ಮಂಗಳೂರು: ಮುಂಗಾರು ಮಳೆಗೆ ಸಿದ್ಧತೆ; ಕೆತ್ತಿಕಲ್ ಭೂಕುಸಿತದ ಭೀತಿಯಲ್ಲಿ ಸ್ಥಳೀಯರು

•   Wed, May 20 2026 02:05:37 PM



• ಮಂಗಳೂರು, ಮೇ. 20 (DaijiworldNews/AA): ಕರಾವಳಿ ಭಾಗದಲ್ಲಿ ಮುಂಗಾರು ಮಳೆ ಸಮೀಪಿಸುತ್ತಿದ್ದಂತೆ, ಮಂಗಳೂರಿನ ಹಲವು ಭಾಗಗಳ ನಿವಾಸಿಗಳು ಪ್ರವಾಹ ಮತ್ತು ಭೂಕುಸಿತದ ಭೀತಿ ಇರುವ ಪ್ರದೇಶಗಳಲ್ಲಿ ತಕ್ಷಣ ಮುನ್ನೆಚ್ಚರಿಕೆ ಕ್ರಮಗಳನ್ನು ಕೈಗೊಳ್ಳುವಂತೆ ಅಧಿಕಾರಿಗಳನ್ನು ಒತ್ತಾಯಿಸುತ್ತಿದ್ದಾರೆ. ಕಳೆದ ವರ್ಷಗಳಲ್ಲಿ ಉಂಟಾಗಿದ್ದ ಅನಾಹುತಗಳು ಮತ್ತು ಸಂಕಷ್ಟಗಳು ಈ ಬಾರಿಯೂ ಮರುಕಳಿಸದಂತೆ ತಡೆಯಲು ಸಾರ್ವಜನಿಕರು ಒತ್ತಾಯಿಸಿದ್ದಾರೆ.

  ಪ್ರತಿ ವರ್ಷ ಭಾರಿ ಮಳೆಯಿಂದಾಗಿ ನಗರದ ತಗ್ಗು ಪ್ರದೇಶಗಳಲ್ಲಿ ನೀರು ನಿಲ್ಲುವಿಕೆ (ಜಲಾವೃತ) ಉಂಟಾಗಿ, ಸಂಚಾರ ಮತ್ತು ದೈನಂದಿನ ಜೀವನಕ್ಕೆ ತೊಂದರೆಯಾಗುತ್ತದೆ. ದಕ್ಷಿಣ ಕನ್ನಡದ ಗುಡ್ಡಗಾಡು ಪ್ರದೇಶಗಳಲ್ಲಿ ಭೂಕುಸಿತ ಮತ್ತು ಮಣ್ಣಿನ ಸವೆತವು ಮನೆಗಳು, ರಸ್ತೆಗಳು ಮತ್ತು ಸಾರ್ವಜನಿಕರ ಸುರಕ್ಷತೆಯ ಬಗ್ಗೆ ಗಂಭೀರ ಭೀತಿ ಎದುರಾಗಿದೆ. ಕಳೆದ ವರ್ಷ ಸುರಿದ ನಿರಂತರ ಮಳೆಯು ಹಲವು ಭಾಗಗಳಲ್ಲಿ ಪ್ರವಾಹ, ರಸ್ತೆ ತಡೆ ಮತ್ತು ಆಸ್ತಿಪಾಸ್ತಿ ನಷ್ಟಕ್ಕೆ ಕಾರಣವಾಗಿತ್ತು.

