'ಅನಿಶ್ಚಿತತೆಯ ನಡುವೆಯೂ ಭಾರತ ಪ್ರಗತಿಪಥದಲ್ಲಿ' - ಪ್ರಧಾನಿ ಮೋದಿ

•   Thu, Sep 25 2025 05:03:44 PM



• ನವದೆಹಲಿ, ಸೆ. 24 (DaijiworldNews/TA): ಜಾಗತಿಕವಾಗಿ ಆರ್ಥಿಕ ಮತ್ತು ಭೌಗೋಳಿಕ ಅನಿಶ್ಚಿತತೆಗಳ ನಡುವೆಯೂ ಭಾರತ ತನ್ನ ಪ್ರಗತಿಯ ಹಾದಿಯಲ್ಲಿ ಮುನ್ನಡೆಯುತ್ತಿದೆ ಎಂದು ಪ್ರಧಾನಮಂತ್ರಿ ನರೇಂದ್ರ ಮೋದಿ ಹೇಳಿದ್ದಾರೆ. ಇಂದು ನೋಯ್ಡಾದಲ್ಲಿ ಉದ್ಘಾಟನೆಯಾದ ಉತ್ತರಪ್ರದೇಶ ಅಂತರರಾಷ್ಟ್ರೀಯ ವ್ಯಾಪಾರ ಪ್ರದರ್ಶನ ಕಾರ್ಯಕ್ರಮದಲ್ಲಿ ಮಾತನಾಡಿದ ಅವರು, ಭಾರತದ ಅಭಿವೃದ್ಧಿಗೆ ಸರ್ಕಾರ ಕೈಗೊಂಡಿರುವ ಪ್ರಮುಖ ಕ್ರಮಗಳನ್ನು ವಿವರಿಸಿದರು.

  

  “ಅನಿಶ್ಚಿತತೆಯ ಸಂದರ್ಭಗಳು ನಮ್ಮನ್ನು ಹಿಂದೆ ತೆಗೆಯುವುದಿಲ್ಲ. ಅಂಥ ಸನ್ನಿವೇಶಗಳಲ್ಲಿಯೂ ಹೊಸ ಮಾರ್ಗಗಳನ್ನು ಹುಡುಕುತ್ತೇವೆ. ಮುಂದಿನ ದಶಕಗಳ ಅಭಿವೃದ್ಧಿಗಾಗಿ ಈಗಲೇ ನಾವು ಬುನಾದಿಯನ್ನು ಗಟ್ಟಿಗೊಳಿಸುತ್ತಿದ್ದೇವೆ,” ಎಂದು ಪ್ರಧಾನಿ ಹೇಳಿದರು. ಈ ಹಿನ್ನೆಲೆಯಲ್ಲಿ ಅವರು ‘ಸ್ವಾವಲಂಬಿ ಭಾರತ್’ ನಿರ್ಮಾಣವೇ ಸರ್ಕಾರದ ಸಂಕಲ್ಪ ಮತ್ತು ಮಂತ್ರವಾಗಿದೆ ಎಂದು ಪುನರುಚ್ಛರಿಸಿದರು.

  ಮೇಕ್ ಇನ್ ಇಂಡಿಯಾ ಯೋಜನೆಯ ಮೂಲಕ ದೇಶದಲ್ಲಿಯೇ ಉತ್ಪಾದನೆಗೆ ಉತ್ತೇಜನ ನೀಡಲು ಸರ್ಕಾರ ಬದ್ಧವಾಗಿದೆ ಎಂದು ಮೋದಿ ತಿಳಿಸಿದರು. “ಭಾರತದಲ್ಲಿ ಎಲ್ಲವನ್ನೂ ತಯಾರಿಸೋಣ ಎಂಬ ಆಶಯದಿಂದ ಸರ್ಕಾರ ಪ್ರಯತ್ನಗಳನ್ನು ಮುಂದುವರಿಸುತ್ತಿದೆ,” ಎಂದ ಅವರು, ಪರನಿರ್ಭರತೆಯನ್ನು ಕಡಿಮೆ ಮಾಡುವ ಅಗತ್ಯವಿದೆ ಎಂದು ಒತ್ತಿ ಹೇಳಿದರು.

