ಮಂಗಳೂರು: ದಕ್ಷಿಣ ಭಾರತದಲ್ಲಿನ ಮೊದಲ RuTAGe ಸ್ಮಾರ್ಟ್ ವಿಲೇಜ್ ಸೆಂಟರ್ ಸ್ಥಾಪನೆ

•   Mon, Jan 19 2026 05:24:32 PM



• ಮಂಗಳೂರು, ಜ. 19 (DaijiworldNews/ AK):ಭಾರತ ಸರ್ಕಾರದ ಪ್ರಧಾನ ವೈಜ್ಞಾನಿಕ ಸಲಹೆಗಾರರ ಕಚೇರಿ (PSA) ಮಾರ್ಗದರ್ಶನದಲ್ಲಿ, ದಕ್ಷಿಣ ಭಾರತದಲ್ಲಿನ ಮೊದಲ RuTAGe ಸ್ಮಾರ್ಟ್ ವಿಲೇಜ್ ಸೆಂಟರ್ ಅನ್ನು ನಿಟ್ಟೆ ಪರಿಗಣಿತ ವಿಶ್ವವಿದ್ಯಾಲಯ (Nitte DU) ಮತ್ತು ಸೆಕ್ಷನ್ ಇನ್ಫಿನ್-8 ಫೌಂಡೇಶನ್ ಸಹಯೋಗದಲ್ಲಿ ಸ್ಥಾಪಿಸಲಾಗಿದೆ.

  
  ಪರೋಪಕಾರಿ ಎನ್.ಸಿ. ಮೂರ್ತಿ ಅವರ ಆರ್ಥಿಕ ಸಹಾಯದಿಂದ, ಕರಾವಳಿ ಕರ್ನಾಟಕದಲ್ಲಿ ತಂತ್ರಜ್ಞಾನ ಆಧಾರಿತ ಗ್ರಾಮೀಣ ಕೇಂದ್ರಗಳನ್ನು ಸ್ಥಾಪಿಸಲಾಗುತ್ತಿದ್ದು, ಕೃಷಿ, ಇಂಧನ, ಶಿಕ್ಷಣ ಮತ್ತು ಜೀವನೋಪಾಯಗಳ ಅಭಿವೃದ್ಧಿಗೆ ಉತ್ತೇಜನ ನೀಡುವ ಗುರಿಯನ್ನು ಹೊಂದಿವೆ. ಗ್ರಾಮೀಣ ಭಾರತದ ಸಮಗ್ರ ಅಭಿವೃದ್ಧಿಗೆ ತಂತ್ರಜ್ಞಾನವನ್ನು ಬಳಸುವ ಮಹತ್ವದ ಹೆಜ್ಜೆಯಾಗಿ, ಭಾರತ ಸರ್ಕಾರದ ಪ್ರಧಾನ ವೈಜ್ಞಾನಿಕ ಸಲಹೆಗಾರರ ಕಚೇರಿ (PSA) ದೇಶಾದ್ಯಂತ ಶೈಕ್ಷಣಿಕ ಸಂಸ್ಥೆಗಳು, ನಾಗರಿಕ ಸಮಾಜ ಸಂಘಟನೆಗಳು ಮತ್ತು ದಾನಿಗಳೊಂದಿಗೆ ಸಹಭಾಗಿತ್ವದಲ್ಲಿ RuTAGe ಸ್ಮಾರ್ಟ್ ವಿಲೇಜ್ ಕೇಂದ್ರಗಳ (RSVCs) ಸ್ಥಾಪನೆಯನ್ನು ಬೆಂಬಲಿಸುತ್ತಿದೆ. ಈ ರಾಷ್ಟ್ರೀಯ ಯೋಜನೆಯ ಭಾಗವಾಗಿ, ನಿಟ್ಟೆ ಪರಿಗಣಿತ ವಿಶ್ವವಿದ್ಯಾಲಯ ಮತ್ತು ಸೆಕ್ಷನ್ ಇನ್ಫಿನ್-8 ಫೌಂಡೇಶನ್ ಸಹಯೋಗದಲ್ಲಿ, ದಕ್ಷಿಣ ಭಾರತದಲ್ಲಿನ ಮೊದಲ RuTAGe ಸ್ಮಾರ್ಟ್ ವಿಲೇಜ್ ಕೇಂದ್ರಗಳು 2026ರ ಜನವರಿ 21ರಂದು ಕರಾವಳಿ ಕರ್ನಾಟಕದಲ್ಲಿ ಸ್ಥಾಪನೆಯಾಗಲಿವೆ.

