'ಇರಾನ್ ಮೇಲೆ ದಾಳಿಗೆ ಅಮೆರಿಕವು ಭಾರತದ ನೌಕಾ ನೆಲೆಗಳನ್ನ ಬಳಸುತ್ತಿದೆ ಅನ್ನುವುದು ಸುಳ್ಳು ಸುದ್ದಿ' - ಎಂಇಎ

•   Thu, Mar 05 2026 12:25:34 PM



• ನವದೆಹಲಿ, ಮಾ. 05 (DaijiworldNews/AK): ಇರಾನ್ ಮೇಲೆ ದಾಳಿ ಮಾಡಲು ಅಮೆರಿಕವು ತನ್ನ ನೌಕಾ ನೆಲೆಗಳನ್ನ ಬಳಸುತ್ತಿದೆ ಎಂಬ ವರದಿಯನ್ನು ಭಾರತ ತಿರಸ್ಕರಿಸಿದೆ.

  ಅಮೆರಿಕ ಮೂಲದ ಒನ್ ಅಮೇರಿಕಾ ನ್ಯೂಸ್ ನೆಟ್‌ವರ್ಕ್‌ಗೆ ನೀಡಿದ ಸಂದರ್ಶನದಲ್ಲಿ ಅಮೆರಿಕದ ಮಾಜಿ ಸೇನಾ ಕರ್ನಲ್ ಡೌಗ್ಲಾಸ್ ಮ್ಯಾಕ್‌ಗ್ರೆಗರ್, ಇರಾನ್ ವಿರುದ್ಧದ ಯುದ್ಧದಲ್ಲಿ ಅಮೆರಿಕ ಭಾರತೀಯ ನೌಕಾ ನೆಲೆಗಳನ್ನು ಬಳಸುತ್ತಿದೆ ಎಂದು ಸೂಚಿಸಿದ ನಂತರ ವಿದೇಶಾಂಗ ಸಚಿವಾಲಯದ ಪ್ರತಿಕ್ರಿಯೆ ಬಂದಿದೆ .

  ಭಾರತ ಈ ಯುದ್ದದಲ್ಲಿ ಈವರೆಗೂ ಬಹಿರಂಗವಾಗಿ ಯಾರ ಪರ ವಹಿಸದೆ ತಟಸ್ಥ ನಿಲುವು ಕಾಯ್ದುಕೊಂಡಿದೆ. ಮಧ್ಯಪ್ರಾಚ್ಯದಲ್ಲಿನ ಸಂಘರ್ಷದ ಬಗ್ಗೆ ಭಾರತವು "ತೀವ್ರ ಕಳವಳ" ವ್ಯಕ್ತಪಡಿಸಿದೆ, ಎಲ್ಲಾ ಕಡೆಯವರು "ಸಂಯಮವನ್ನು ಕಾಯ್ದುಕೊಳ್ಳಬೇಕು, ಉಲ್ಬಣಗೊಳ್ಳುವುದನ್ನು ತಪ್ಪಿಸಬೇಕು ಮತ್ತು ನಾಗರಿಕರ ಸುರಕ್ಷತೆಗೆ ಆದ್ಯತೆ ನೀಡಬೇಕು" ಎಂದು ಒತ್ತಾಯಿಸಿದೆ.

  ಈ ಮಧ್ಯೆ ಇರಾನ್ ಮೇಲೆ ದಾಳಿ ಮಾಡಲು ಅಮೆರಿಕವು ಭಾರತೀಯ ನೌಕಾನೆಲೆಗಳನ್ನ ಬಳಸುತ್ತಿದೆ ಎಂದು US ಮಾಜಿ ಸೇನಾ ಕರ್ನಲ್ ಡೌಗ್ಲಾಸ್ ಮ್ಯಾಕ್‌ಗ್ರೆಗರ್ ಹೇಳಿಕೆ ನೀಡಿದ್ದರು. ಇದಕ್ಕೆ ಪ್ರತಿಕ್ರಿಯೆ ನೀಡಿರುವ ಭಾರತ ವಿದೇಶಾಂಗ ಸಚಿವಾಲಯವು, ಯುಎಸ್‌ ಅಧಿಕಾರಿಯ ಹೇಳಿಕೆ ಅಧಾರರಹಿತ ಎಂದು ಸ್ಪಷ್ಟಪಡಿಸಿದೆ.