  “ಒಂದು ದೇಶ ಬೇರೆಯವರ ಮೇಲೆ ಹೆಚ್ಚು ಅವಲಂಬಿತವಾಗಿದ್ದರೆ, ಅದರ ಪ್ರಗತಿಗೆ ನಿರ್ಬಂಧಗಳು ಹುಟ್ಟುತ್ತವೆ. ಅಂಥ ಅವಲಂಬನೆ ಅಸಹಾಯಕತೆಯ ಲಕ್ಷಣ” ಎಂದು ಮೋದಿ ತಮ್ಮ ಭಾಷಣದಲ್ಲಿ ಚುರುಕುವಾಗಿ ವಿವರಿಸಿದರು.

  ನೋಯ್ಡಾದ ಈ ಇಂಟರ್‌ನ್ಯಾಷನಲ್ ಟ್ರೇಡ್ ಶೋನಲ್ಲಿ 2,500ಕ್ಕೂ ಹೆಚ್ಚು ದೇಶೀಯ ಹಾಗೂ ಅಂತಾರಾಷ್ಟ್ರೀಯ ಪ್ರದರ್ಶಕರು ಭಾಗವಹಿಸಿದ್ದು, 500ಕ್ಕೂ ಹೆಚ್ಚು ವಿದೇಶಿ ಖರೀದಿದಾರರೂ ಹಾಜರಿದ್ದಾರೆ. ಈ ಐದು ದಿನಗಳ ವಾಣಿಜ್ಯ ಮೇಳದಲ್ಲಿ ಸುಮಾರು ಐದು ಲಕ್ಷಕ್ಕೂ ಹೆಚ್ಚು ಜನರು ಪಾಲ್ಗೊಳ್ಳುವ ನಿರೀಕ್ಷೆಯಿದೆ. ರಷ್ಯಾ ಈ ಶೋನ ಪಾರ್ಟ್ನರ್ ರಾಷ್ಟ್ರವಾಗಿದ್ದು, ಭಾರತ-ರಷ್ಯಾ ದ್ವೀಪಕ್ಷीय ಸಹಕಾರದ ಬಲವನ್ನು ಮೋದಿ ಅವರು ತಮ್ಮ ಭಾಷಣದಲ್ಲಿ ಪ್ರಸ್ತಾಪಿಸಿದರು. “ಭಾರತ ಹಾಗೂ ರಷ್ಯಾದ ಸಂಬಂಧ ಬಹುಕಾಲದಿಂದ ಗಟ್ಟಿಯಾಗಿವೆ” ಎಂದು ಅವರು ಹೇಳಿದರು.

  ಯುಪಿಐಟಿಎಸ್‌ನಂತಹ ವೇದಿಕೆಗಳು, ದೇಶದ ಉತ್ಪಾದನೆ, ಕೌಶಲ್ಯ ಮತ್ತು ಆರ್ಥಿಕ ಸಾಮರ್ಥ್ಯವನ್ನು ಜಾಗತಿಕ ಮಟ್ಟದಲ್ಲಿ ತೋರಿಸುವ ಮಹತ್ತರ ಅವಕಾಶವಾಗಿವೆ ಎಂಬುದಾಗಿ ಪ್ರಧಾನಿ ಹೇಳಿದರು. ಈ ಮೂಲಕ 'ಮೇಕ್ ಇನ್ ಇಂಡಿಯಾ' ಮತ್ತು 'ವೋಕಲ್ ಫಾರ್ ಲೋಕಲ್' ಅಭಿಯಾನಗಳಿಗೆ ಮತ್ತಷ್ಟು ಬಲ ಸಿಕ್ಕಿದೆ.