  ಈ ಯೋಜನೆಯ ರಾಷ್ಟ್ರೀಯ ದೃಷ್ಟಿಕೋನವನ್ನು ವಿವರಿಸುತ್ತಾ, ಭಾರತ ಸರ್ಕಾರದ ಪ್ರಧಾನ ವೈಜ್ಞಾನಿಕ ಸಲಹೆಗಾರರಾದ ಪ್ರೊ. ಅಜಯ್ ಕುಮಾರ್ ಸೂದ್ ಅವರು, “RuTAGe ಸ್ಮಾರ್ಟ್ ವಿಲೇಜ್ ಕೇಂದ್ರಗಳ ಮಾದರಿ, ವಿಜ್ಞಾನ ಮತ್ತು ತಂತ್ರಜ್ಞಾನವು ನೇರವಾಗಿ ಗ್ರಾಮೀಣ ಸಮುದಾಯಗಳಿಗೆ ಉಪಯೋಗವಾಗಬೇಕು ಎಂಬ ನಮ್ಮ ಬದ್ಧತೆಯನ್ನು ತೋರಿಸುತ್ತದೆ. ಸರ್ಕಾರ, ಶೈಕ್ಷಣಿಕ ಸಂಸ್ಥೆಗಳು, ದಾನಿಗಳು ಮತ್ತು ಸ್ಥಳೀಯ ಸಂಘಟನೆಗಳ ಸಹಕಾರದ ಮೂಲಕ, ಸ್ಥಳೀಯ ಅಗತ್ಯಗಳಿಗೆ ತಕ್ಕಂತೆ ವಿಸ್ತರಿಸಬಹುದಾದ ಪರಿಹಾರಗಳನ್ನು ಈ ಕೇಂದ್ರಗಳು ಒದಗಿಸುತ್ತವೆ. ಇದರಿಂದ ಗ್ರಾಮ–ನಗರ ಅಂತರ ಕಡಿಮೆಯಾಗುವ ಜೊತೆಗೆ, ಸ್ವಾವಲಂಬಿ ಮತ್ತು ತಂತ್ರಜ್ಞಾನಾಧಾರಿತ ಗ್ರಾಮಗಳ ನಿರ್ಮಾಣ ಸಾಧ್ಯವಾಗುತ್ತದೆ” ಎಂದು ಹೇಳಿದರು.

  ಈ ಮಹತ್ವದ ಯೋಜನೆಗೆ ದಾನ ಶೂರರಾದಎನ್.ಸಿ. ಮೂರ್ತಿ ಅವರ ಉದಾರ ಸಹಕಾರ ಕಾರಣವಾಗಿದೆ. ಅವರ ದೇಣಿಗೆಯಿಂದ ಉಡುಪಿ ಜಿಲ್ಲೆಯ ನಿಟ್ಟೆ ಗ್ರಾಮ ಪಂಚಾಯತ್ ಮತ್ತು ದಕ್ಷಿಣ ಕನ್ನಡ ಜಿಲ್ಲೆಯ ಫರಂಗಿಪೇಟೆಯ ನಿಟ್ಟೆ ಆರೋಗ್ಯ ಕೇಂದ್ರ (ಸೇವಾಂಜಲಿ ಟ್ರಸ್ಟ್ ಆವರಣ)ಗಳಲ್ಲಿ RuTAGe ಸ್ಮಾರ್ಟ್ ವಿಲೇಜ್ ಕೇಂದ್ರಗಳನ್ನು ಸ್ಥಾಪಿಸಲಾಗುತ್ತಿದೆ.

