'ದೆಹಲಿಯ ಪ್ರಧಾನಿ ಭವನದ ಹೊರಗೆಯೂ ಎಲ್ಲೆಡೆ ಗುಂಡಿಗಳಿವೆ' - ಡಿಕೆ ಶಿವಕುಮಾರ್

•   Tue, Sep 23 2025 11:50:48 AM



• ಬೆಂಗಳೂರು, ಸೆ. 23 (DaijiworldNews/TA): ಬೆಂಗಳೂರಿನಲ್ಲಿ ಮಾತ್ರವಲ್ಲ, ದೆಹಲಿಯ ಪ್ರಧಾನ ಮಂತ್ರಿಯವರ ನಿವಾಸದ ಹೊರಗೆಯೂ ಗುಂಡಿಗಳಿವೆ. ರಸ್ತೆ ಗುಂಡಿಗಳು ರಾಷ್ಟ್ರವ್ಯಾಪಿ ಸಮಸ್ಯೆ ಎಂದು ಡಿಸಿಎಂ ಡಿಕೆ ಶಿವಕುಮಾರ್ ಸ್ಪಷ್ಟನೆ ನೀಡಿದ್ದಾರೆ.

  

  ಬೆಂಗಳೂರು ನಗರದಲ್ಲಿ ಗುಂಡಿ ಸಮಸ್ಯೆ ಭಾರೀ ಚರ್ಚೆಗೆ ಗ್ರಾಸವಾಗಿರುವಂತೆಯೇ, ಕರ್ನಾಟಕ ಉಪಮುಖ್ಯಮಂತ್ರಿ ಮತ್ತು ನಗರಾಭಿವೃದ್ಧಿ ಸಚಿವ ಡಿ.ಕೆ. ಶಿವಕುಮಾರ್ ಸ್ಪಷ್ಟನೆ ನೀಡಿದ್ದು, "ದುಃಖವೇನೂ ಇಲ್ಲ, ಇಡೀ ದೇಶದಲ್ಲಿಯೇ ಇದು ಸಾಮಾನ್ಯ ಸಮಸ್ಯೆ. ದೆಹಲಿಯಲ್ಲೂ ಇದೆ. ನಾನು ಇತ್ತೀಚೆಗಷ್ಟೆ ದೆಹಲಿಗೆ ಹೋಗಿದ್ದೆ. ಪ್ರಧಾನ ಮಂತ್ರಿಯವರ ಮನೆ ಹೊರಗೂ ಗುಂಡಿಗಳಿವೆ. ದೆಹಲಿಯ ನಿಮ್ಮ ವರದಿಗಾರರು ಹೋಗಿ ನೋಡಲಿ" ಎಂದಿದ್ದಾರೆ.

  ಮಾಧ್ಯಮ ಪ್ರತಿನಿಧಿಗಳೊಂದಿಗೆ ಮಾತನಾಡುತ್ತಿದ್ದ ಅವರು, "ನಾವು ಈಗ ಸಹ ನಿರಂತರವಾಗಿ ಗುಂಡಿಗಳನ್ನು ಮುಚ್ಚುತ್ತಿದ್ದೇವೆ. ಪ್ರತಿದಿನ ಸುಮಾರು 1,000 ಗುಂಡಿಗಳನ್ನು ಬೆಂಗಳೂರು ಮಹಾನಗರ ಪಾಲಿಕೆ ಮುಚ್ಚುತ್ತಿದೆ. ಮಳೆ ಇದ್ದರೂ ಕೆಲಸ ನಿಲ್ಲುತ್ತಿಲ್ಲ. ಪ್ರತಿಯೊಂದು ನಿಗಮ ವ್ಯಾಪ್ತಿಯಲ್ಲೂ ಈ ಕಾರ್ಯ ನಡೆಯುತ್ತಿದೆ. ಆದರೆ ಇದನ್ನು ಕೇವಲ ಕರ್ನಾಟಕದ ಸಮಸ್ಯೆಯೆಂದು ಹೂರಣ ಮಾಡುವುದು ನ್ಯಾಯವಲ್ಲ" ಎಂದಿದ್ದಾರೆ.

  "ಬಿಜೆಪಿ ರಸ್ತೆಗಳನ್ನು ಚೆನ್ನಾಗಿ ನಿರ್ವಹಿಸಿದ್ದರೆ, ಇವತ್ತು ಈ ಸ್ಥಿತಿ ಬರದೆ ಇರಬಹುದಿತ್ತು," ಎಂಬ ಟೀಕೆ ಮಾಡಿರುವ ಡಿಕೆ ಶಿವಕುಮಾರ್, ಪೂರ್ವವತಿಯಿಂದ ಬೇಜವಾಬ್ದಾರಿಯಾಗಿದೆ ಎಂಬ ಸಂದೇಶವನ್ನು ನೀಡಿದ್ದಾರೆ. ಅವರು ತಮ್ಮ ನೇತೃತ್ವದ ಸರ್ಕಾರವು ಪ್ರಾಮಾಣಿಕವಾಗಿ ಈ ಸಮಸ್ಯೆಗೆ ಪರಿಹಾರ ಕಂಡುಹಿಡಿಯಲು ಶ್ರಮಿಸುತ್ತಿದೆ ಎಂದು ತಿಳಿಸಿದ್ದಾರೆ.