  ರಾಷ್ಟ್ರೀಯ ಹೆದ್ದಾರಿ 169 ರ ಉದ್ದಕ್ಕೂ ಇರುವ ವಾಮಂಜೂರು ಸಮೀಪದ ಕೆತ್ತಿಕಲ್ ಪ್ರದೇಶವು ಇಂತಹದ್ದೇ ಒಂದು ಅಪಾಯಕಾರಿ ಸ್ಥಳವಾಗಿದ್ದು, ಮುಂಬರುವ ಮಳೆಗಾಲದಲ್ಲಿ ಇಲ್ಲಿ ಭೂಕುಸಿತ ಸಂಭವಿಸಬಹುದಾದ ಹೊಸ ಆತಂಕಗಳು ಎದುರಾಗಿವೆ. ಹೆದ್ದಾರಿ ವಿಸ್ತರಣೆ ಯೋಜನೆಯ ಭಾಗವಾಗಿ ಕೆತ್ತಿಕಲ್‌ನಲ್ಲಿ ಗುಡ್ಡವನ್ನು ಕತ್ತರಿಸಲಾಗಿತ್ತು. ಈ ಪ್ರದೇಶವು ಕಳೆದ ಎರಡು ಮುಂಗಾರು ಅವಧಿಯಲ್ಲೂ ಭೂಕುಸಿತಕ್ಕೆ ಸಾಕ್ಷಿಯಾಗಿತ್ತು.

  ಇಲ್ಲಿನ ಶಾಲೆಯೊಂದರ ಸುಮಾರು 100 ಮೀಟರ್ ಮುಂಭಾಗದಲ್ಲಿ ಕಳೆದ ವರ್ಷದ ಮಳೆಗೆ ಗುಡ್ಡದ ಒಂದು ಭಾಗ ಕುಸಿದಿತ್ತು. ದೊಡ್ಡ ಬಂಡೆಗಳು ಮತ್ತು ಮಣ್ಣು ರಸ್ತೆಗೆ ಉರುಳಿ ಬಿದ್ದು ಸಂಚಾರಕ್ಕೆ ಅಡ್ಡಿಯಾಗಿತ್ತು ಮತ್ತು ವಾಹನ ಸವಾರರಿಗೆ ಅಪಾಯವನ್ನು ಉಂಟುಮಾಡಿತ್ತು. ರಸ್ತೆಗೆ ಬಿದ್ದಿದ್ದ ಮಣ್ಣನ್ನು ತೆರವುಗೊಳಿಸಲಾಗಿದ್ದರೂ, ಭೂಕುಸಿತ ಸಂಭವಿಸಿದ ಸ್ಥಳದಲ್ಲಿ ಶಾಶ್ವತ ದುರಸ್ತಿ ಕಾಮಗಾರಿ ಇನ್ನೂ ಸಂಪೂರ್ಣವಾಗಿ ಮುಗಿದಿಲ್ಲ ಎಂದು ಸ್ಥಳೀಯ ನಿವಾಸಿಗಳು ತಿಳಿಸಿದ್ದಾರೆ.

  ಪ್ರಸ್ತುತ ಗುಡ್ಡದ ಮೇಲ್ಭಾಗದಲ್ಲಿ ಬಿರುಕುಗಳು ಕಾಣಿಸಿಕೊಂಡಿದ್ದು, ಹಲವಾರು ಮರಗಳು ಅಪಾಯಕಾರಿಯಾಗಿ ವಾಲಿ ನಿಂತಿವೆ. ಇದರಿಂದಾಗಿ ಮಳೆ ತೀವ್ರಗೊಂಡರೆ ಮತ್ತೊಮ್ಮೆ ಭೂಕುಸಿತ ಸಂಭವಿಸಬಹುದು ಎಂಬ ಆತಂಕ ಸೃಷ್ಟಿಯಾಗಿದೆ. ಈ ಹಿಂದೆ ಮಣ್ಣು ಗಟ್ಟಿಗೊಳಿಸಲು ಮಾಡಲಾಗಿದ್ದ 'ಸಾಯಿಲ್ ನೇಲಿಂಗ್' ಕಾಮಗಾರಿಯೂ ಸಹ ಗುಡ್ಡ ಕುಸಿಯುವುದನ್ನು ತಡೆಯಲು ವಿಫಲವಾಗಿತ್ತು ಎಂದು ನಿವಾಸಿಗಳು ಹೇಳಿದ್ದಾರೆ.