  
  ಈ ಸಂದರ್ಭದಲ್ಲಿ ಮಾತನಾಡಿದ ಎನ್.ಸಿ. ಮೂರ್ತಿ, “ನಿಟ್ಟೆ ಮತ್ತು ಫರಂಗಿಪೇಟೆಯಲ್ಲಿ ಸ್ಥಾಪನೆಯಾಗುತ್ತಿರುವ RuTAGe ಸ್ಮಾರ್ಟ್ ವಿಲೇಜ್ ಕೇಂದ್ರಗಳಿಗೆ ಬೆಂಬಲ ನೀಡುತ್ತಿರುವುದು ನಮಗೆ ಹೆಮ್ಮೆ. ತಂತ್ರಜ್ಞಾನವನ್ನು ಸ್ಥಳೀಯ ಜ್ಞಾನ ಮತ್ತು ಅಗತ್ಯಗಳೊಂದಿಗೆ ಸಂಯೋಜಿಸುವ ಮೂಲಕ, ಈ ಕೇಂದ್ರಗಳು ರೈತರು, ಯುವಕರು ಮತ್ತು ಕೈಗಾರಿಕಾರರನ್ನು ಶಕ್ತಿಗೊಳಿಸುತ್ತವೆ. ಇದು ಸರ್ಕಾರ, ಶೈಕ್ಷಣಿಕ ಸಂಸ್ಥೆಗಳು ಮತ್ತು ದಾನಿಗಳ ನಡುವಿನ ಸಹಕಾರದಿಂದ ಗ್ರಾಮೀಣ ಅಭಿವೃದ್ಧಿ ಸಾಧ್ಯವೆನ್ನುವುದನ್ನು ತೋರಿಸುತ್ತದೆ” ಎಂದು ಹೇಳಿದರು.

  “ಸೌರ ವಿದ್ಯುತ್ ವ್ಯವಸ್ಥೆಗಳು, ಆಧುನಿಕ ಕೃಷಿ ಉಪಕರಣಗಳು ಮತ್ತು ಡಿಜಿಟಲ್ ಶಿಕ್ಷಣದಂತಹ ಪರಿಹಾರಗಳು ಗ್ರಾಮೀಣ ಪ್ರದೇಶಗಳಲ್ಲಿ ಹೊಸ ಅವಕಾಶಗಳನ್ನು ಸೃಷ್ಟಿಸುತ್ತವೆ” ಎಂದು ಹೇಳಿದರು.

  ಶ್ರೀ ಮತ್ತು ಶ್ರೀಮತಿ ಮೂರ್ತಿ ಅವರೊಂದಿಗೆ, ಭಾರತ ಸರ್ಕಾರದ ಪ್ರಧಾನ ವೈಜ್ಞಾನಿಕ ಸಲಹೆಗಾರರ ಕಚೇರಿಯ ಡಾ. ಸಪ್ನಾ ಪೋಟಿ (ಡೈರೆಕ್ಟರ್ – ಸ್ಟ್ರಾಟಜಿಕ್ ಅಲಯನ್ಸಸ್) ಅವರು ಕೇಂದ್ರಗಳನ್ನು ಉದ್ಘಾಟಿಸಲಿದ್ದು, ಈ ಸಂದರ್ಭದಲ್ಲಿ ಡಾ. ಶಿವಕಿರಣ್ (RSVC ಗವರ್ನಿಂಗ್ ಕೌನ್ಸಿಲ್ ಸದಸ್ಯ), ವಿಷ್ವಾಸ್ ಯು.ಎಸ್. (ಸೆಕ್ಷನ್ ಇನ್ಫಿನ್-8 ಫೌಂಡೇಶನ್ ಸಂಸ್ಥಾಪಕ-ನಿರ್ದೇಶಕರು), ಪ್ರೊ. ಇಡ್ಯ ಕರುಣಾಸಾಗರ ಮತ್ತು ಡಾ. ಇಂದ್ರಾಣಿ ಕರುಣಾಸಾಗರ (ನಿಟ್ಟೆ ವಿಶ್ವವಿದ್ಯಾಲಯ) ಸೇರಿದಂತೆ ಅನೇಕ ಗಣ್ಯರು ಉಪಸ್ಥಿತರಿದ್ದರು.