  ಬೆಂಗಳೂರು ರಸ್ತೆಗಳ ಸ್ಥಿತಿ ಕುರಿತು ಇತ್ತೀಚೆಗೆ ಕಂಪನಿಗಳಿಂದಲೂ ಕಳವಳಗಳು ವ್ಯಕ್ತವಾಗಿದ್ದವು. ಲಾಜಿಸ್ಟಿಕ್ಸ್ ಕಂಪನಿಯಾಗಿರುವ ಬ್ಲ್ಯಾಕ್‌ಬಕ್ ಸಂಸ್ಥೆಯ ಸಿಇಒ ರಾಜೇಶ್ ಯಬಾಜಿ ಅವರು ಎಕ್ಸ್‌ನಲ್ಲಿ ಪೋಸ್ಟ್ ಮಾಡಿ, ತಮ್ಮ ಆಫೀಸ್ ಸ್ಥಳಾಂತರಗೊಳ್ಳುತ್ತಿರುವುದಾಗಿ ಉಲ್ಲೇಖಿಸಿದರು. "ಒಂದು ದಿಕ್ಕಿನಲ್ಲಿ 1.5 ಗಂಟೆಗಳ ಪ್ರಯಾಣ, ಗುಂಡಿಗಳು, ಧೂಳು ಮತ್ತು ರಸ್ತೆ ನಿರ್ವಹಣೆಯ ಕೊರತೆಗಳು ಸಹೋದ್ಯೋಗಿಗಳಿಗೆ ಕಾಡುತ್ತಿವೆ. ಮುಂದಿನ 5 ವರ್ಷಗಳಲ್ಲಿ ಬದಲಾವಣೆ ಸಂಭವಿಸುವ ಸಾಧ್ಯತೆ ಕಮ್ಮಿ" ಎಂದು ಅವರು ಬರೆದಿದ್ದರು.

  ಆದರೆ ಬಳಿಕ ಸಂಸ್ಥೆ ಬೆಂಗಳೂರು ಬಿಟ್ಟು ತೆರಳುತ್ತಿಲ್ಲ ಎಂಬ ವಿಷಯವನ್ನು ಸ್ಪಷ್ಟಪಡಿಸಿತು. ಕೇವಲ ಆಫೀಸ್ ಸ್ಥಳಾಂತರವಾಗುತ್ತಿದೆ ಎಂಬುದನ್ನು ತಿಳಿಸಿದ್ದಾರೆ. ಈ ಹಿನ್ನೆಲೆಯಲ್ಲಿ, ಡಿಕೆ ಶಿವಕುಮಾರ್ ಪ್ರತಿಕ್ರಿಯೆ ನೀಡುತ್ತಾ, "ಯಾರು ಎಲ್ಲಿಗೆ ಬೇಕಾದರೂ ಹೋಗಬಹುದು, ಅದು ಅವರ ನಿರ್ಧಾರ. ಆದರೆ ಬೆಂಗಳೂರು ನೀಡುವ ಮೂಲಸೌಕರ್ಯವನ್ನು ಯಾರೂ ಎದುರಿಸಲ್ಲ. ಇಲ್ಲಿಗೆ ಬರುವ ಮುನ್ನ ಎಲ್ಲರೂ ಯೋಚಿಸುತ್ತಾರೆ. ಇಲ್ಲಿ ಏನು ಸಿಗುತ್ತದೆ, ಹೇಗಿರುತ್ತದೆ ಎಂಬುದರ ಬಗ್ಗೆ ಸ್ಪಷ್ಟ ದೃಷ್ಟಿಕೋಣ ಇರುತ್ತದೆ" ಎಂದಿದ್ದಾರೆ.

  ಬೆಂಗಳೂರು "ಇಂಡಿಯಾ ಇಂಕ್" ಕಂಪನಿಗಳ ಹೃದಯಭಾಗವಷ್ಟೇ ಅಲ್ಲ, ರಾಷ್ಟ್ರದ ಐಟಿ ರಾಜಧಾನಿಯಾಗಿರುವ ಈ ನಗರವು ಎಷ್ಟೇ ತೊಂದರೆಗಳ ನಡುವೆ ಇದ್ದರೂ ಅಭಿವೃದ್ಧಿಗೆ ಮುಂದುವರಿಯುತ್ತದೆ ಎಂಬ ವಿಶ್ವಾಸವನ್ನು ಡಿ.ಕೆ ಶಿವಕುಮಾರ್ ಮತ್ತೆ ವ್ಯಕ್ತಪಡಿಸಿದ್ದಾರೆ. ಇನ್ನು ಮುಂದೆ ರಸ್ತೆಗಳ ಗುಂಡಿಗಳನ್ನು ಮಾತ್ರವಲ್ಲದೆ, ಸಾರ್ವಜನಿಕ ಮೂಲಸೌಕರ್ಯಗಳ ಉತ್ತಮ ನಿರ್ವಹಣೆಯತ್ತ ತಮ್ಮ ಸರ್ಕಾರ ಹೆಚ್ಚು ಗಮನ ನೀಡಲಿದೆ ಎಂಬ ಬದ್ಧತೆಯನ್ನೂ ಅವರು ಪುನರುಚ್ಛರಿಸಿದ್ದಾರೆ.