  ಭಾರತದ ವಿದೇಶಾಂಗ ಸಚಿವಾಲಯದ ಅಧಿಕೃತ ಸತ್ಯ-ಪರಿಶೀಲನಾ ಹ್ಯಾಂಡಲ್ ತನ್ನ X ಖಾತೆ ಮೂಲಕ, ʻನಕಲಿ ಸುದ್ದಿ ಎಚ್ಚರಿಕೆʼ ಎಂಬ ಶೀರ್ಷಿಕೆಯಡಿ ಪೋಸ್ಟ್‌ ಮಾಡಿ ವರದಿಗಳನ್ನ ತಳ್ಳಿಹಾಕಿದೆ. ನಕಲಿ ಸುದ್ದಿ ಎಚ್ಚರಿಕೆ… ಭಾರತೀಯ ನೌಕಾನೆಲೆ ಹಾಗೂ ಬಂದರುಗಳನ್ನ ಅಮೆರಿಕಾ ನೌಕಾಪಡೆ ಬಳಸುತ್ತಿದೆ ಎಂದು ಅಮೆರಿಕಾ ಮೂಲದ ಚಾನೆಲ್ OAN ನಲ್ಲಿ ಹೇಳಲಾಗುತ್ತಿರುವ ವಿಚಾರಗಳು ನಕಲಿ ಮತ್ತು ಸುಳ್ಳು. ಇಂತಹ ಆಧಾರರಹಿತ ಮತ್ತು ಕಟ್ಟುಕಥೆಗಳ ವಿರುದ್ಧ ನಾವು ನಿಮ್ಮನ್ನು ಎಚ್ಚರಿಸುತ್ತೇವೆ ಎಂದು ಹೇಳಿದೆ.

  
  ಇರಾನ್‌ ಮೇಲೆ ಇಸ್ರೇಲ್-ಅಮೆರಿಕಾ ಜಂಟಿ ದಾಳಿ ಮಾಡುತ್ತಿದೆ. ಈ ಮಧ್ಯೆ ಹಲವು ನಕಲಿ ಹೇಳಿಕೆಗಳು ಹಾಗೂ ವಿಡಿಯೋಗಳು ಸಾಮಾಜಿಕ ಜಾಲತಾಣದಲ್ಲಿ ಹರಿದಾಡುತ್ತಿದ್ದು, ಅಂತೆಯೇ ಅಮೆರಿಕದ ಮಾಜಿ ಸೇನಾ ಕರ್ನಲ್ ಡೌಗ್ಲಾಸ್ ಮ್ಯಾಕ್‌ಗ್ರೆಗರ್ ಎಂಬಾತ OAN ಎಂಬ ಸುದ್ದಿ ಸಂಸ್ಥೆಗೆ ಸಂದರ್ಶನ ನೀಡಿದ್ದರು. 

  ಈ ವೇಳೆ ʻಅಮೆರಿಕದ ಎಲ್ಲಾ ನೆಲೆಗಳು ಹಾಗೂ ಬಂದರುಗಳು ನಾಶವಾಗಿದೆ. ಇದರಿಂದಾಗಿ ನಾವು ಭಾರತೀಯ ನೌಕಾನೆಲೆಗಳನ್ನು ಬಳಸಿಕೊಂಡು ದಾಳಿ ಮಾಡುವ ಸ್ಥಿತಿ ಬಂದಿದೆ. ಇದು ಒಳ್ಳೆಯ ವಿಚಾರವಲ್ಲ ಎಂದು ಹೇಳಿದ್ದರು.