  RuTAGe ಸ್ಮಾರ್ಟ್ ವಿಲೇಜ್ ಕೇಂದ್ರಗಳು ಪ್ರಧಾನ ವೈಜ್ಞಾನಿಕ ಸಲಹೆಗಾರರ ಕಚೇರಿಯ ಬೆಂಬಲದ ರಾಷ್ಟ್ರೀಯ RuTAGe ಸ್ಮಾರ್ಟ್ ವಿಲೇಜ್ ಕಾರ್ಯಕ್ರಮದ ಭಾಗವಾಗಿವೆ. ಈ ಕಾರ್ಯಕ್ರಮದ ಉದ್ದೇಶ ಗ್ರಾಮೀಣ ಪ್ರದೇಶಗಳ ಅಗತ್ಯಗಳು ಮತ್ತು ತಂತ್ರಜ್ಞಾನ ಅಭಿವೃದ್ಧಿಯ ನಡುವಿನ ಅಂತರವನ್ನು ಕಡಿಮೆ ಮಾಡುವುದು. ಈ ಕೇಂದ್ರಗಳು ಶಾಶ್ವತ ಸ್ಥಳೀಯ ಹಬ್‌ಗಳಾಗಿ ಕಾರ್ಯನಿರ್ವಹಿಸಿ, ಗ್ರಾಮೀಣ ಜನರ ಜೀವನಮಟ್ಟ, ಆರ್ಥಿಕ ಅವಕಾಶಗಳು ಮತ್ತು ಸ್ಥಿರತೆಯನ್ನು ಹೆಚ್ಚಿಸುವುದನ್ನು ಗುರಿಯಾಗಿಟ್ಟುಕೊಂಡಿವೆ.

  RSVCಗಳ ಹೃದಯದಲ್ಲಿ ತಂತ್ರಜ್ಞಾನ ಪ್ರದರ್ಶನ

  RuTAGe ಸ್ಮಾರ್ಟ್ ವಿಲೇಜ್ ಕೇಂದ್ರಗಳ ಪ್ರಮುಖ ವಿಶೇಷತೆ ಎಂದರೆ ಗ್ರಾಮೀಣ ಜೀವನೋಪಾಯ ಸಮಸ್ಯೆಗಳಿಗೆ ನೇರವಾಗಿ ಪರಿಹಾರ ನೀಡುವ, ಪರೀಕ್ಷಿತ ಮತ್ತು ಬಳಸಲು ಸಿದ್ಧವಾದ ತಂತ್ರಜ್ಞಾನಗಳ ಪ್ರದರ್ಶನ. ನಿಟ್ಟೆ ಮತ್ತು ಫರಂಗಿಪೇಟೆಯ ಕೇಂದ್ರಗಳಲ್ಲಿ ಹಣ್ಣು, ತರಕಾರಿ ಮತ್ತು ಬೆಳೆಗಳಿಗಾಗಿ ಸೌರ ಒಣಗಿಸುವ ಯಂತ್ರಗಳು, ಮಣ್ಣಿನ ಪರೀಕ್ಷಾ ತಂತ್ರಜ್ಞಾನಗಳು, ಮಹಿಳಾ ಸ್ನೇಹಿ ಕೃಷಿ ಉಪಕರಣಗಳು, ಪವರ್ ವೀಡರ್ ಕಳೆ ತೆಗೆಯುವ ಯಂತ್ರ, ಧಾನ್ಯ ಸಂಗ್ರಹ ವ್ಯವಸ್ಥೆಗಳು, ಹುಲ್ಲು ಕತ್ತರಿಸುವ ಹಾಗೂ ಮರ ಏರುವ ಸಾಧನಗಳು, ಮತ್ತು ಗೋಶಾಲೆ ತ್ಯಾಜ್ಯದಿಂದ ದ್ರವ ಗೊಬ್ಬರ ತಯಾರಿಸುವ ತಂತ್ರಜ್ಞಾನಗಳು ಪ್ರದರ್ಶಿಸಲ್ಪಡುತ್ತವೆ.

