2025ರ ಕೇಂದ್ರ ರಾಜಕೀಯದತ್ತ ಒಂದು ಹಿನ್ನೋಟ

•   Wed, Dec 31 2025 04:35:44 PM



• ಬೆಂಗಳೂರು, ಡಿ. 31 (DaijiworldNews/TA): 2025ರ ಕೊನೇಯ ಹೊತ್ತಿನಲ್ಲಿ ಹಿಂದಿರುಗಿ ನೋಡಿದರೆ, ಭಾರತೀಯ ಕೇಂದ್ರ ರಾಜಕೀಯವು ಈ ವರ್ಷ ಹಲವು ಸವಾಲುಗಳ ನಡುವೆಯೇ ಮಹತ್ವದ ಆಡಳಿತಾತ್ಮಕ, ರಾಜಕೀಯ ಹಾಗೂ ತಂತ್ರಾತ್ಮಕ ಬೆಳವಣಿಗೆಗಳಿಗೆ ಸಾಕ್ಷಿಯಾಗಿದೆ. ಆರ್ಥಿಕ ಸ್ಥಿರತೆ ಕಾಪಾಡುವ ಪ್ರಯತ್ನ, ಮೂಲಸೌಕರ್ಯ ವಿಸ್ತರಣೆ, ಡಿಜಿಟಲೀಕರಣ ಮತ್ತು ಆಡಳಿತ ಸುಧಾರಣೆಗಳು ಆಡಳಿತ ಪಕ್ಷದ ಪ್ರಮುಖ ಸಾಧನೆಗಳಾಗಿ ಗುರುತಿಸಲ್ಪಟ್ಟಿವೆ. ಇದೇ ವೇಳೆ, ಈ ವರ್ಷ ಹಲವು ವಿವಾದಗಳು ಹಾಗೂ ರಾಜಕೀಯ ಘರ್ಷಣೆಗಳಿಗೂ ಸಾಕ್ಷಿಯಾಯಿತು.

  

  ಗಡಿಯಲ್ಲಿ ಉದ್ವಿಗ್ನತೆ ಮತ್ತು ವಿದೇಶಾಂಗ ಪರಿಣಾಮ : ಗಡಿಯಲ್ಲಿ ಉಂಟಾದ ಉದ್ವಿಗ್ನತೆ ದೇಶದ ರಾಜಕೀಯ ಚರ್ಚೆಯ ಕೇಂದ್ರಬಿಂದುವಾಗಿತ್ತು. ಜೊತೆಗೆ ಅಮೆರಿಕದಿಂದ ವಿಧಿಸಲಾದ ಸುಂಕಗಳು ವಿದೇಶಾಂಗ ಸಂಬಂಧಗಳಿಗೆ ಮಾತ್ರ ಸೀಮಿತವಾಗದೆ, ದೇಶೀಯ ರಾಜಕೀಯದ ಮೇಲೂ ಪ್ರಭಾವ ಬೀರಿದವು. ಇವು ಆಡಳಿತ ಮತ್ತು ವಿರೋಧ ಪಕ್ಷಗಳ ನಡುವಿನ ವಾಗ್ವಾದಕ್ಕೆ ಕಾರಣವಾದವು.

  ಮತದಾರರ ಪಟ್ಟಿ ಪರಿಷ್ಕರಣೆ - ರಾಜಕೀಯ ವಿವಾದ : ಬಿಹಾರ ವಿಧಾನಸಭಾ ಚುನಾವಣೆಗೆ ಮುನ್ನ ನಡೆದ ಮತದಾರರ ಪಟ್ಟಿಯ ವಿಶೇಷ ತೀವ್ರ ಪರಿಷ್ಕರಣೆ (SIR) ದೇಶವ್ಯಾಪಿ ರಾಜಕೀಯ ಚರ್ಚೆಗೆ ಕಾರಣವಾಯಿತು. ಕಾಂಗ್ರೆಸ್ ಸೇರಿದಂತೆ ವಿರೋಧ ಪಕ್ಷಗಳು ಮತಗಳ್ಳತನದ ಆರೋಪ ಮಾಡಿದ್ದರೂ, ಚುನಾವಣಾ ಆಯೋಗ ಆ ಆರೋಪಗಳನ್ನು ತಳ್ಳಿ ಹಾಕಿತು. ಈ ವಿಚಾರವನ್ನು ರಾಹುಲ್ ಗಾಂಧಿ ರಾಜಕೀಯ ಪ್ರಚಾರಕ್ಕೆ ಬಳಸಿಕೊಂಡರೂ, ಸ್ಪಷ್ಟ ಹೋರಾಟದ ದಿಕ್ಕು ರೂಪಿಸುವಲ್ಲಿ ವಿಫಲವಾದರು ಎನ್ನುವ ಅಭಿಪ್ರಾಯ ಸಾರ್ವಜನಿಕ ವಲಯದಲ್ಲಿ ಮೂಡಿದೆ.