  ಅಧಿಕಾರಿಗಳು ಗುಡ್ಡದ ಇಳಿಜಾರನ್ನು ಗಟ್ಟಿಗೊಳಿಸಲು ಅದರ ಒಂದು ಭಾಗದಲ್ಲಿ ಗೇಬಿಯನ್ ಗೋಡೆ ನಿರ್ಮಿಸಲು ಪ್ರಾರಂಭಿಸಿದ್ದಾರೆ. ಮಣ್ಣಿನ ಸವೆತವನ್ನು ತಡೆಯಲು ಕಬ್ಬಿಣದ ಜಾಲರಿಯಲ್ಲಿ ತುಂಬಿದ ಕಲ್ಲುಗಳನ್ನು ಅಪಾಯಕಾರಿ ಪ್ರದೇಶದಲ್ಲಿ ಇರಿಸಲಾಗುತ್ತಿದೆ. ಮಳೆಗಾಲದ ತೀವ್ರತೆ ಆರಂಭವಾಗುವ ಮೊದಲು ಈ ಕಾಮಗಾರಿ ಪೂರ್ಣಗೊಳ್ಳದೇ ಇರಬಹುದು ಎಂದು ಸ್ಥಳೀಯರು ಆತಂಕ ವ್ಯಕ್ತಪಡಿಸಿದ್ದಾರೆ.

  ಜಿಲ್ಲಾಡಳಿತವು ದಕ್ಷಿಣ ಕನ್ನಡ ಜಿಲ್ಲೆಯಾದ್ಯಂತ 92 ಪ್ರವಾಹ ಪೀಡಿತ ಮತ್ತು ೮೮ ಭೂಕುಸಿತ ಪೀಡಿತ ಪ್ರದೇಶಗಳನ್ನು ಗುರುತಿಸಿದೆ. ಈ ಹಿಂದೆ ಹಾನಿಗೊಳಗಾದ ಸ್ಥಳಗಳನ್ನು ಪರಿಶೀಲಿಸಲು ಮತ್ತು ಚರಂಡಿಗಳ ಹೂಳು ತೆಗೆಯುವುದು, ಇಳಿಜಾರು ಸಂರಕ್ಷಣೆ ಮತ್ತು ತುರ್ತು ಸ್ಪಂದನಾ ಯೋಜನೆಗಳಂತಹ ತಡೆಗಟ್ಟುವ ಕ್ರಮಗಳನ್ನು ಕೈಗೊಳ್ಳಲು ಅಧಿಕಾರಿಗಳಿಗೆ ಸೂಚನೆ ನೀಡಲಾಗಿದೆ ಎಂದು ವರದಿಯಾಗಿದೆ.

  ಮಳೆಗಾಲದಲ್ಲಿ ಸಾರ್ವಜನಿಕರು, ವಾಹನಗಳು ಮತ್ತು ಆಸ್ತಿಪಾಸ್ತಿಗಳ ಸುರಕ್ಷತೆಯನ್ನು ಖಚಿತಪಡಿಸಿಕೊಳ್ಳಲು ಮಳೆ ಪ್ರಾರಂಭವಾಗುವ ಮೊದಲೇ ತಡೆಗಟ್ಟುವ ಕಾಮಗಾರಿಗಳನ್ನು ತ್ವರಿತವಾಗಿ ಪೂರ್ಣಗೊಳಿಸಬೇಕು ಎಂದು ಗುಡ್ಡದ ಇಳಿಜಾರು, ತೊರೆಗಳು ಮತ್ತು ತಗ್ಗು ಪ್ರದೇಶಗಳ ಬಳಿ ವಾಸಿಸುವ ನಿವಾಸಿಗಳು ಮನವಿ ಮಾಡಿದ್ದಾರೆ.