ವಿವಾದಾತ್ಮಕ ಸಿನಿಮಾಗೆ ಇಲಾನ್ ಮಸ್ಕ್ ಬೆಂಬಲ! - ಜರ್ಮನಿಯಲ್ಲಿ ನಿಷೇಧಗೊಂಡ ಚಿತ್ರ ಈಗ ಒಟಿಟಿಗೆ

•   Fri, Jul 03 2026 03:59:05 PM



• ನವದೆಹಲಿ, ಜು. 03 (DaijiworldNews/TA): ಟೆಸ್ಲಾ ಮತ್ತು ಸ್ಪೇಸ್‌ಎಕ್ಸ್ ಸಂಸ್ಥೆಗಳ ಮುಖ್ಯಸ್ಥ ಇಲಾನ್ ಮಸ್ಕ್ ಬೆಂಬಲ ನೀಡಿದ ಬಳಿಕ ಜರ್ಮನಿಯಲ್ಲಿ ವಿವಾದಕ್ಕೆ ಕಾರಣವಾಗಿದ್ದ ‘ಸಿಟಿಜನ್ ವಿಜಲಾಂಟಿ’ ಸಿನಿಮಾ ಮತ್ತೆ ಸುದ್ದಿಯಲ್ಲಿದೆ. ಜರ್ಮನಿಯಲ್ಲಿ ಬಿಡುಗಡೆಯಾಗದ ಈ ಚಿತ್ರವನ್ನು ಮಸ್ಕ್ ತಮ್ಮ ಸಾಮಾಜಿಕ ಜಾಲತಾಣ ಎಕ್ಸ್‌ನಲ್ಲಿ ಉಚಿತವಾಗಿ ಲಭ್ಯವಾಗುವಂತೆ ಮಾಡಿದ್ದರಿಂದ ಚಿತ್ರದ ಬಗ್ಗೆ ಜಾಗತಿಕ ಮಟ್ಟದಲ್ಲಿ ಚರ್ಚೆ ಆರಂಭವಾಗಿದೆ.

  

  ಜರ್ಮನ್ ನಿರ್ದೇಶಕ ಉವೇ ಬೋಲ್ ನಿರ್ದೇಶಿಸಿರುವ ‘ಸಿಟಿಜನ್ ವಿಜಲಾಂಟಿ’ ಚಿತ್ರವು ಸಾಮಾನ್ಯ ನಾಗರಿಕನೊಬ್ಬ ಕೊಲೆ, ಅತ್ಯಾಚಾರ ಹಾಗೂ ಭಯೋತ್ಪಾದನಾ ಪ್ರಕರಣಗಳ ಆರೋಪಿಗಳ ವಿರುದ್ಧ ಸ್ವತಃ ನ್ಯಾಯ ಒದಗಿಸಲು ಮುಂದಾಗುವ ಕಥೆಯನ್ನು ಹೊಂದಿದೆ. ಆದರೆ ಚಿತ್ರದ ಕಥೆಯಲ್ಲಿ ನಾಯಕನ ಗುರಿಯಾಗುವ ಪಾತ್ರಗಳು ಹೆಚ್ಚಾಗಿ ಮುಸ್ಲಿಂ ವಲಸಿಗರು ಹಾಗೂ ಅವರನ್ನು ಬೆಂಬಲಿಸುವ ಅಧಿಕಾರಿಗಳಾಗಿರುವ ಕಾರಣ ಚಿತ್ರವು ಧಾರ್ಮಿಕ ದ್ವೇಷವನ್ನು ಪ್ರಚೋದಿಸಬಹುದು ಎಂಬ ಟೀಕೆ ವ್ಯಕ್ತವಾಗಿದೆ.