  ವಿಷಯ ಪ್ರಸ್ತಾಪದಲ್ಲಿ ಕಾಂಗ್ರೆಸ್ ವಿಫಲತೆ : ವಿರೋಧ ಪಕ್ಷದ ಸ್ಥಾನದಲ್ಲಿದ್ದರೂ, ಹಲವು ಪ್ರಮುಖ ರಾಷ್ಟ್ರೀಯ ವಿಚಾರಗಳನ್ನು ಪರಿಣಾಮಕಾರಿಯಾಗಿ ಪ್ರಸ್ತಾಪಿಸುವಲ್ಲಿ ಕಾಂಗ್ರೆಸ್ ಸೋತಿದೆ ಎಂಬ ಆರೋಪಗಳು ಕೇಳಿಬರುತ್ತಿವೆ. ಮತಗಳ್ಳತನದ ವಿಚಾರಕ್ಕೆ ತಾರ್ಕಿಕ ಅಂತ್ಯ ನೀಡಲಾಗದೇ ಇರುವುದು, ಕೆಲ ಪ್ರಮುಖ ಪ್ರಕರಣಗಳ ಕುರಿತು ಸ್ಪಷ್ಟ ನಿಲುವು ತಾಳದೇ ಇರುವುದು ಪಕ್ಷದ ದಿಕ್ಕು ತಪ್ಪಿದ ರಾಜಕೀಯವನ್ನು ತೋರಿಸುತ್ತದೆ ಎನ್ನಲಾಗುತ್ತಿದೆ.

  ಇಂಡಿಯಾ ಬ್ಲಾಕ್‌ನೊಳಗಿನ ಆಂತರಿಕ ಭಿನ್ನಾಭಿಪ್ರಾಯ : ಕಾಂಗ್ರೆಸ್ ನೇತೃತ್ವದ ಇಂಡಿಯಾ ಮೈತ್ರಿಕೂಟ ಸದ್ಯ ಗಂಭೀರ ಆಂತರಿಕ ಭಿನ್ನಾಭಿಪ್ರಾಯಗಳನ್ನು ಎದುರಿಸುತ್ತಿದೆ. ಸ್ಪಷ್ಟ ನಾಯಕತ್ವದ ಕೊರತೆ, ಕಾರ್ಯತಂತ್ರದ ಗೊಂದಲ ಮತ್ತು ಪರಸ್ಪರ ವಿರೋಧಾಭಾಸಗಳು ಮೈತ್ರಿಕೂಟವನ್ನು ದುರ್ಬಲಗೊಳಿಸುತ್ತಿವೆ. ಇತ್ತೀಚಿನ ಚುನಾವಣೆಗಳ ಫಲಿತಾಂಶಗಳು ಇಂಡಿಯಾ ಬ್ಲಾಕ್‌ಗೆ ನಿರೀಕ್ಷಿತ ಲಾಭ ನೀಡಲಿಲ್ಲ, ಇದು ಅವರ ಭವಿಷ್ಯದ ಮೇಲೆ ಪ್ರಶ್ನಾರ್ಥಕ ಚಿಹ್ನೆ ಮೂಡಿಸಿದೆ.

  ಬಿಜೆಪಿಯ ಸಂಘಟನಾ ಬಲ ಮತ್ತು ಯುವ ನಾಯಕತ್ವ : ಇದಕ್ಕೆ ವಿರುದ್ಧವಾಗಿ, ಬಿಜೆಪಿ ಯುವ ನಾಯಕತ್ವವನ್ನು ಮುಂಚೂಣಿಗೆ ತರುವ ಮೂಲಕ ಭವಿಷ್ಯದ ರಾಜಕೀಯ ಸಂದೇಶ ನೀಡುತ್ತಿದೆ. ಬಿಜೆಪಿ–ಆರ್‌ಎಸ್‌ಎಸ್ ಸಂಬಂಧಗಳ ಕುರಿತು ಮಾತನಾಡಿದ ರಾಜಕೀಯ ವಿಶ್ಲೇಷಕ ಅದಿತಿ ಟಂಡನ್, ಭಿನ್ನಾಭಿಪ್ರಾಯಗಳಿದ್ದರೂ ಸಂಘಟನಾ ಏಕತೆ ಮುಂದುವರಿದಿದೆ ಎಂದು ಹೇಳಿದ್ದಾರೆ. ಪಕ್ಷದ ಅಧ್ಯಕ್ಷರ ಆಯ್ಕೆ, ಅನುಭವ, ವಯಸ್ಸು ಹಾಗೂ ಸಾಮಾಜಿಕ ಸಮತೋಲನದ ಮೂಲಕ ದೀರ್ಘಾವಧಿಯ ಕಾರ್ಯತಂತ್ರ ರೂಪಿಸಲಾಗುತ್ತಿದೆ.

