ವಾರಕ್ಕೆ 3 ದಿನ ವೀಕಾಫ್​- ಭಾರತದ ಹೊಸ ಕಾರ್ಮಿಕ ಕಾನೂನನಲ್ಲಿ ಏನಿದೆ ಗೊತ್ತಾ?

•   Tue, Dec 16 2025 02:56:00 PM



• ನವದೆಹಲಿ, ಡಿ. 16 (DaijiworldNews/AK):ಕೆಲವು ದೇಶಗಳಲ್ಲಿ ವಾರಕ್ಕೆ ನಾಲ್ಕು ದಿನ ಕೆಲಸ, ಮೂರು ದಿನ ರಜೆಯ ವ್ಯವಸ್ಥೆ ಇದೆ. ಭಾರತದಲ್ಲೂ ಇದೀಗ ಇಂಥ ಅವಕಾಶ ನೀಡಲಾಗುತ್ತಿದೆ. ಸರ್ಕಾರ ಜಾರಿಗೆ ತರುತ್ತಿರುವ ಹೊಸ ಕಾರ್ಮಿಕ ಸಂಹಿತೆಯಲ್ಲಿ ಕಾರ್ಮಿಕರಿಗೆ ಸುಲಭವಾಗಿರುವ ಕಾನೂನುಗಳನ್ನು ರೂಪಿಸಲಾಗಿದೆ.

  ಹೊಸ ಲೇಬರ್ ಕೋಡ್ ಪ್ರಕಾರ ವಾರದಲ್ಲಿ ಒಬ್ಬ ಕಾರ್ಮಿಕನಿಂದ 48 ಗಂಟೆವರೆಗೆ ಮಾತ್ರ ಕೆಲಸ ಮಾಡಿಸಬೇಕು. ದಿನದ ವರ್ಕಿಂಗ್ ಅವರ್​ಗೆ ಮಿತಿ ಹಾಕಿಲ್ಲ. ಕೇಂದ್ರ ಕಾರ್ಮಿಕ ಮತ್ತು ಉದ್ಯೋಗ ಸಚಿವಾಲಯವು ಈ ಬಗ್ಗೆ ಸ್ಪಷ್ಟನೆ ನೀಡಿದೆ. ಕಾರ್ಮಿಕರು ದಿನದಲ್ಲಿ ಎಷ್ಟು ಹೊತ್ತು ಬೇಕಾದರೂ ಕೆಲಸ ಮಾಡಬಹದು. ವಾರದಲ್ಲಿ 48 ಗಂಟೆ ಕೆಲಸದ ಮಿತಿ ಮಾತ್ರ ಇರುತ್ತದೆ.

  ಲೇಬರ್ ಕೋಡ್​ನಲ್ಲಿ ಕಾರ್ಮಿಕರಿಗೆ ಸಮಯವಕಾಶ ಸಿಗಲಿದೆ. ದಿನಕ್ಕೆ 12 ಗಂಟೆಯಂತೆ ನಾಲ್ಕು ದಿನ ಕೆಲಸ ಮಾಡಿದರೆ ಒಟ್ಟು ಕೆಲಸದ ಅವಧಿ 48 ಗಂಟೆ ಆಗುತ್ತದೆ. ಉಳಿದ ಮೂರು ದಿನ ಪೇಯ್ಡ್ ಹಾಲಿಡೇ ಪಡೆಯಬಹುದು. ಮೂರು ದಿನ ವೀಕಾಫ್ ಸಿಕ್ಕಂತಾಗುತ್ತದೆ.

  ನೀವು ದಿನಕ್ಕೆ 8 ತಾಸು ಮಾತ್ರವೇ ಕೆಲಸ ಮಾಡಬಲ್ಲಿರಾದರೆ ವಾರದಲ್ಲಿ ಆರು ದಿನ ಕೆಲಸ ಮಾಡಬೇಕಾಗುತ್ತದೆ. ಒಂದು ದಿನ ಮಾತ್ರ ವೀಕಾಫ್ ಸಿಗುತ್ತದೆ. ದಿನಕ್ಕೆ 10 ಗಂಟೆ ಕೆಲಸ ಮಾಡಿದರೆ ವಾರದಲ್ಲಿ ಎರಡು ದಿನ ವೀಕಾಫ್ ಪಡೆಯಬಹುದು. ಒಬ್ಬ ಕಾರ್ಮಿಕ ತನ್ನ ವೀಕೆಂಡ್ ಅಗತ್ಯಗಳಿಗೆ ತಕ್ಕಂತೆ ಕೆಲಸದ ಅವಧಿಯನ್ನು ನಿರ್ಧರಿಸಿಕೊಳ್ಳಲು ಅವಕಾಶ ಸಿಗಬಹುದು.
  ಒಂದು ವೇಳೆ ಕಂಪನಿಗಳು ಕಾರ್ಮಿಕರಿಂದ ಹೆಚ್ಚು ಹೊತ್ತು ಕೆಲಸ ಮಾಡಿಸಿಕೊಳ್ಳುವ ಅನಿವಾರ್ಯತೆ ಇದ್ದಲ್ಲಿ ಆಗ ಓಟಿ ನೀಡಬೇಕು. ಎರಡು ಪಟ್ಟು ಹೆಚ್ಚು ವೇತನ ಕೊಡಬೇಕು ಎಂದು ಹೊಸ ಕಾರ್ಮಿಕ ಸಂಹಿತೆಯಲ್ಲಿ ಸ್ಪಷ್ಟವಾಗಿ ಹೇಳಲಾಗಿದೆ.

  ಹೊಸ ಲೇಬರ್ ಕೋಡ್​ನಲ್ಲಿ ವಾರಕ್ಕೆ 48 ಗಂಟೆಗಳ ಕೆಲಸದ ಮಿತಿ ಎಂದು ಸ್ಪಷ್ಟಪಡಿಸಲಾಗಿದೆ. ಹಾಗೆಯೇ, ದಿನಕ್ಕೆ 12 ಗಂಟೆಗಳವರೆಗೂ ಕೆಲಸ ಮಾಡಿಸುವ ಅವಕಾಶವನ್ನು ಕಂಪನಿಗಳಿಗೆ ನೀಡಲಾಗಿದೆ. ಇಲ್ಲಿ ದಿನಕ್ಕೆ 12 ಗಂಟೆ ಕೆಲಸ ಮಾಡಿಸಿ 3 ದಿನ ವೀಕಾಫ್ ಕೊಡುವುದು, ಅಥವಾ ದಿನಕ್ಕೆ 8 ಗಂಟೆ ಕೆಲಸ ಮಾಡಿಸಿ ಒಂದು ದಿನ ವೀಕಾಫ್ ಕೊಡುವುದು ಇದನ್ನು ಉದ್ಯೋಗಿಗಳೊಂದಿಗೆ ಸಮಾಲೋಚಿಸಿ ಕಂಪನಿ ನಿರ್ಧರಿಸಬಹುದು.