ಐಎಎಸ್‌ ಮಿನ್ನು ಪಿಎಂ ಯಶಸ್ಸಿನ ಕಥನ

•   Mon, Aug 25 2025 07:42:38 AM



• ನವದೆಹಲಿ, ಆ. 25 (DaijiworldNews/TA): ಭಾರತದಲ್ಲಿ ಲಕ್ಷಾಂತರ ಜನರು ಪ್ರತಿವರ್ಷ ಯುಪಿಎಸ್‌ಸಿ ಪರೀಕ್ಷೆ ಬರೆಯುತ್ತಾರೆ. ಆದರೆ ಅವರಲ್ಲಿ ಕೆಲವೇ ಮಂದಿ ಈ ಕಠಿಣ ಪರೀಕ್ಷೆಯಲ್ಲಿ ಯಶಸ್ಸು ಕಾಣುತ್ತಾರೆ. ಅವರಲ್ಲಿ ಒಬ್ಬರು ಕೇರಳದ ಮಿನ್ನು ಪಿಎಂ ಜೋಶಿ. ತಮ್ಮ ಜೀವನದ ಸಂಕಷ್ಟಗಳನ್ನು ಮೀರಿ ತಾವು ಹೊಂದಿದ್ದ ಕನಸನ್ನು ಸಾಕಾರಗೊಳಿಸಿ ಲಕ್ಷಾಂತರ ಆಕಾಂಕ್ಷಿಗಳಿಗೆ ಪ್ರೇರಣೆ ಆಗಿದ್ದಾರೆ.

  

  ಮಿನ್ನು ಪಿಎಂ ಜೋಶಿ ಅವರ ತಂದೆ ರಾಜ್ಯ ಪೊಲೀಸ್ ಇಲಾಖೆಯ ಅಧಿಕಾರಿಯಾಗಿದ್ದರು. ಆದರೆ ಕರ್ತವ್ಯದಲ್ಲಿದ್ದಾಗ ಅವರು ನಿಧನರಾದರು. ತಂದೆಯು ಜೀವಿತಾವಧಿಯಲ್ಲಿ ತಮ್ಮ ಮಗಳು ಒಮ್ಮೆ ಐಎಎಸ್ ಅಧಿಕಾರಿಯಾಗಬೇಕು ಎಂಬ ಆಸೆ ಇಟ್ಟಿದ್ದರು. ಆ ಆಸೆ ಮಿನ್ನುವಿಗೆ ಜೀವನದ ದಿಕ್ಕು ತೋರಿಸುವ ಧ್ಯೇಯವಾಯಿತು. ತಂದೆಯ ನಿಧನದ ನಂತರ, ಕರುಣಾಜನಕ ನಿಯಮದಡಿ ಅವರು ಕೇರಳ ಪೊಲೀಸ್ ಇಲಾಖೆಯಲ್ಲಿ ಗುಮಾಸ್ತಳಾಗಿ ತಮ್ಮ ವೃತ್ತಿಜೀವನ ಆರಂಭಿಸಿದರು. ಅದೇ ಸಮಯದಲ್ಲಿ ಅವರು ಜೈವಿಕ ರಸಾಯನಶಾಸ್ತ್ರದಲ್ಲಿ ಸ್ನಾತಕೋತ್ತರ ಪದವಿ ಪಡೆದು ರಾಜ್ಯದಲ್ಲೇ ಎರಡನೇ ರ‍್ಯಾಂಕ್ ಗಳಿಸಿದ್ದರು.

