ಮಂಗಳೂರು: ಎಂಆರ್ ಪಿಎಲ್ ಸ್ಪೋಟದಲ್ಲಿ ಮೃತಪಟ್ಟ ಮನೀಶ್ ಕರ್ಕಡ ಕುಟುಂಬಕ್ಕೆ 1 ಕೋಟಿ 20 ಲಕ್ಷ ರೂ. ಪರಿಹಾರ ಘೋಷಣೆ

•   Thu, Oct 01 2026 05:09:14 PM



• ಮಂಗಳೂರು, ಅ.01 (DaijiworldNews/AK):ಎಂಆರ್‌ಪಿಎಲ್‌ನಲ್ಲಿ   ಬುಧವಾರ ನಡೆದ ಭೀಕರ ಕೋಕರ್ ಹೈಡ್ರೋಟ್ರೀಟರ್ ಘಟಕದ (CHTU) ಅಗ್ನಿ ಅವಘಡದಲ್ಲಿ ಮೃತಪಟ್ಟ ಮನೀಶ್ ಕರ್ಕಡ ಅವರ ಕುಟುಂಬಕ್ಕೆ ಮಂಗಳೂರು ರಿಫೈನರಿ ಮತ್ತು ಪೆಟ್ರೋಕೆಮಿಕಲ್ಸ್ ಲಿಮಿಟೆಡ್ (MRPL) ಆಡಳಿತ ಮಂಡಳಿಯು ಸುಮಾರು 1.20 ಕೋಟಿ ರೂಪಾಯಿಗಳ ಪರಿಹಾರ ಮತ್ತು ವಿಮಾ ಯೋಜನೆಯನ್ನು ಘೋಷಿಸಿದೆ.

  ಜೀವಹಾನಿಯ ಬಗ್ಗೆ ತೀವ್ರ ದುಃಖ ವ್ಯಕ್ತಪಡಿಸಿದ ಕಂಪನಿಯು, ಅಮೂಲ್ಯ ಜೀವದ ನಷ್ಟವನ್ನು ಸರಿದೂಗಿಸಲು ಯಾವುದೇ ಆರ್ಥಿಕ ಸಹಾಯವಿಲ್ಲವಾದರೂ, ದುಃಖಿತ ಕುಟುಂಬದೊಂದಿಗೆ ಒಗ್ಗಟ್ಟಿನಿಂದ ನಿಲ್ಲುತ್ತದೆ ಎಂದು ಹೇಳಿದೆ.

  MRPL ಕುಟುಂಬಕ್ಕೆ 90 ಲಕ್ಷ ರೂ.ಗಳ ನೇರ ಆರ್ಥಿಕ ಸಹಾಯವನ್ನು ನೀಡುತ್ತದೆ. ಹೆಚ್ಚುವರಿಯಾಗಿ, ಅವರ ಗ್ರೂಪ್‌ ಅವಧಿ ಜೀವ ವಿಮೆ (GTLI) ಅಡಿಯಲ್ಲಿ ಸುಮಾರು 10 ಲಕ್ಷ ರೂ.ಗಳನ್ನು ಮತ್ತು ಕಾರ್ಮಿಕರ ಪರಿಹಾರ ನೀತಿ (WCP) ಅಡಿಯಲ್ಲಿ 20 ಲಕ್ಷ ರೂ. ಒಟ್ಟಾರೆ ಸುಮಾರು 1.20 ಕೋಟಿ ರೂ.ಗಳಿಗೆ ಮನೀಶ್‌ ಕುಟುಂಬಕ್ಕೆ ಪರಿಹಾರವು ಸಿಗಲಿದೆ.

  ಇದಲ್ಲದೆ, MRPL ತನ್ನ ದ್ವಿತೀಯ ಕಾರ್ಯಪಡೆಯ ಕಲ್ಯಾಣವನ್ನು ಗಮನದಲ್ಲಿಟ್ಟುಕೊಂಡು, ಮೆಡಿಕ್ಲೈಮ್ ವಿಮೆಯ ಪ್ರಸ್ತಾವನೆಯನ್ನು ಪ್ರಸ್ತುತ ರಚಿಸಲಾಗುತ್ತಿದೆ ಮತ್ತು ಚರ್ಚೆಯಲ್ಲಿದೆ ಎಂದು ಹೇಳಿದೆ. ದಕ್ಷಿಣ ಕನ್ನಡ ಸಂಸದರು ಮತ್ತು ಜಿಲ್ಲಾಧಿಕಾರಿಗಳೊಂದಿಗೆ ಸಮಾಲೋಚಿಸಿದ ನಂತರ ಈ ಪ್ರಸ್ತಾವನೆಯನ್ನು ಅಂತಿಮಗೊಳಿಸಲಾಗುತ್ತದೆ. ಈ ಮೆಡಿಕ್ಲೈಮ್ ವ್ಯವಸ್ಥೆಗೆ ಸಂಬಂಧಿಸಿದ ಪ್ರಕ್ರಿಯೆಯನ್ನು ನಾಲ್ಕು ವಾರಗಳಲ್ಲಿ ಪೂರ್ಣಗೊಳಿಸುವ ನಿರೀಕ್ಷೆಯಿದೆ.

  ಮುಖ್ಯ ಪ್ರಧಾನ ವ್ಯವಸ್ಥಾಪಕರು (ಕಾರ್ಪೊರೇಟ್ ಬ್ರ್ಯಾಂಡಿಂಗ್ ಮತ್ತು ಕಾರ್ಪೊರೇಟ್ ಸಂವಹನ) ಡಾ. ರುಡಾಲ್ಫ್ ವಿಜೆ ನೊರೊನ್ಹಾ ಅವರು ಆಡಳಿತ ಮಂಡಳಿಯ ಪರವಾಗಿ ಸಂತಾಪ ಸೂಚಿಸಿದರು ಮತ್ತು ತನ್ನ ಕಾರ್ಯಾಚರಣೆಗಳಿಗೆ ಸಂಬಂಧಿಸಿದ ಎಲ್ಲಾ ಸಿಬ್ಬಂದಿಗಳ ಸುರಕ್ಷತೆ, ಆರೋಗ್ಯ ಮತ್ತು ಕಲ್ಯಾಣಕ್ಕೆ ಎಂಆರ್‌ಪಿಎಲ್‌ನ ಬದ್ಧತೆಯ ಕುರಿತು ಪುನರುಚ್ಚರಿಸಿದ್ದಾರೆ.