ಉಡುಪಿ: 'ಕರಾವಳಿ ಭಾಗದಲ್ಲಿ ನಡೆದ ಮತ್ತು ನಡೆಯುತ್ತಿರುವ ಘಟನೆಗಳ ಆಧಾರದಲ್ಲಿ ಕಾರ್ಯಪಡೆ ರಚನೆ'- ಪರಮೇಶ್ವರ್

•   Sat, Jun 14 2025 04:15:03 PM



• ಉಡುಪಿ, ಜೂ. 14 (DaijiworldNews/AA): "ಕರಾವಳಿ ಭಾಗದಲ್ಲಿ ನಡೆದ ಮತ್ತು ನಡೆಯುತ್ತಿರುವ ಘಟನೆಗಳ ಆಧಾರದ ಮೇಲೆ ಕಾರ್ಯಪಡೆ ರಚಿಸಲಾಗಿದೆ" ಎಂದು ಗೃಹ ಸಚಿವ ಡಾ. ಜಿ. ಪರಮೇಶ್ವರ್ ಅವರು ತಿಳಿಸಿದರು.

  

  ಕರಾವಳಿ ಭಾಗದಲ್ಲಿ ವಿಶೇಷ ಕಾರ್ಯಪಡೆ ರಚನೆ ಕುರಿತು ವಿರೋಧ ಪಕ್ಷದ ನಾಯಕರ ಟೀಕೆಗಳ ವಿಚಾರವಾಗಿ ಉಡುಪಿಯಲ್ಲಿ ಇಂದು ಮಾಧ್ಯಮದವರೊಂದಿಗೆ ಮಾತನಾಡಿದ ಅವರು, "ಉಡುಪಿಯಲ್ಲಿ ಕೆಲ ಬಿಜೆಪಿ ನಾಯಕರು ವಿಶೇಷ ಕಾರ್ಯಪಡೆ ರಚನೆಗೆ ಆಕ್ಷೇಪ ವ್ಯಕ್ತಪಡಿಸಿದ್ದಾರೆ. ಆದರೆ, ಕರಾವಳಿ ಪ್ರದೇಶದಲ್ಲಿನ ನಿರ್ದಿಷ್ಟ ಘಟನೆಗಳಿಗೆ ಪ್ರತಿಕ್ರಿಯೆಯಾಗಿ ಈ ಪಡೆಯನ್ನು ಸ್ಥಾಪಿಸಲಾಗಿದೆ. ಯಾವುದೇ ಜಿಲ್ಲೆಯನ್ನು ಕೋಮುಸೂಕ್ಷ್ಮ ಎಂದು ಬಿಂಬಿಸಲು ನಾವು ಮಾಡಿಲ್ಲ. ವಾಸ್ತವವಾಗಿ, ಅಂತಹ ಪರಿಸ್ಥಿತಿ ಉದ್ಭವಿಸಬಾರದು ಎಂದು ನಾನು ಈಗಾಗಲೇ ಹೇಳಿದ್ದೇನೆ. ಈ ಫೋರ್ಸ್ ಉಪಯೋಗ ಆಗದಿರುವಂತೆ ನೋಡಿಕೊಳ್ಳಿ ಅಂತ ಸಾರ್ವಜನಿಕವಾಗಿ ಮನವಿ ಮಾಡಿದ್ದೇನೆ. ಯಾವುದೇ ಕೋಮು ಗಲಭೆಗಳು ನಡೆಯದಿದ್ದರೆ, ಈ ಕಾರ್ಯಪಡೆಯ ಅಗತ್ಯ ಬರೋದಿಲ್ಲ. ಅಂತಿಮವಾಗಿ ಈ ಕಾರ್ಯಪಡೆಯ ಅಗತ್ಯವನ್ನು ನಿರ್ಧರಿಸುವುದು ಜನರ ಕೈಯಲ್ಲಿದೆ. ಕಾರ್ಯಪಡೆಯ ಅಗತ್ಯವಿಲ್ಲದಿದ್ದರೆ, ಅಲ್ಲಿ ಕೋಮು ಸೌಹಾರ್ದತೆ ಇದೆ ಎಂಬುದಕ್ಕೆ ಸಕಾರಾತ್ಮಕ ಸಂಕೇತವಾಗಿದೆ. ಇದರಲ್ಲಿ ಯಾವುದೇ ಪ್ರದೇಶದ ಘನತೆಗೆ ಧಕ್ಕೆ ತರುವ ಪ್ರಶ್ನೆಯೇ ಇಲ್ಲ" ಎಂದರು.