  ತಮ್ಮ ತಂದೆಯ ಕನಸನ್ನು ನನಸುಗೊಳಿಸಲು ಮಿನ್ನು ಯುಪಿಎಸ್‌ಸಿ ಪರೀಕ್ಷೆಗೆ ತಯಾರಾಗಲು ನಿರ್ಧರಿಸಿದರು. ಆದರೆ ಈ ಪಯಣ ಸುಲಭವಾಗಿರಲಿಲ್ಲ. ಮಿನ್ನು ಆಗಲೇ ವಿವಾಹಿತರಾಗಿದ್ದು, ಪತಿಯು ಇಸ್ರೋ ವಿಜ್ಞಾನಿಯಾಗಿದ್ದರು, ಮಗುವೂ ಅವರ ಜೊತೆಗಿತ್ತು. ಕೆಲಸ, ತಾಯ್ತನ ಮತ್ತು ಸಮಾಜದ ನಿರೀಕ್ಷೆಗಳ ನಡುವೆ ಮಿನ್ನು ಯುಪಿಎಸ್‌ಸಿ ಪಯಣ ಆರಂಭಿಸಿದರು. ಈ ಪ್ರಯಾಣ ಐದು ವರ್ಷಗಳವರೆಗೆ ಸಾಗಿದರೂ, ಅವರು ಐದು ಬಾರಿ ವಿಫಲರಾದರೂ ದಿಕ್ಕು ತಪ್ಪಲಿಲ್ಲ.

  2020ರ ಯುಪಿಎಸ್‌ಸಿ ಪರೀಕ್ಷೆಯಲ್ಲಿ, ಮಿನ್ನು ಎಐಆರ್ 150 ರ‍್ಯಾಂಕ್‌ ಪಡೆದರು. ಇದು ಕೇವಲ ಅವರ ಶ್ರಮದ ಫಲವಷ್ಟೇ ಅಲ್ಲ, ಅದು ಆತ್ಮವಿಶ್ವಾಸ ಮತ್ತು ನಿರಂತರ ಪ್ರಯತ್ನದ ಪ್ರತೀಕವಾಗಿತ್ತು. ಯಾವುದೇ ತರಬೇತಿ ಕೇಂದ್ರ ಅಥವಾ ಕೋಚಿಂಗ್ ಇಲ್ಲದೇ, ತಮ್ಮದೇ ಆದ ತರಬೇತಿ ವಿಧಾನ, ಸಮಯದ ನಿರ್ವಹಣೆ ಮತ್ತು ಅಭ್ಯಾಸದ ಮೂಲಕ ಅವರು ಈ ಸಾಧನೆ ಗಳಿಸಿದರು. ವಿಶೇಷವೆಂದರೆ ಅವರು ತಯಾರಿಯನ್ನು ಮಗನನ್ನು ಬೆಳೆಸುತ್ತಾ, ಕುಟುಂಬವನ್ನು ನಿರ್ವಹಿಸುತ್ತಾ ಮುಂದುವರೆಸಿದ್ದರು.

  ಮಿನ್ನುವಿನ ಯಶೋಗಾಥೆಯು ಸಮಾಜದಲ್ಲಿ ಮಹಿಳೆಯರು ಎದುರಿಸುವ ಅಸಂಖ್ಯಾತ ಬಿಕ್ಕಟ್ಟಿನ ನಡುವೆಯೂ ಧೈರ್ಯದಿಂದ ಮುಂದೆ ಸಾಗುವ ಮಹಿಳೆಯ ಉದಾಹರಣೆಯಾಗಿದೆ. ಮಿನ್ನು ಪಿಎಂ ಜೋಶಿಯ ಪಯಣವು ಕನಸು ಕಾಣುವ ಎಲ್ಲರಿಗೆ ಸ್ಪಷ್ಟ ಸಂದೇಶವೊಂದನ್ನು ನೀಡುತ್ತದೆ. ನಿಮ್ಮ ಕನಸು ಸಾಕಾರಗೊಳ್ಳುವುದು ಸಾಧ್ಯ, ಅಷ್ಟು ಮಾತ್ರವಲ್ಲ, ಅದು ನಿಮ್ಮ ಮೂಲಕ ಇತರರ ಕನಸಿಗೂ ಬೆಳಕು ನೀಡಬಹುದು.