  ಚಿತ್ರವು ಸಮಾಜದಲ್ಲಿ ದ್ವೇಷ ಹಾಗೂ ಅಸಹಿಷ್ಣುತೆಯನ್ನು ಉತ್ತೇಜಿಸಬಹುದು ಎಂಬ ಕಾರಣದಿಂದ ಜರ್ಮನಿಯಲ್ಲಿ ಅಗತ್ಯ ಪ್ರಮಾಣಪತ್ರ ದೊರೆಯಲಿಲ್ಲ. ಹೀಗಾಗಿ ಅಲ್ಲಿ ಸಿನಿಮಾ ಬಿಡುಗಡೆಯಾಗಲಿಲ್ಲ. ಆದರೆ ಉತ್ತರ ಅಮೆರಿಕದ ಕೆಲವು ಆಯ್ದ ಚಿತ್ರಮಂದಿರಗಳಲ್ಲಿ ಮಾತ್ರ ಪ್ರದರ್ಶನ ಕಂಡಿತ್ತು. ಅಲ್ಲಿ ಬಿಡುಗಡೆಯಾದ ಸಂದರ್ಭದಲ್ಲಿಯೂ ಚಿತ್ರಕ್ಕೆ ಮಿಶ್ರ ಪ್ರತಿಕ್ರಿಯೆ ವ್ಯಕ್ತವಾಗಿದ್ದು, ಕೆಲ ಬಲಪಂಥೀಯ ಗುಂಪುಗಳು ಮಾತ್ರ ಬೆಂಬಲ ವ್ಯಕ್ತಪಡಿಸಿದ್ದವು. 2016ರಲ್ಲಿ ಜರ್ಮನಿಯ ಹ್ಯಾಂಬರ್ಗ್‌ನಲ್ಲಿ ನಡೆದ ಅತ್ಯಾಚಾರ ಹಾಗೂ ಕೊಲೆ ಪ್ರಕರಣದಿಂದ ಪ್ರೇರಣೆ ಪಡೆದು ಈ ಸಿನಿಮಾ ನಿರ್ಮಿಸಲಾಗಿದೆ ಎಂದು ಚಿತ್ರತಂಡ ಹೇಳಿದೆ. ಪ್ರಕರಣದಲ್ಲಿ ಆರೋಪಿಗಳು ಖುಲಾಸೆಯಾಗಿದ್ದರಿಂದ ಆ ಘಟನೆ ವ್ಯಾಪಕ ಚರ್ಚೆಗೆ ಗ್ರಾಸವಾಗಿತ್ತು. ಚಿತ್ರದ ಕೊನೆಯಲ್ಲಿ, "ಯೂರೋಪಿನ ನ್ಯಾಯ ವ್ಯವಸ್ಥೆಯಿಂದ ನಿರಾಶೆಗೊಂಡ ಎಲ್ಲ ಅತ್ಯಾಚಾರ ಸಂತ್ರಸ್ತ ಮಹಿಳೆಯರಿಗೆ ಈ ಸಿನಿಮಾ ಅರ್ಪಣೆ" ಎಂಬ ಸಂದೇಶವನ್ನು ಸೇರಿಸಲಾಗಿದೆ.

  ಜೂನ್ 25ರಂದು ಇಲಾನ್ ಮಸ್ಕ್ ತಮ್ಮ ಎಕ್ಸ್‌ ಖಾತೆಯಲ್ಲಿ ಈ ಚಿತ್ರವನ್ನು ಎರಡು ದಿನಗಳ ಕಾಲ ಉಚಿತವಾಗಿ ವೀಕ್ಷಿಸಲು ಅವಕಾಶ ಮಾಡಿಕೊಟ್ಟಿದ್ದರು. ಇದರ ಬಳಿಕ ಚಿತ್ರದ ಬಗ್ಗೆ ಸಾಮಾಜಿಕ ಜಾಲತಾಣಗಳಲ್ಲಿ ವ್ಯಾಪಕ ಚರ್ಚೆ ಆರಂಭವಾಗಿದ್ದು, ಪರ ಹಾಗೂ ವಿರೋಧ ಅಭಿಪ್ರಾಯಗಳು ವ್ಯಕ್ತವಾಗಿವೆ. ಇದಾದ ಬಳಿಕ ಪ್ರಮುಖ ಒಟಿಟಿ ವೇದಿಕೆಗಳಾದ ಆಪಲ್ ಟಿವಿ ಹಾಗೂ ಅಮೆಜಾನ್ ಪ್ರೈಮ್ ವೀಡಿಯೊ ಚಿತ್ರದ ಸ್ಟ್ರೀಮಿಂಗ್ ಹಕ್ಕುಗಳನ್ನು ಪಡೆದುಕೊಂಡಿದ್ದು, ಶೀಘ್ರದಲ್ಲೇ ಚಿತ್ರವನ್ನು ಬಿಡುಗಡೆ ಮಾಡುವ ನಿರೀಕ್ಷೆಯಿದೆ. ಆದಾಗ್ಯೂ, ಚಿತ್ರದ ವಿಷಯವಸ್ತು, ಅದರ ಸಾಮಾಜಿಕ ಪರಿಣಾಮ ಹಾಗೂ ಮಸ್ಕ್ ನೀಡಿರುವ ಬೆಂಬಲದ ಬಗ್ಗೆ ಚರ್ಚೆ ಇನ್ನೂ ಮುಂದುವರಿದಿದೆ.