ಮಗನ ಚಿತ್ರದ ಫೋಟೋ ಫ್ರೇಮ್ ಅನ್ನು ಎತ್ತಿಹಿಡಿದು ಬೆಂಬಲ ಸೂಚಿಸಿದ ಸಿಎಂ ವಿಜಯ್

•   Sat, Oct 03 2026 04:43:27 PM



• ಚೆನ್ನೈ,ಅ.03 (DaijiworldNews/AK): ತಮಿಳುನಾಡಿನ ಮುಖ್ಯಮಂತ್ರಿ ವಿಜಯ್ ತಮ್ಮ ರಾಜಕೀಯ ಪ್ರಚಾರದ ವೇಳೆಯಲ್ಲೂ ತಂದೆಯ ಕರ್ತವ್ಯವನ್ನು ಮೆರೆದಿದ್ದಾರೆ.

  ಮಧುರಾಂತಕಂನಲ್ಲಿ ನಡೆದ ರೋಡ್‌ಶೋ ವೇಳೆ ಅಭಿಮಾನಿಯೊಬ್ಬರು ನೀಡಿದ ಮಗ ಜೇಸನ್ ಸಂಜಯ್ ಅವರ ‘ಸಿಗ್ಮಾ’ ಚಿತ್ರದ ಫೋಟೋ ಫ್ರೇಮ್ ಅನ್ನು ಎತ್ತಿಹಿಡಿದು ಬೆಂಬಲ ಸೂಚಿಸಿದ್ದಾರೆ. ಈ ಭಾವನಾತ್ಮಕ ಕ್ಷಣದ ವೀಡಿಯೊ ಈಗ ಸಾಮಾಜಿಕ ಜಾಲತಾಣಗಳಲ್ಲಿ ಸಖತ್ ವೈರಲ್ ಆಗುತ್ತಿದೆ.

  
  ರಾಜಕೀಯ ಪ್ರಚಾರದ ಬ್ಯುಸಿ ವೇಳಾಪಟ್ಟಿಯ ನಡುವೆಯೂ ವಿಜಯ್ ಈ ರೀತಿ ಮಗನಿಗೆ ಬೆಂಬಲ ನೀಡಿದ್ದಾರೆ. ಆದರೆ ಶುಕ್ರವಾರ ತೆರೆಕಂಡ ಈ ಚಿತ್ರದ ಮೊದಲ ಪ್ರದರ್ಶನಕ್ಕೆ ವಿಜಯ್ ಅವರಿಗೆ ಹಾಜರಾಗಲು ಸಾಧ್ಯವಾಗಲಿಲ್ಲ. ಅತ್ತ ಚೆನ್ನೈನ ಕಮಲಾ ಥಿಯೇಟರ್‌ನಲ್ಲಿ ಜೇಸನ್ ತಾಯಿ ಸಂಗೀತಾ, ತಂಗಿ ದಿವ್ಯಾ ಸಾಶಾ ಹಾಗೂ ಜೇಸನ್ ಸಂಜಯ್ ಒಂದಾಗಿ ಸಿನಿಮಾ ವೀಕ್ಷಿಸಿದರು. ಕುಟುಂಬ ಸದಸ್ಯರು ‘ಸಿಗ್ಮಾ’ ಟಿ-ಶರ್ಟ್ ಧರಿಸಿ ಸಂಭ್ರಮಿಸಿದರು.

  ಸಿನಿಮಾ ನಿರ್ದೇಶನ ಮಾಡುವ ಜೇಸನ್ ನಿರ್ಧಾರಕ್ಕೆ ಮೊದಲು ಪೂರ್ಣ ಬೆಂಬಲ ನೀಡಿದ್ದೇ ತಂದೆ ವಿಜಯ್. ಆದರೆ ತಮ್ಮ ಮೊದಲ ಚಿತ್ರದ ಪ್ರಚಾರದಲ್ಲಿ ತಂದೆಯ ಹೆಸರನ್ನು ಬಳಸಿಕೊಳ್ಳಲು ಜೇಸನ್ ಇಷ್ಟಪಡಲಿಲ್ಲ. ಚಿತ್ರದ ಪ್ರಚಾರವು ಕೇವಲ ಸಿನಿಮಾಗೆ ಮಾತ್ರ ಸೀಮಿತವಾಗಿರಬೇಕು ಎಂಬುದು ಅವರ ಸ್ಪಷ್ಟ ನಿಲುವಾಗಿತ್ತು. ಹೀಗಾಗಿ ವಿಜಯ್ ಅವರನ್ನು ಚಿತ್ರದ ಪ್ರಚಾರದಿಂದ ದೂರವೇ ಇಡಲಾಗಿತ್ತು.

  
  ಚಿತ್ರ ಬಿಡುಗಡೆಯಾದ ಮೊದಲ ದಿನ ‘ಸಿಗ್ಮಾ’ ಭಾರತದಲ್ಲಿ ಸುಮಾರು 2.35 ಕೋಟಿ ರೂಪಾಯಿ ನಿವ್ವಳ ಗಳಿಕೆ ಮಾಡಿದೆ.