ಜಪಾನ್​​ನಿಂದ ಬಂದು ರಾಮ್ ಚರಣ್​​ಗೆ ಬಿರಿಯಾನಿ ಮಾಡಿಕೊಟ್ಟ ಶೆಫ್

•   Wed, Jan 07 2026 01:31:35 PM



• ಹೈದರಾಬಾದ್​​, ಜ. 07 (DaijiworldNews/AK): ರಾಮ್ ಚರಣ್​ಗೂ ಜಪಾನಿಗೂ ಆತ್ಮೀಯ ಬಂಧವಿದೆ. ಜಪಾನಿನಲ್ಲಿ ರಾಮ್ ಚರಣ್​​ಗೆ ದೊಡ್ಡ ಅಭಿಮಾನಿ ವರ್ಗವಿದೆ. ಇದೀಗ ರಾಮ್ ಚರಣ್ ಮನೆಗೆ ಬಿರಿಯಾನಿ ಮಾಡಲು ಜಪಾನಿನಿಂದ ಶೆಫ್ ಒಬ್ಬರು ಬಂದಿದ್ದಾರೆ. ರಾಮ್ ಚರಣ್ ಮನೆಯಲ್ಲಿ ಜಪಾನಿನ ಶೆಫ್ ಬಿರಿಯಾನಿ ಮಾಡಿ ಮನೆಯವರಿಗೆ ಉಣಬಡಿಸುತ್ತಿರುವ ಫೋಟೊ, ವಿಡಿಯೋಗಳು ಇದೀಗ ಸಾಮಾಜಿಕ ಜಾಲತಾಣದಲ್ಲಿ ವೈರಲ್ ಆಗಿವೆ.

  ರಾಮ್ ಚರಣ್ ಮನೆಯಲ್ಲಿ ಬಿರಿಯಾನಿ ಮಾಡಿರುವ ಶೆಫ್​​ನ ಹೆಸರು ಟಕಮಾಸ ಓಸವಾ. ಇವರು ಜಪಾನಿನ ಸೆಲೆಬ್ರಿಟಿ ಶೆಫ್. ಇವರು ಬಿರಿಯಾನಿ ಮಾಡುವುದರಲ್ಲಿ ಅದರಲ್ಲೂ ಪಾಟ್ ಬಿರಿಯಾನಿ ಮಾಡುವುದರಲ್ಲಿ ನಿಷ್ಣಾತರು. ಟಕಮಾಸಾ ಒಸಾವಾ ಅವರನ್ನು ಬಿರಿಯಾನಿ ಒಸಾವ ಎಂದೇ ಕರೆಯುತ್ತಾರೆ ಅಭಿಮಾನಿಗಳು. ಮಿಷಲಿನ್ ಗೈಡ್ ಪ್ರಶಸ್ತಿಯನ್ನು ಸಹ ಒಸಾವಾ ಪಡೆದುಕೊಂಡಿದ್ದಾರೆ.

  ಒಸಾವ ಅವರು ಸೆಲೆಬ್ರಿಟಿ ಶೆಫ್. ಅವರು ಒಂದು ಬಾರಿಗೆ ಕೇವಲ 10 ಜನರಿಗೆ ಮಾತ್ರವೇ ಬಿರಿಯಾನಿ ಮಾಡುತ್ತಾರೆ. ಅದಕ್ಕೂ ಪ್ರೀ ಬುಕಿಂಗ್ ಮಾಡಿಕೊಳ್ಳಬೇಕು. ಅವರ ಕೈರುಚಿ ಸವಿಯಲು ಜನ ಸಾಲು ಗಟ್ಟಿರುತ್ತಾರೆ. ತಿಂಗಳುಗಟ್ಟಲೆ ಮುಂಗಡ ಬುಕಿಂಗ್ ಆಗಿರುತ್ತದೆಯಂತೆ. ಜಪಾನಿನಲ್ಲಿ ರಾಮ್ ಚರಣ್ ದೊಡ್ಡ ಸ್ಟಾರ್ ಆಗಿರುವ ಕಾರಣ ಒಸಾವಾ ಅವರು ಹೈದರಾಬಾದ್​​ನ ರಾಮ್ ಚರಣ್ ನಿವಾಸಕ್ಕೆ ಬಂದು ಬಿರಿಯಾನಿ ಮಾಡಿಕೊಟ್ಟಿದ್ದಾರೆ.

  ಬಿರಿಯಾನಿ ಸವಿದ ರಾಮ್ ಚರಣ್, ಒಸಾವಾ ಕೈರುಚಿಯನ್ನು ಕೊಂಡಾಡಿದ್ದಾರೆ. ರಾಮ್ ಚರಣ್ ಮಾತ್ರವಲ್ಲದೆ ಪತ್ನಿ ಉಪಾಸನಾ, ತಾಯಿ ಸುರೇಖಾ ಇನ್ನೂ ಕೆಲವು ಕುಟುಂಬ ಸದಸ್ಯರು ಒಸಾವಾ ಮಾಡಿದ ಬಿರಿಯಾನಿ ಸವಿದು ಸಂತಸ ವ್ಯಕ್ತಪಡಿಸಿದ್ದಾರೆ.