ಕಾಸರಗೋಡು: ಕಚ್ಚಾ ವಸ್ತುಗಳ ಬೆಲೆ ಏರಿಕೆ; ಗಗನಕ್ಕೇರಿದ ತಂಪು ಪಾನೀಯಗಳ ದರ

•   Sun, Apr 05 2026 08:51:11 PM



• ಕಾಸರಗೋಡು, ಏ. 05 (DaijiworldNews/AA): ಕಳೆದ ಕೆಲವು ತಿಂಗಳುಗಳಿಂದ ಕಚ್ಚಾ ವಸ್ತುಗಳ ಬೆಲೆಯಲ್ಲಿ ಭಾರಿ ಏರಿಕೆಯಾಗಿರುವ ಹಿನ್ನೆಲೆಯಲ್ಲಿ, ಸೋಡಾ ಸೇರಿದಂತೆ ವಿವಿಧ ತಂಪು ಪಾನೀಯಗಳ ಬೆಲೆಯನ್ನು ಹೆಚ್ಚಿಸಲು ಉತ್ಪಾದಕರು ನಿರ್ಧರಿಸಿದ್ದಾರೆ. ಈ ಕುರಿತು 'ಕೇರಳ ಸೋಡಾ ಮತ್ತು ಕೋಲ್ಡ್ ಬೆವರೇಜಸ್ ಮ್ಯಾನುಫ್ಯಾಕ್ಚರರ್ಸ್ ಅಸೋಸಿಯೇಷನ್'ನ ಕಾಸರಗೋಡು ಜಿಲ್ಲಾ ಸಮಿತಿಯು ಪ್ರಕಟಣೆ ಹೊರಡಿಸಿದೆ.

  ಗ್ಯಾಸ್, ಸಕ್ಕರೆ, ಫ್ಲೇವರ್, ಬಾಟಲಿಗಳು ಮತ್ತು ಸಾರಿಗೆ ವೆಚ್ಚವು ಕಳೆದ ಕೆಲವು ವಾರಗಳಲ್ಲಿ ಗಣನೀಯವಾಗಿ ಏರಿಕೆಯಾಗಿದೆ. ಹಳೆಯ ದರದಲ್ಲೇ ಮಾರಾಟ ಮಾಡುತ್ತಿದ್ದ ಅನೇಕ ಸಣ್ಣ ಉತ್ಪಾದನಾ ಘಟಕಗಳು ಪ್ರಸ್ತುತ ನಷ್ಟದಲ್ಲಿ ನಡೆಯುತ್ತಿವೆ ಎಂದು ಸಂಘದ ಪದಾಧಿಕಾರಿಗಳು ವಿವರಿಸಿದ್ದಾರೆ.

  "ಜಿಲ್ಲೆಯಾದ್ಯಂತ ಸುಮಾರು ಶೇ. 50 ರಷ್ಟು ಸಣ್ಣ ಸೋಡಾ ಉತ್ಪಾದನಾ ಘಟಕಗಳು ಈಗಾಗಲೇ ಕಾರ್ಯಾಚರಣೆಯನ್ನು ಸ್ಥಗಿತಗೊಳಿಸಿವೆ" ಎಂದು ಸಮಿತಿ ತಿಳಿಸಿದೆ.

  ಬ್ರ‍್ಯಾಂಡೆಡ್ ಕಂಪನಿಗಳ ಪೈಪೋಟಿ
  ಮಾರುಕಟ್ಟೆಯಲ್ಲಿ ಪ್ಲಾಸ್ಟಿಕ್ ಬಾಟಲಿಗಳಲ್ಲಿ ದೊರೆಯುವ ದೊಡ್ಡ ಬ್ರ‍್ಯಾಂಡ್‌ಗಳ ಪಾನೀಯಗಳ ಅಬ್ಬರದ ನಡುವೆ ಸಾಂಪ್ರದಾಯಿಕ ಸೋಡಾ ಉತ್ಪಾದಕರು ತತ್ತರಿಸಿದ್ದಾರೆ. ಗಾಜಿನ ಬಾಟಲಿಗಳಲ್ಲಿ ಸೋಡಾ ಮಾರಾಟ ಮಾಡುವವರು ದೊಡ್ಡ ಬ್ರ‍್ಯಾಂಡ್‌ಗಳ ಮಾರ್ಕೆಟಿಂಗ್ ಎದುರು ನಿಲ್ಲಲಾಗದೆ ನಷ್ಟ ಅನುಭವಿಸುತ್ತಿದ್ದಾರೆ. ಇದರಿಂದಾಗಿ ಸಣ್ಣ ವ್ಯಾಪಾರಿಗಳ ಅವಕಾಶಗಳು ಕ್ಷೀಣಿಸುತ್ತಿವೆ.

  ಪರಿಷ್ಕೃತ ದರ:
  ಸಂಘವು ಪರಿಷ್ಕೃತ ದರ ಪಟ್ಟಿಯನ್ನು ಪ್ರಕಟಿಸಿದೆ. ಒಂದು ಬಾಕ್ಸ್ ಸೋಡಾದ ಬೆಲೆ ಈಗ 140 ರೂ. ಮತ್ತು ಒಂದು ಬಾಕ್ಸ್ ತಂಪು ಪಾನೀಯಗಳ ಬೆಲೆ 220 ರೂ. ಆಗಿರುತ್ತದೆ. ಚಿಲ್ಲರೆ ಮಾರಾಟ ದರವನ್ನು ಪ್ರತಿ ಸೋಡಾ ಬಾಟಲಿಗೆ 10 ರೂ. ಮತ್ತು ಪ್ರತಿ ತಂಪು ಪಾನೀಯಕ್ಕೆ 10 ರೂ. ಎಂದು ನಿಗದಿಪಡಿಸಲಾಗಿದೆ. ಈ ಹೊಸ ದರಗಳು ಏಪ್ರಿಲ್ 2 ರಿಂದ ಜಾರಿಗೆ ಬಂದಿವೆ ಎಂದು ಸಮಿತಿಯು ಖಚಿತಪಡಿಸಿದೆ.

  ಏರುತ್ತಿರುವ ವೆಚ್ಚಗಳ ನಡುವೆ ಸಣ್ಣ ಮತ್ತು ಮಧ್ಯಮ ಗಾತ್ರದ ಉತ್ಪಾದನಾ ಘಟಕಗಳನ್ನು ಉಳಿಸಿಕೊಳ್ಳಲು ಮತ್ತು ಕಾರ್ಮಿಕರ ಜೀವನೋಪಾಯವನ್ನು ರಕ್ಷಿಸಲು ಈ ಬೆಲೆ ಏರಿಕೆ ಅನಿವಾರ್ಯವಾಗಿದೆ ಎಂದು ಅಧಿಕಾರಿಗಳು ತಿಳಿಸಿದ್ದಾರೆ.