  ಇದೇ ರೀತಿಯಲ್ಲಿ, ಅಡಕೆ ಮತ್ತು ತೆಂಗಿನ ತೊಗಟೆಯಿಂದ ಕೈತೋಟದ ಕಾಗದ ಹಾಗೂ ಇತರೆ ಉತ್ಪನ್ನಗಳು, ದೃಷ್ಟಿಹೀನ ವ್ಯಕ್ತಿಗಳಿಂದ ನಡೆಸಲಾಗುವ ಕೃಷಿ ಉತ್ಪನ್ನ ಒಣಗಿಸುವ ಯಂತ್ರಗಳು, ಮತ್ತು ISRO ಆಪ್‌ಗಳು, ಸರ್ಕಾರಿ ಯೋಜನೆಗಳ ಮಾಹಿತಿ, ಮಾರುಕಟ್ಟೆ ಸಂಪರ್ಕ ವೇದಿಕೆಗಳು ಸೇರಿದಂತೆ ಡಿಜಿಟಲ್ ಜ್ಞಾನಾಧಾರಿತ ಪರಿಹಾರಗಳಿಗೂ ಪ್ರವೇಶ ಒದಗಿಸಲಾಗುತ್ತದೆ. ಈ ಎಲ್ಲಾ ತಂತ್ರಜ್ಞಾನಗಳು ಸರಳ, ಒಳಗೊಂಡಿಕೆ ಹೊಂದಿದ ಮತ್ತು ಸ್ಥಳೀಯವಾಗಿ ಅಳವಡಿಸಬಹುದಾದ ಪರಿಹಾರಗಳಾಗಿವೆ.

  ಡಾ. ಸಪ್ನಾ ಪೋಟಿ ಅವರು ಮಾತನಾಡುತ್ತಾ, ”RuTAGe ಸ್ಮಾರ್ಟ್ ವಿಲೇಜ್ ಕೇಂದ್ರಗಳು ರಾಷ್ಟ್ರೀಯ ನವೀನತಾ ಗುರಿಗಳಿಗೆ ಸಂಪೂರ್ಣವಾಗಿ ಹೊಂದಿಕೆಯಾಗಿವೆ. ಸರ್ಕಾರ, ಶೈಕ್ಷಣಿಕ ಸಂಸ್ಥೆಗಳು ಮತ್ತು ನಾಗರಿಕ ಸಮಾಜದ ಬಲವಾದ ಸಹಕಾರದ ಮೂಲಕ, ನಾವು ತಂತ್ರಜ್ಞಾನವನ್ನು ಗ್ರಾಮೀಣ ಜನರಿಗೆ ತಲುಪಿಸುತ್ತಿದ್ದೇವೆ. ಸ್ವಾವಲಂಬಿ ಮತ್ತು ತಂತ್ರಜ್ಞಾನಾಧಾರಿತ ಗ್ರಾಮಗಳನ್ನು ನಿರ್ಮಿಸುವುದೇ ನಮ್ಮ ದೀರ್ಘಕಾಲದ ಗುರಿ” ಎಂದು ಹೇಳಿದರು.

