300ಕ್ಕೂ ಹೆಚ್ಚು ಸಿನಿಮಾಗಳು, 3 ಬಾರಿ ಮುಖ್ಯಮಂತ್ರಿ ಈ ದಿಗ್ಗಜ ನಟನ ಜೀವನವೇ ಸಿನೆಮಾ!

•   Fri, May 29 2026 12:10:37 PM



• ಆಂದ್ರಪ್ರದೇಶ, ಮೇ. 29 (DaijiworldNews/TA): ದಕ್ಷಿಣ ಭಾರತೀಯ ಸಿನಿರಂಗದಲ್ಲಿ ದೇವರ ಪಾತ್ರಗಳ ಮೂಲಕ ಕೋಟ್ಯಂತರ ಅಭಿಮಾನಿಗಳ ಮನ ಗೆದ್ದ ನಟ, ರಾಜಕೀಯಕ್ಕೆ ಬಂದು ಆಂಧ್ರಪ್ರದೇಶ ರಾಜಕೀಯದ ದಿಕ್ಕೇ ಬದಲಿಸಿದ ಪ್ರಭಾವಿ ನಾಯಕ, ಮೂರು ಬಾರಿ ಮುಖ್ಯಮಂತ್ರಿ ಪಟ್ಟ ಅಲಂಕರಿಸಿದ ದಿಗ್ಗಜ ವ್ಯಕ್ತಿತ್ವ. ಅವರು ಬೇರೆ ಯಾರೂ ಅಲ್ಲ, ನಂದಮೂರಿ ತಾರಕ್ ರಾಮರಾವ್, ಅಂದರೆ ಎಲ್ಲರ ಪ್ರೀತಿಯ ಎನ್‌ಟಿಆರ್. ಇಂದಿನ ತೆಲುಗು ಚಿತ್ರರಂಗದ ಜಾಗತಿಕ ಖ್ಯಾತಿಯ ನಟ ಜೂನಿಯರ್ ಎನ್‌ಟಿಆರ್ ಅವರ ಮೊಮ್ಮಗ ಎಂಬುದು ಮತ್ತೊಂದು ವಿಶೇಷ.

  

  ಬಡತನದಿಂದ ಆರಂಭವಾದ ಜೀವನ : 1923ರ ಮೇ 28ರಂದು ಆಂಧ್ರಪ್ರದೇಶದ ಒಂದು ಸಣ್ಣ ಹಳ್ಳಿಯಲ್ಲಿ ಜನಿಸಿದ ಎನ್‌ಟಿಆರ್ ಅವರ ಬಾಲ್ಯ ಅತ್ಯಂತ ಕಷ್ಟಕರವಾಗಿತ್ತು. ಕುಟುಂಬದ ಪರಿಸ್ಥಿತಿ ದುರ್ಬಲವಾಗಿದ್ದ ಕಾರಣ, ಶಾಲಾ ದಿನಗಳಲ್ಲೇ ಅವರು ಹಾಲು ಮಾರಾಟ ಮಾಡುವ ಕೆಲಸ ಮಾಡುತ್ತಿದ್ದರು.

  ಶಿಕ್ಷಣ ಪೂರ್ಣಗೊಳಿಸಿದ ಬಳಿಕ ಅವರಿಗೆ ಸರ್ಕಾರಿ ಉದ್ಯೋಗವೂ ದೊರಕಿತ್ತು. ಆದರೆ ನಟನೆಯ ಮೇಲಿನ ಅಪಾರ ಆಸಕ್ತಿ ಅವರನ್ನು ಬೇರೆ ದಾರಿಗೆ ಕೊಂಡೊಯ್ದಿತು. ಕೇವಲ ಮೂರು ವಾರಗಳಲ್ಲೇ ಸರ್ಕಾರಿ ಕೆಲಸಕ್ಕೆ ರಾಜೀನಾಮೆ ನೀಡಿ ಸಿನಿರಂಗದಲ್ಲಿ ಅದೃಷ್ಟ ಪರೀಕ್ಷಿಸಲು ಮುಂದಾದರು. ಕಾಲೇಜು ದಿನಗಳಲ್ಲಿ ನಾಟಕಗಳಲ್ಲಿ ಮಹಿಳಾ ಪಾತ್ರ ನಿರ್ವಹಿಸುವ ಮೂಲಕ ಅವರ ನಟನಾ ಪಯಣ ಆರಂಭವಾಗಿತ್ತು.

  300ಕ್ಕೂ ಹೆಚ್ಚು ಸಿನಿಮಾಗಳಲ್ಲಿ ಅಭಿನಯ : 1949ರಲ್ಲಿ ಬಿಡುಗಡೆಯಾದ ‘ಮನ ದೇಶಂ’ ಚಿತ್ರದ ಮೂಲಕ ಎನ್‌ಟಿಆರ್ ಚಿತ್ರರಂಗ ಪ್ರವೇಶಿಸಿದರು. ಬಳಿಕ ಅವರು ತೆಲುಗು ಚಿತ್ರರಂಗದಲ್ಲಿ ಅಪ್ರತಿಮ ಅಧ್ಯಾಯವನ್ನೇ ಸೃಷ್ಟಿಸಿದರು. ತಮ್ಮ ವೃತ್ತಿಜೀವನದಲ್ಲಿ 300ಕ್ಕೂ ಹೆಚ್ಚು ಸಿನಿಮಾಗಳಲ್ಲಿ ಅಭಿನಯಿಸಿದ ಅವರು, ವಿಶೇಷವಾಗಿ ರಾಮ ಮತ್ತು ಕೃಷ್ಣನ ಪಾತ್ರಗಳ ಮೂಲಕ ಅಪಾರ ಜನಪ್ರಿಯತೆ ಗಳಿಸಿದರು.

