ಹಾವಿನ ದೇಹದಲ್ಲಿ ಚಿನ್ನದ ಉಂಗುರ! - ಕಾಸರಗೋಡಿನಲ್ಲಿ ವಿಚಿತ್ರ ಘಟನೆ

•   Tue, May 05 2026 02:07:54 PM



• ಕಾಸರಗೋಡು, ಮೇ. 05 (DaijiworldNews/TA): ದೈನಂದಿನ ಜೀವನದಲ್ಲಿ ಎಷ್ಟೇ ಜಾಗರೂಕರಾಗಿದ್ದರೂ, ಕೆಲವೊಮ್ಮೆ ಪ್ರಕೃತಿ ಅನಿರೀಕ್ಷಿತ ಅಚ್ಚರಿಗಳನ್ನು ನೀಡುತ್ತದೆ. ಅಂತಹದೇ ಒಂದು ವಿಚಿತ್ರ ಹಾಗೂ ಮೈನವಿರೇಳಿಸುವ ಘಟನೆ ಅಡೂರ್ ನಿವಾಸಿ ರವಿ ಅವರ ಮನೆಯಲ್ಲಿ ಘಟನೆ ಬೆಳಕಿಗೆ ಬಂದಿದೆ.

  

  ಅಂದು ಮಕ್ಕಳು ಮನೆಯೊಳಗೆ ಆಟವಾಡುತ್ತಾ ಟೇಬಲ್‌ನ ಡ್ರಾಯರ್ ಅನ್ನು ತೆರೆಯಲು ಯತ್ನಿಸಿದ್ದಾರೆ. ಈ ವೇಳೆ ಡ್ರಾಯರ್ ಒಳಗಿನ ದೃಶ್ಯ ನೋಡಿ ಅವರು ಬೆಚ್ಚಿಬಿದ್ದಿದ್ದಾರೆ. ಅದರೊಳಗೆ ಸುರುಳಿ ಸುತ್ತಿಕೊಂಡು ಕೇರೆ ಹಾವು ಕುಳಿತಿತ್ತು. ಆದರೆ, ಹಾವಿನ ಉಪಸ್ಥಿತಿಗಿಂತಲೂ ಹೆಚ್ಚು ಆಶ್ಚರ್ಯ ಮೂಡಿಸಿದ ಸಂಗತಿ ಎಂದರೆ, ಹಾವಿನ ದೇಹಕ್ಕೆ ಬಿಗಿಯಾಗಿ ಸಿಲುಕಿಕೊಂಡಿದ್ದ ಚಿನ್ನದ ಉಂಗುರ. ಡ್ರಾಯರ್‌ನಲ್ಲಿದ್ದ ಉಂಗುರವು ಹಾವಿನ ದೇಹದ ಮಧ್ಯಭಾಗದಲ್ಲಿ ಸಿಕ್ಕಿಹಾಕಿಕೊಂಡಿದ್ದು, ಅದರ ಚಲನೆಗೂ ಅಡ್ಡಿಯಾಗುತ್ತಿತ್ತು.

  ಹಾವು ಆಹಾರಕ್ಕಾಗಿ ಹುಡುಕುತ್ತಾ ಡ್ರಾಯರ್‌ನ ಸಣ್ಣ ಬಿಡುವಿನಿಂದ ಒಳನುಗ್ಗುವಾಗ ಈ ಘಟನೆ ಸಂಭವಿಸಿರಬಹುದು ಎಂದು ಶಂಕಿಸಲಾಗಿದೆ. ಅದೃಷ್ಟವಶಾತ್, ಮಕ್ಕಳು ಹಾವನ್ನು ಮುಟ್ಟಲು ಹೋಗದ ಕಾರಣ ಯಾವುದೇ ಅಪಾಯ ಸಂಭವಿಸಿಲ್ಲ. ವಿಷಯ ತಿಳಿದ ಕೂಡಲೇ ಅರಣ್ಯ ಇಲಾಖೆಯ ರಕ್ಷಣಾ ಸಿಬ್ಬಂದಿ ಸ್ಥಳಕ್ಕೆ ಆಗಮಿಸಿದರು. ಅವರು ಅತ್ಯಂತ ಜಾಗರೂಕತೆಯಿಂದ ಹಾವನ್ನು ಡ್ರಾಯರ್‌ನಿಂದ ಹೊರತೆಗೆದು, ಹಾವಿಗೆ ಯಾವುದೇ ಹಾನಿಯಾಗದಂತೆ ಚಿನ್ನದ ಉಂಗುರವನ್ನು ಕತ್ತರಿಸಿ ತೆಗೆಯುವಲ್ಲಿ ಯಶಸ್ವಿಯಾದರು.

  ನಂತರ ಹಾವನ್ನು ಸುರಕ್ಷಿತವಾಗಿ ಅದರ ಕಾಡಿಗೆ ಬಿಡಲಾಯಿತು. ಈ ಘಟನೆ ಸ್ಥಳೀಯರಲ್ಲಿ ಆಶ್ಚರ್ಯ ಮೂಡಿಸಿದ್ದು, ಮನೆಯೊಳಗಿನ ವಸ್ತುಗಳನ್ನು ಬಳಸುವಾಗ ಎಚ್ಚರಿಕೆ ವಹಿಸುವ ಅಗತ್ಯವನ್ನೂ ಮತ್ತೊಮ್ಮೆ ನೆನಪಿಸಿದೆ.