಿದೆ. ಭಾರತೀಯ ವಾಯುಪಡೆಯು ಸುಮಾರು ರೂ. 21,935 ಕೋಟಿ ವೆಚ್ಚದಲ್ಲಿ 56 C-295 ಸಾರಿಗೆ ವಿಮಾನಗಳನ್ನು ಖರೀದಿಸುತ್ತಿದ್ದು, ಈ ಯೋಜನೆ ದೇಶದ ರಕ್ಷಣಾ ವಲಯದಲ್ಲಿ ಪ್ರಮುಖ ಹೆಜ್ಜೆಯಾಗಿದೆ. ಮೊದಲ 16 ವಿಮಾನಗಳನ್ನು ಸ್ಪೇನ್‌ನಿಂದ ಪೂರೈಸಲಾಗುತ್ತಿದ್ದು, ಉಳಿದ 40 ವಿಮಾನಗಳನ್ನು ಗುಜರಾತ್‌ನ ವಡೋದರಾದಲ್ಲಿರುವ ಟಾಟಾ ಅಡ್ವಾನ್ಸ್ಡ್ ಸಿಸ್ಟಮ್ಸ್ ಲಿಮಿಟೆಡ್ (TASL) ಮತ್ತು ಏರ್‌ಬಸ್ ಸಹಭಾಗಿತ್ವದಲ್ಲಿ ಭಾರತದಲ್ಲೇ ತಯಾರಿಸಲಾಗುತ್ತಿದೆ.

  ಈ ಸಾಧನೆ ಕುರಿತು ಪ್ರತಿಕ್ರಿಯಿಸಿರುವ ಐಎಎಫ್, “ಭಾರತ ನಿರ್ಮಿತ ಮೊದಲ C-295 ವಿಮಾನದ ಯಶಸ್ವಿ ಹಾರಾಟವು ದೇಶದ ಏರೋಸ್ಪೇಸ್ ಕ್ಷೇತ್ರದ ಬೆಳೆಯುತ್ತಿರುವ ಸಾಮರ್ಥ್ಯವನ್ನು ಪ್ರದರ್ಶಿಸುತ್ತದೆ. ಅಲ್ಲದೆ, ಆತ್ಮನಿರ್ಭರ ಭಾರತದ ಪರಿಕಲ್ಪನೆಯಡಿ ದೇಶೀಯ ರಕ್ಷಣಾ ಉತ್ಪಾದನೆಯನ್ನು ಉತ್ತೇಜಿಸುವ ಭಾರತೀಯ ವಾಯುಪಡೆಯ ಬದ್ಧತೆಯನ್ನು ಇದು ಮತ್ತಷ್ಟು ಬಲಪಡಿಸುತ್ತದೆ” ಎಂದು ತಿಳಿಸಿದೆ. C-295 ವಿಮಾನಗಳು ಹಳೆಯ ಅವ್ರೋ (Avro) ಸಾರಿಗೆ ವಿಮಾನಗಳ ಸ್ಥಾನವನ್ನು ಭರಿಸಲಿದ್ದು, ಸೈನಿಕರು, ಯುದ್ಧೋಪಕರಣಗಳು ಹಾಗೂ ಪರಿಹಾರ ಸಾಮಗ್ರಿಗಳ ಸಾಗಣೆಯಲ್ಲಿ ಪ್ರಮುಖ ಪಾತ್ರವಹಿಸಲಿವೆ.

  The Indian Air Force congratulates the entire team behind the successful maiden flight of the first India-made C-295.
  
  The achievement reinforces India's growing aerospace capabilities and underscores the Indian Air Force commitment to fostering indigenous defence capability… pic.twitter.com/tsU0dQUdi5

  — Indian Air Force (@IAF_MCC) June 10, 2026