  ಅವರು ಶ್ರೀಕೃಷ್ಣನ ಪಾತ್ರವನ್ನು 17 ಬಾರಿ ನಿರ್ವಹಿಸಿದ್ದು ವಿಶೇಷ ದಾಖಲೆ ಎಂದು ಪರಿಗಣಿಸಲಾಗಿದೆ. ಚಿತ್ರಮಂದಿರಗಳಲ್ಲಿ ಅವರ ದೇವರ ಪಾತ್ರಗಳನ್ನು ನೋಡಿ ಅಭಿಮಾನಿಗಳು ಕೈಮುಗಿದು ನಿಂತ ಘಟನೆಗಳು ಆ ಕಾಲದಲ್ಲಿ ಸಾಮಾನ್ಯವಾಗಿದ್ದವು. 1993ರಲ್ಲಿ ಬಿಡುಗಡೆಯಾದ ‘ಶ್ರೀನಾಥ ಕವಿ ಸರ್ವಭೌಮಡು’ ಅವರ ಕೊನೆಯ ಚಿತ್ರವಾಗಿತ್ತು.

  ರಾಜಕೀಯಕ್ಕೆ ಎಂಟ್ರಿ, ಕಾಂಗ್ರೆಸ್‌ಗೆ ಭಾರೀ ಶಾಕ್ : ಚಿತ್ರರಂಗದಲ್ಲಿ ಸೂಪರ್ ಸ್ಟಾರ್ ಆಗಿದ್ದ ಎನ್‌ಟಿಆರ್, 1982ರಲ್ಲಿ ‘ತೆಲುಗು ದೇಶಂ ಪಕ್ಷ’ (ಟಿಡಿಪಿ) ಸ್ಥಾಪಿಸುವ ಮೂಲಕ ರಾಜಕೀಯ ಪ್ರವೇಶಿಸಿದರು. ಆ ಸಮಯದಲ್ಲಿ ಕಾಂಗ್ರೆಸ್ ಭದ್ರಕೋಟೆಯಾಗಿದ್ದ ಆಂಧ್ರಪ್ರದೇಶದಲ್ಲಿ ಎನ್‌ಟಿಆರ್ ಜನಪ್ರಿಯತೆಯ ಅಲೆ ದೊಡ್ಡ ರಾಜಕೀಯ ಬದಲಾವಣೆಗೆ ಕಾರಣವಾಯಿತು.

  1983ರಲ್ಲಿ ಮೊದಲ ಬಾರಿಗೆ ಮುಖ್ಯಮಂತ್ರಿಯಾಗಿ ಅಧಿಕಾರ ಸ್ವೀಕರಿಸಿದ ಅವರು, 1983ರಿಂದ 1994ರ ಅವಧಿಯಲ್ಲಿ ಒಟ್ಟು ಮೂರು ಬಾರಿ ಆಂಧ್ರಪ್ರದೇಶದ ಮುಖ್ಯಮಂತ್ರಿಯಾದರು. ಪ್ರಸ್ತುತ ಆಂಧ್ರಪ್ರದೇಶ ರಾಜಕೀಯದ ಪ್ರಮುಖ ನಾಯಕ ಚಂದ್ರಬಾಬು ನಾಯ್ಡು ಅವರು ಎನ್‌ಟಿಆರ್ ಅವರ ಅಳಿಯ ಎಂಬುದು ಗಮನಾರ್ಹ.

  ವೈಯಕ್ತಿಕ ಜೀವನವೂ ಕುತೂಹಲಕರ : ಎನ್‌ಟಿಆರ್ ಅವರು ಕೇವಲ 20ನೇ ವಯಸ್ಸಿನಲ್ಲಿ, 1942ರಲ್ಲಿ ತಮ್ಮ ತಾಯಿಯ ಚಿಕ್ಕಪ್ಪನ ಮಗಳು ಬಸವ ತಾರಕಂ ಅವರನ್ನು ವಿವಾಹವಾದರು. 43 ವರ್ಷಗಳ ದಾಂಪತ್ಯ ಜೀವನದ ಬಳಿಕ ಅವರ ಮೊದಲ ಪತ್ನಿ ನಿಧನರಾದರು. ಬಳಿಕ ತಮ್ಮ 70ನೇ ವಯಸ್ಸಿನಲ್ಲಿ ತೆಲುಗು ಲೇಖಕಿ ಲಕ್ಷ್ಮೀ ಪಾರ್ವತಿ ಅವರನ್ನು ವಿವಾಹವಾದರು. ಎರಡು ಮದುವೆಗಳಿಂದ ಅವರಿಗೆ ಒಟ್ಟು 12 ಮಕ್ಕಳು ಇದ್ದರು.

  ಜನಮನದಲ್ಲಿ ಅಮರವಾದ ನಾಯಕ : ನಟನಾಗಿ, ರಾಜಕಾರಣಿಯಾಗಿ, ಜನನಾಯಕನಾಗಿ ಎನ್‌ಟಿಆರ್ ತಮ್ಮದೇ ಆದ ವಿಶಿಷ್ಟ ಛಾಪು ಮೂಡಿಸಿದ್ದಾರೆ. ಬಡತನದಿಂದ ಆರಂಭವಾದ ಅವರ ಪಯಣ, ಸಿನಿರಂಗ ಮತ್ತು ರಾಜಕೀಯದಲ್ಲಿ ಸಾಧಿಸಿದ ಎತ್ತರ ಇಂದಿಗೂ ಅನೇಕರಿಗೆ ಪ್ರೇರಣೆಯಾಗಿದೆ.