ಮಂಗಳೂರು: ಮಿಲಾಗ್ರಿಸ್ ಚರ್ಚ್‌ನಲ್ಲಿ ಸಂಭ್ರಮದ ಮೊಂತಿ ಹಬ್ಬ ಆಚರಣೆ

•   Tue, Sep 08 2026 04:03:37 PM



• ಮಂಗಳೂರು, ಸೆ. 08 (DaijiworldNews/AA): ಮಂಗಳೂರಿನ ಮಿಲಾಗ್ರಿಸ್‌ನ ಅವರ್ ಲೇಡಿ ಆಫ್ ಮಿರಾಕಲ್ಸ್ ಚರ್ಚ್‌ನಲ್ಲಿ ಪವಿತ್ರ ಕನ್ಯಾಮರಿಯಮ್ಮನ ಜನ್ಮದಿನದ ಹಬ್ಬವಾದ ಮೊಂತಿ ಹಬ್ಬವನ್ನು ಮಂಗಳವಾರ ಭಕ್ತಿಭಾವ ಮತ್ತು ಸಂಭ್ರಮದಿಂದ ಆಚರಿಸಲಾಯಿತು.

  ಹಬ್ಬದ ಅಂಗವಾಗಿ ಒಂಬತ್ತು ದಿನಗಳ ನೊವೆನಾ ಪ್ರಾರ್ಥನೆಯೊಂದಿಗೆ ಸಿದ್ಧತೆಗಳನ್ನು ಕೈಗೊಳ್ಳಲಾಗಿತ್ತು. ನೊವೆನಾ ಸಂದರ್ಭದಲ್ಲಿ ಮಕ್ಕಳು ಸೇರಿದಂತೆ ವಿವಿಧ ಭಕ್ತರು ಭಕ್ತಿಯಿಂದ ಶಿಶು ಮರಿಯಮ್ಮನಿಗೆ ಹೂವುಗಳನ್ನು ಅರ್ಪಿಸಿದರು.

  ಹಬ್ಬದ ದಿನದಂದು ಮಂಗಳೂರು ಮಿಲಾಗ್ರಿಸ್ ಚರ್ಚ್‌ನಲ್ಲಿ ಭಕ್ತಿಭಾವದಿಂದ ವಿಶೇಷ ಬಲಿಪೂಜೆ ನೆರವೇರಿಸಲಾಯಿತು. ರೆವರೆಂಡ್ ಫಾದರ್ ಐವನ್ ಮೈಕಲ್ ರೋಡ್ರಿಗಸ್ ಅವರು ಪ್ರಧಾನವಾಗಿ ಬಲಿಪೂಜೆಯನ್ನು ನೆರವೇರಿಸಿದರು. ಫಾದರ್ ಆಲ್ವಿನ್ ಸೆರಾವ್, ಫಾದರ್ ಜೋಸೆಫ್ ಉದಯ್ ಫೆರ್ನಾಂಡಿಸ್, ಫಾದರ್ ಅವಿತ್ ಪಾಯಸ್ ಹಾಗೂ ಫಾದರ್ ಜೆರಾಲ್ಡ್ ಪಿಂಟೋ ಅವರು ಸಹಕರಿಸಿದರು. ಈ ಹಬ್ಬದಲ್ಲಿ ಹೆಚ್ಚಿನ ಸಂಖ್ಯೆಯ ಭಕ್ತರು ಪಾಲ್ಗೊಂಡಿದ್ದರು.

  ಹೊಸದಾಗಿ ಕೊಯ್ಲು ಮಾಡಿದ ಭತ್ತವನ್ನು ಆಶೀರ್ವದಿಸಿ ಭಕ್ತರಿಗೆ ವಿತರಿಸಲಾಯಿತು. ದೇವರು ನೀಡಿದ ಆಶೀರ್ವಾದ ಮತ್ತು ಉತ್ತಮ ಫಸಲಿಗಾಗಿ ಕೃತಜ್ಞತೆ ಸಲ್ಲಿಸುವ ಸಂಕೇತವಾಗಿ ಈ ಸಂಪ್ರದಾಯವನ್ನು ನೆರವೇರಿಸಲಾಯಿತು.

  ಮೊಂತಿ ಹಬ್ಬವು ಕೊಂಕಣಿ ಕ್ಯಾಥೋಲಿಕ್ ಸಮುದಾಯದ ಶ್ರೀಮಂತ ಸಾಂಸ್ಕೃತಿಕ ಮತ್ತು ಕೌಟುಂಬಿಕ ಪರಂಪರೆಯನ್ನೂ ಎತ್ತಿ ತೋರಿಸಿತು. ಕುಟುಂಬಗಳು ಒಟ್ಟಾಗಿ ಸೇರಿ ಸ್ಥಳೀಯವಾಗಿ ಲಭ್ಯವಿರುವ ವಿವಿಧ ತರಕಾರಿಗಳಿಂದ ಸಿದ್ಧಪಡಿಸಿದ ಸಾಂಪ್ರದಾಯಿಕ ಸಸ್ಯಾಹಾರಿ ಹಬ್ಬದ ಊಟವನ್ನು ಹಂಚಿಕೊಂಡರು. ಮಕ್ಕಳು, ಕುಟುಂಬಗಳು, ಚರ್ಚ್ನ ವಿವಿಧ ಸಂಘ-ಸಂಸ್ಥೆಗಳು ಹಾಗೂ ಭಕ್ತರ ಸಕ್ರಿಯ ಪಾಲ್ಗೊಳ್ಳುವಿಕೆ ಹಬ್ಬಕ್ಕೆ ಹೆಚ್ಚಿನ ಮೆರುಗು ಮತ್ತು ಉತ್ಸಾಹವನ್ನು ನೀಡಿತು.

  ಕೊನೆಯಲ್ಲಿ ದೇವರಿಗೆ ಕೃತಜ್ಞತೆ ಸಲ್ಲಿಸಿ, ಮಿಲಾಗ್ರಿಸ್ ಪ್ಯಾರಿಷ್‌ನ ಎಲ್ಲಾ ಕುಟುಂಬಗಳ ಮೇಲೆ ಪವಿತ್ರ ಕನ್ಯಾಮರಿಯಮ್ಮನ ನಿರಂತರ ಆಶೀರ್ವಾದ ಮತ್ತು ರಕ್ಷಣೆ ಇರಲಿ ಎಂದು ಪ್ರಾರ್ಥಿಸುವ ಮೂಲಕ ಮೊಂತಿ ಹಬ್ಬ ಆಚರಣೆಯನ್ನು ಸಮಾಪ್ತಿಗೊಂಡಿತು.