  ನಿಟ್ಟೆ ವಿಶ್ವವಿದ್ಯಾಲಯದ ಉಪಕುಲಪತಿ ಡಾ. ಎಂ.ಎಸ್. ಮೂಡಿತಾಯ ಅವರು, ನಿಟ್ಟೆ ವಿಶ್ವವಿದ್ಯಾಲಯ ಸಮುದಾಯ ಕೇಂದ್ರೀತ ನವೀನತೆಯ ಮೇಲೆ ಸದಾ ಒತ್ತು ನೀಡಿದೆ. ಸಂಶೋಧನೆಯನ್ನು ನೇರವಾಗಿ ಗ್ರಾಮೀಣ ಜೀವನಕ್ಕೆ ತಲುಪಿಸುವ ಮೂಲಕ, RuTAGe ಸ್ಮಾರ್ಟ್ ವಿಲೇಜ್ ಕೇಂದ್ರಗಳು ಜೀವನೋಪಾಯ, ಶಿಕ್ಷಣ, ಆರೋಗ್ಯ ಮತ್ತು ಸ್ಥಿರ ತೆಯಲ್ಲಿ ಸ್ಪಷ್ಟ ಬದಲಾವಣೆ ತರಲಿವೆ” ಎಂದು ಹೇಳಿದರು.

  ದಕ್ಷಿಣ ಭಾರತದಲ್ಲಿ ಈ ಯೋಜನೆಯನ್ನು ಸೆಕ್ಷನ್ ಇನ್ಫಿನ್-8 ಫೌಂಡೇಶನ್ (SI-8) ಕಾರ್ಯಗತಗೊಳಿಸುತ್ತಿದ್ದು, ಉಡುಪಿ ಮತ್ತು ದಕ್ಷಿಣ ಕನ್ನಡ ಜಿಲ್ಲೆಗಳ RSVCಗಳನ್ನು ನಿಟ್ಟೆ ವಿಶ್ವವಿದ್ಯಾಲಯ ನಿರ್ವಹಿಸುತ್ತಿದೆ. ರೈತರು, ವಿದ್ಯಾರ್ಥಿಗಳು, ಯುವಕರು ಮತ್ತು ಉದ್ಯಮಿಗಳೊಂದಿಗೆ ನೇರವಾಗಿ ಕೆಲಸ ಮಾಡುವ ಮೂಲಕ, ಈ ಕೇಂದ್ರಗಳು ಸ್ಥಳೀಯ ಅಗತ್ಯಗಳಿಗೆ ತಕ್ಕ ತಂತ್ರಜ್ಞಾನಗಳನ್ನು ಅಳವಡಿಸುತ್ತವೆ. ಇದು ಸರ್ಕಾರ–ಶೈಕ್ಷಣಿಕ ಸಂಸ್ಥೆ–ದಾನಿಗಳ ಸಹಭಾಗಿತ್ವದ ಉತ್ತಮ ಉದಾಹರಣೆಯಾಗಿದೆ.

  ಪತ್ರಿಕಾಗೋಷ್ಠಿಯಲ್ಲಿ ನಿಟ್ಟೆ ಪರಿಗಣಿತ ವಿಶ್ವವಿದ್ಯಾಲಯ ಪೇಟೆಂಟ್ಸ್ ಮತ್ತು ಸಂಶೋಧನಾ ಸಲಹೆಗಾರರು ಪ್ರೊ. ಇಡ್ಯ ಕರುಣಾಸಾಗರ, ಸೆಕ್ಷನ್ ಇನ್ಫಿನ್-8 ಫೌಂಡೇಶನ್ ಸ್ಥಾಪಕ ನಿರ್ದೇಶಕರು ವಿಷ್ವಾಸ್ ಯುಎಸ್, ಸೆಕ್ಷನ್ ಇನ್ಫಿನ್-8 ಫೌಂಡೇಶನ್ ಸಿಇಒ ಅರವಿಂದ್ ಸಿ ಕುಮಾರ್ ಉಪಸ್ಥಿತರಿದ್ದರು