  ಮುಂದುವರೆದು, "ಉದಾಹರಣೆಗೆ, ನಕ್ಸಲ್ ಸಂಬಂಧಿತ ಕೊಲೆಗಳಿಗೆ ಪ್ರತಿಕ್ರಿಯೆಯಾಗಿ ನಾವು ಕಾರ್ಕಳ ಪ್ರದೇಶದಲ್ಲಿ ಎಎನ್‌ಎಫ್ (ನಕ್ಸಲ್ ವಿರೋಧಿ ಪಡೆ) ಪ್ರಧಾನ ಕಚೇರಿಯನ್ನು ಸ್ಥಾಪಿಸಿದ್ದೆವು. ಅದು ಉಡುಪಿಯ ಘನತೆಯನ್ನು ಯಾವುದೇ ರೀತಿಯಲ್ಲಿ ಕಡಿಮೆ ಮಾಡಿದೆಯೇ? ಎಎನ್‌ಎಫ್ ಉಪಸ್ಥಿತಿಯು ಪ್ರದೇಶದ ಘನತೆಯನ್ನು ಕಡಿಮೆ ಮಾಡಿದೆಯೇ? ಕೇವಲ ಪೊಲೀಸ್ ಉಪಸ್ಥಿತಿಯು ಒಂದು ಸ್ಥಳದ ಗೌರವಕ್ಕೆ ಧಕ್ಕೆ ತರುತ್ತದೆ ಎಂದರ್ಥವಲ್ಲ. ಪೊಲೀಸ್ ಆಯುಕ್ತರು ದಕ್ಷಿಣ ಕನ್ನಡವನ್ನು ನೋಡಿಕೊಳ್ಳುತ್ತಾರೆ. ಮತ್ತು ಇನ್ಸ್‌ಪೆಕ್ಟರ್ ಜನರಲ್ ಮೂರು ಜಿಲ್ಲೆಗಳನ್ನು ಮೇಲ್ವಿಚಾರಣೆ ಮಾಡುತ್ತಾರೆ. ಇವುಗಳಲ್ಲಿ ಯಾವುದೂ ಯಾವುದೇ ಪ್ರದೇಶದ ಘನತೆಗೆ ಪರಿಣಾಮ ಬೀರುವುದಿಲ್ಲ" ಎಂದು ಹೇಳಿದರು.

  ಜಾತಿ ಗಣತಿ ವಿಚಾರವಾಗಿ ಮಾತನಾಡಿದ ಅವರು, "ರಾಜ್ಯ ಸರ್ಕಾರವು ಹೊಸ ಗಣತಿ ನಡೆಸಲು ನಿರ್ಧರಿಸಿದೆ. ಹಿಂದಿನ ಜಾತಿ ಗಣತಿ ದತ್ತಾಂಶದ ನಿಖರತೆಯ ಬಗ್ಗೆ ಅನೇಕ ಸಮುದಾಯಗಳು ಮತ್ತು ಸಂಸ್ಥೆಗಳು ಅಸಮಾಧಾನ ವ್ಯಕ್ತಪಡಿಸಿವೆ. ಹಿಂದಿನ ಜಾತಿ ಗಣತಿ ಸುಮಾರು ಹತ್ತು ವರ್ಷ ಹಳೆಯದು. ಮತ್ತು ಅಂದಿನಿಂದ ಸುಮಾರು 1.5 ಕೋಟಿ ಜನರು ಜನಸಂಖ್ಯೆಗೆ ಸೇರ್ಪಡೆಯಾಗಿದ್ದಾರೆ. ಸಾರ್ವಜನಿಕರ ಕಾಳಜಿ ಮತ್ತು ಸಲಹೆಗಳನ್ನು ಪರಿಗಣಿಸಿದ ನಂತರ, ಸರ್ಕಾರವು ವೈಜ್ಞಾನಿಕ ಆಧಾರದ ಮೇಲೆ ಹೊಸ ಜಾತಿ ಗಣತಿ ನಡೆಸಲು ನಿರ್ಧರಿಸಿದೆ. ಈ ಪ್ರಕ್ರಿಯೆಯು ಹೊಸದಾಗಿ ಸೇರಿಸಿದ ಜನಸಂಖ್ಯೆಯನ್ನು ಒಳಗೊಂಡಿರುತ್ತದೆ ಎಂದು ಮಾಹಿತಿ ನೀಡಿದರು.

  "ಹಿಂದಿನ ಜಾತಿ ಸಮೀಕ್ಷೆಯ ಕಾಂತರಾಜು ಮತ್ತು ಹೆಗ್ಡೆ ವರದಿಗಳನ್ನು ತಿರಸ್ಕರಿಸಲಾಗುವುದಿಲ್ಲ, ಆದರೆ ಅವುಗಳನ್ನು ಪರಿಶೀಲಿಸಲಾಗುವುದು. ಕೇವಲ ಸಾಮಾನ್ಯ ಜನಗಣತಿ ನಡೆಸುವ ಕೇಂದ್ರ ಸರ್ಕಾರದಂತೆ ಅಲ್ಲದೆ, ರಾಜ್ಯವು ವಿವಿಧ ಸಮುದಾಯಗಳ ಸಾಮಾಜಿಕ, ಶೈಕ್ಷಣಿಕ ಮತ್ತು ಆರ್ಥಿಕ ಪರಿಸ್ಥಿತಿಗಳನ್ನು ಅರ್ಥಮಾಡಿಕೊಳ್ಳಲು ಮತ್ತೊಂದು ಹೆಜ್ಜೆ ಮುಂದಿಡುತ್ತಿದೆ" ಎಂದು ತಿಳಿಸಿದರು.