Karavali
ಬಂಟ್ವಾಳ : ಶವರ್ಮಾ ಕಚ್ಚಿ ಎಳೆದಾಡಿದ ಶ್ವಾನ – ವೀಡಿಯೋ ವೈರಲ್!
- Wed, Dec 10 2025 05:17:26 PM
-
ಬಂಟ್ವಾಳ, ಡಿ. 10 (DaijiworldNews/TA) : ನಗರದಲ್ಲಿ ಶವರ್ಮಾ ಪ್ರಿಯರನ್ನು ಬೆಚ್ಚಿಬೀಳಿಸಿದ ಒಂದು ಅಸಹನೀಯ ಘಟನೆ ಇದೀಗ ಸಾಮಾಜಿಕ ಜಾಲತಾಣಗಳಲ್ಲಿ ಭಾರೀ ಚರ್ಚೆಗೆ ಕಾರಣವಾಗಿದೆ. ಒಂದು ಶವರ್ಮಾ ಅಂಗಡಿಯಲ್ಲಿ ಶವರ್ಮಾ ತಯಾರಿಗಾಗಿ ಇಟ್ಟಿದ್ದ ಮಾಂಸವನ್ನು ಶ್ವಾನ ಕಚ್ಚಿಕೊಂಡು ಎಳೆದಾಡುತ್ತಿರುವ ದೃಶ್ಯ ಕೆಲವೇ ಕ್ಷಣಗಳಲ್ಲಿ ವೈರಲ್ ಆಗಿದೆ. ಜನರು ಪ್ರತಿದಿನ ಆಹಾರ ಸೇವಿಸುವ ಸ್ಥಳದಲ್ಲೇ ಇಂತಹ ಘಟನೆ ನಡೆದಿರುವುದು ಆರೋಗ್ಯ ಸುರಕ್ಷತೆಯ ಕುರಿತು ಗಂಭೀರ ಪ್ರಶ್ನೆಗಳನ್ನು ಎಬ್ಬಿಸಿದೆ.
ವೀಡಿಯೋದಲ್ಲಿ ಕಾಣುವಂತೆ, ಅಂಗಡಿಯ ಒಳಭಾಗದಲ್ಲಿ ಹೂಕ್ಗೆ ಕಟ್ಟಿ ಇಡಲಾಗಿದ್ದ ಶವರ್ಮಾ ಮಾಂಸವನ್ನು ಸಮೀಪದಲ್ಲಿದ್ದ ಶ್ವಾನ ಕಚ್ಚಿಕೊಂಡು ಎಳೆಯುತ್ತಾ ಹೋಗಿದೆ. ಈ ದೃಶ್ಯವನ್ನು ಗಮನಿಸಿದ ಕೆಲವರು ತಕ್ಷಣವೇ ಮೊಬೈಲ್ನಲ್ಲಿ ದಾಖಲಿಸಿ ಸಾಮಾಜಿಕ ಜಾಲತಾಣಗಳಲ್ಲಿ ಹಂಚಿಕೊಂಡಿದ್ದಾರೆ. ವೀಡಿಯೋ ಹರಡುತ್ತಿದ್ದಂತೆ, “ಇಂತಹ ಅಸುರಕ್ಷಿತ ಪರಿಸರದಲ್ಲಿ ತಯಾರಾಗುವ ಆಹಾರವನ್ನು ನಾವು ಹೇಗೆ ನಂಬಬೇಕು?” ಎಂಬ ಪ್ರಶ್ನೆಗಳು ಎಲ್ಲೆಡೆ ಕೇಳಿಬರುತ್ತಿವೆ.
ವೀಡಿಯೋ ವೈರಲ್ ಆದ ನಂತರ ಆಹಾರ ಸುರಕ್ಷತಾ ಇಲಾಖೆ ಈ ವಿಷಯವನ್ನು ಗಂಭೀರವಾಗಿ ಪರಿಗಣಿಸಬೇಕೆಂದು ಸಾರ್ವಜನಿಕರ ಅಭಿಪ್ರಾಯ ಕೇಳಿಬಂದಿದೆ. ಈ ಕಾರನದಿಂದ ಅಂಗಡಿಯಲ್ಲಿ ಸ್ವಚ್ಛತೆಯ ಮಾನದಂಡಗಳನ್ನು ಉಲ್ಲಂಘಿಸಿರುವುದು ದೃಢಪಟ್ಟರೆ, ಕಾನೂನು ಪ್ರಕಾರ ಕ್ರಮ ಕೈಗೊಳ್ಳಲಾಗುವ ಸಾಧ್ಯತೆಗಳಿವೆ.
ಈ ಘಟನೆ ಸಾರ್ವಜನಿಕರಲ್ಲಿ ದೊಡ್ಡ ಆತಂಕವನ್ನು ಮಾತ್ರವಲ್ಲ, ಆಹಾರ ಸುರಕ್ಷತೆ ಎಂಬ ಮಹತ್ವದ ವಿಚಾರವನ್ನು ಮತ್ತೊಮ್ಮೆ ಸ್ಮರಿಸಿದೆ. ಫಾಸ್ಟ್ಫುಡ್ ಮತ್ತು ತಕ್ಷಣ ತಯಾರಿಸಿಕೊಡುವ ಆಹಾರಗಳಲ್ಲಿ ಸ್ವಚ್ಛತೆಯ ಮಾನದಂಡಗಳನ್ನು ಪಾಲಿಸುವುದು ಅತ್ಯಂತ ಕಡ್ಡಾಯ. ಮಾಂಸ ತಯಾರಿಕೆ ಹೊಂದಿರುವ ಯಾವುದೇ ಹೋಟೆಲ್ನಲ್ಲಿ ಶ್ವಾನ ಅಥವಾ ಇತರ ಪ್ರಾಣಿಗಳು ಪ್ರವೇಶಿಸುವುದು ಕೇವಲ ಅಸ್ವಚ್ಛತೆಯ ಸೂಚನವಲ್ಲ, ಗಂಭೀರ ಆರೋಗ್ಯ ಅಪಾಯ ಕೂಡ.
ಬಂಟ್ವಾಳದ ಈ ಶವರ್ಮಾ ಘಟನೆ ಒಂದು ಸಣ್ಣ ತಪ್ಪಿನಂತೆ ಕಾಣಬಹುದಾದರೂ, ಇದು ಆಹಾರ ತಯಾರಿಕಾ ಸ್ಥಳಗಳ ಮೇಲೆ ಹೆಚ್ಚು ನಿಗಾ ಅಗತ್ಯವಿದೆ ಎಂಬುದನ್ನು ಸ್ಪಷ್ಟಪಡಿಸಿದೆ. ಸಾರ್ವಜನಿಕರ ನಂಬಿಕೆಯನ್ನು ಕಾಪಾಡಲು ಹೋಟೆಲ್ಗಳು ಮತ್ತು ಆಹಾರ ಘಟಕಗಳು ಸರಿಯಾದ ಕ್ರಮಗಳನ್ನು ಅನುಸರಿಸಬೇಕು ಎಂಬುದರಲ್ಲಿ ಸಂಶಯವಿಲ್ಲ. ಇದರ ಜೊತೆಗೆ, ಸಂಬಂಧಿತ ಇಲಾಖೆಗಳು ನಿಯಮಿತ ತಪಾಸಣೆ ಮತ್ತು ಕಠಿಣ ನಿಯಮಾವಳಿ ಜಾರಿಗೊಳಿಸುವುದು ಅಗತ್ಯ ಎಂಬುದು ಜನರ ಒತ್ತಾಯ.
ಚಾನಲ್ ಫಾಲೋ ಮಾಡಿ
