ಉಡಾವಣೆಯಾದ ಕೆಲವೇ ಕ್ಷಣಗಳಲ್ಲಿ ತಾಂತ್ರಿಕ ದೋಷದಿಂದ ಚೀನಾ ರಾಕೆಟ್‌ ಪತನ

•   Tue, Aug 11 2026 04:44:42 PM



• ಬೀಜಿಂಗ್, ಆ. 11 (DaijiworldNews/AK): ಚೀನಾದ ದಕ್ಷಿಣ ಹೈನಾನ್ ಪ್ರಾಂತ್ಯದ ವೆನ್‌ಚಾಂಗ್ ಬಾಹ್ಯಾಕಾಶ ಉಡಾವಣಾ ಕೇಂದ್ರದಿಂದ ಚೀನಾ ಸ್ಯಾಟ್-4B ಉಪಗ್ರಹವನ್ನು ಹೊತ್ತೊಯ್ಯುತ್ತಿದ್ದ ‘ಲಾಂಗ್ ಮಾರ್ಚ್ 7A’ ರಾಕೆಟ್ ಉಡಾವಣೆ ವಿಫಲಗೊಂಡಿದೆ. ಉಡಾವಣೆಯಾದ ಕೆಲವೇ ಕ್ಷಣಗಳಲ್ಲಿ ತಾಂತ್ರಿಕ ದೋಷ ಕಾಣಿಸಿಕೊಂಡು ರಾಕೆಟ್ ಪತನಗೊಂಡಿದೆ.

  ಚೀನಾದ ಶಕ್ತಿಶಾಲಿ ‘ಲಾಂಗ್ ಮಾರ್ಚ್ 7A’ ರಾಕೆಟ್ ಬೀಜಿಂಗ್ ಕಾಲಮಾನ ರಾತ್ರಿ 8:02ಕ್ಕೆ ಉಡಾವಣೆಯಾಗಿತ್ತು. ಆದರೆ ಉಡಾವಣೆಯಾದ ತಕ್ಷಣವೇ ರಾಕೆಟ್‌ನಲ್ಲಿ ದೋಷ ಕಾಣಿಸಿಕೊಂಡು ಸ್ಪೋಟಗೊಂಡಿದೆ.

  ರಾಕೆಟ್‌ ಪತದ ಬಗ್ಗೆ ದೇಶದ ಅಧಿಕೃತ ಸುದ್ದಿ ಸಂಸ್ಥೆ ಕ್ಸಿನ್ಹುವಾ ದೃಢಪಡಿಸಿದ್ದು, ಘಟನೆಗೆ ನಿಖರ ಕಾರಣ ಏನೆಂಬುದರ ಕುರಿತು ತನಿಖೆ ಮತ್ತು ವಿಶ್ಲೇಷಣೆ ನಡೆಯುತ್ತಿದೆ ಎಂದು ತಿಳಿಸಿದೆ.

  ಡರ್ಹಾಮ್ ವಿಶ್ವವಿದ್ಯಾಲಯದ ಗೌರವ ಪ್ರಾಧ್ಯಾಪಕ ಹಾಗೂ ಬಾಹ್ಯಾಕಾಶ ತಜ್ಞ ಜೊನಾಥನ್ ಮೆಕ್‌ಡೊವೆಲ್ ಪ್ರಕಾರ, ಉಡಾವಣೆಯ ವೀಡಿಯೊ ತುಣುಕುಗಳನ್ನು ವಿಶ್ಲೇಷಿಸಿದಾಗ ರಾಕೆಟ್ ತೀರಾ ಕಡಿಮೆ ಎತ್ತರ ಮತ್ತು ವೇಗದಲ್ಲಿದ್ದಾಗಲೇ ಸಂಪೂರ್ಣವಾಗಿ ನಾಶವಾಗಿದೆ. ಹೀಗಾಗಿ ಉಪಗ್ರಹ ಅಥವಾ ರಾಕೆಟ್‌ನ ಯಾವುದೇ ಭಾಗಗಳು ಕಕ್ಷೆಯನ್ನು ತಲುಪಲು ಸಾಧ್ಯವಾಗಿಲ್ಲ.

  ಈ ಉಡಾವಣೆ ವೈಫಲ್ಯದ ಕುರಿತು ಪ್ರತಿಕ್ರಿಯಿಸಿರುವ ಸ್ಪೇಸ್‌ಎಕ್ಸ್ (SpaceX) ಸಂಸ್ಥಾಪಕ ಹಾಗೂ ಸಿಇಒ ಎಲಾನ್ ಮಸ್ಕ್, ರಾಕೆಟ್‌ಗಳನ್ನು ನಿರ್ಮಿಸುವುದು ಮತ್ತು ಉಡಾಯಿಸುವುದು ಅತ್ಯಂತ ಕಷ್ಟಕರವಾದ ಕೆಲಸ. ಚೀನಾ ಈ ಹಿನ್ನಡೆಯಿಂದ ಶೀಘ್ರದಲ್ಲೇ ಚೇತರಿಸಿಕೊಳ್ಳಲಿ ಎಂದು ಹಾರೈಸಿದ್ದಾರೆ.