  2026ರ ಚುನಾವಣೆ - ಎಲ್ಲರ ಗಮನ ಮುಂದಿನ ವರ್ಷಕ್ಕೆ : 2026ರಲ್ಲಿ ಅಸ್ಸಾಂ, ಪಶ್ಚಿಮ ಬಂಗಾಳ, ತಮಿಳುನಾಡು, ಕೇರಳ ಮತ್ತು ಪುದುಚೇರಿಯಲ್ಲಿ ನಡೆಯಲಿರುವ ವಿಧಾನಸಭಾ ಚುನಾವಣೆಗಳು ರಾಷ್ಟ್ರಮಟ್ಟದ ರಾಜಕೀಯ ಸಮೀಕರಣಗಳನ್ನು ಬದಲಾಯಿಸುವ ಸಾಧ್ಯತೆ ಹೊಂದಿವೆ. 2024ರ ಲೋಕಸಭಾ ಚುನಾವಣೆಯ ನಂತರ ಎನ್‌ಡಿಎ ಹೇಗೆ ತನ್ನ ಸ್ಥಾನವನ್ನು ಮತ್ತಷ್ಟು ಬಲಪಡಿಸಿಕೊಳ್ಳಲಿದೆ ಎಂಬುದು ಪ್ರಮುಖ ಪ್ರಶ್ನೆಯಾಗಿದೆ. ಅದೇ ರೀತಿ, ಇಂಡಿಯಾ ಬ್ಲಾಕ್ ಉಳಿಯುತ್ತದೆಯೇ ಅಥವಾ ಮತ್ತಷ್ಟು ಬಿರುಕು ಕಾಣಿಸಿಕೊಳ್ಳುತ್ತದೆಯೇ ಎಂಬುದು ಕುತೂಹಲಕ್ಕೆ ಕಾರಣವಾಗಿದೆ.

  ಕಾಂಗ್ರೆಸ್ ಸೋಲಿನ ಮೂಲ ಎಲ್ಲಿ? : 2014ರಿಂದ ನಿರಂತರ ಹಿನ್ನಡೆ ಅನುಭವಿಸುತ್ತಿರುವ ಕಾಂಗ್ರೆಸ್ ಅಭಿವೃದ್ಧಿ ರಾಜಕಾರಣಕ್ಕಿಂತ ಸೈದ್ಧಾಂತಿಕ ಬೋಧನೆಗೆ ಹೆಚ್ಚು ಒತ್ತು ನೀಡುತ್ತಿದೆ ಎಂಬ ಟೀಕೆ ಎದುರಿಸುತ್ತಿದೆ. ಪಕ್ಷದೊಳಗಿನ ವಿಭಿನ್ನ ನಿಲುವುಗಳು, ಆರ್‌ಎಸ್‌ಎಸ್ ಕುರಿತು ವಿರೋಧಾಭಾಸದ ಹೇಳಿಕೆಗಳು ಹಾಗೂ ಸ್ಪಷ್ಟ ರಾಜಕೀಯ ಕಾರ್ಯಯೋಜನೆಯ ಕೊರತೆ ಕಾಂಗ್ರೆಸ್‌ಗೆ ಸ್ಪಷ್ಟ ದಿಕ್ಕಿಲ್ಲ ಎಂಬ ಸಂದೇಶ ನೀಡುತ್ತಿದೆ.

  ಒಟ್ಟಿನಲ್ಲಿ, 2025ರ ಕೇಂದ್ರ ರಾಜಕೀಯ ಬೆಳವಣಿಗೆಗಳು 2026ರ ಚುನಾವಣೆಗೆ ಭೂಮಿಕೆಯನ್ನು ಸಿದ್ಧಪಡಿಸಿರುವಂತಿವೆ. ಒಂದೆಡೆ ಆಡಳಿತ ಪಕ್ಷದ ಸಂಘಟನಾ ಬಲ, ಯುವ ನಾಯಕತ್ವ ಮತ್ತು ಸ್ಪಷ್ಟ ಕಾರ್ಯತಂತ್ರ ಇದ್ದರೆ, ಮತ್ತೊಂದೆಡೆ ವಿರೋಧ ಪಕ್ಷದಲ್ಲಿ ಗೊಂದಲ ಮತ್ತು ಆಂತರಿಕ ವಿರೋಧಾಭಾಸಗಳು ಕಾಣಿಸುತ್ತಿವೆ. ಮುಂದಿನ ವರ್ಷ ಕೇಂದ್ರ ರಾಜಕೀಯ ಯಾವ ದಿಕ್ಕಿನಲ್ಲಿ ಸಾಗಲಿದೆ ಎಂಬುದನ್ನು ಕೊನೆಗೂ ಮತದಾರರ ತೀರ್ಪೇ ನಿರ್ಧರಿಸಲಿದೆ.