ನಟ ವಿಜಯ್​ ದೇವರಕೊಂಡ ಸಿನಿಮಾ ಟ್ರೋಲ್ ಮಾಡಿದವರ ವಿರುದ್ಧ್ ದೂರು ದಾಖಲು

•   Sun, Apr 07 2024 04:11:06 PM



• ಹೈದರಾಬಾದ್, ಏ 07 (DaijiworldNews/AA): ನಟ ವಿಜಯ್​ ದೇವರಕೊಂಡ ಹಾಗೂ ಬಾಲಿವುಡ್​ ಬೆಡಗಿ ಮೃಣಾಲ್​ ಠಾಕೂರ್​ ಅಭಿನಯದ 'ದಿ ಫ್ಯಾಮಿಲಿ ಸ್ಟಾರ್​' ಸಿನಿಮಾ ಇತ್ತೀಚೆಗೆ ಬಿಡುಗಡೆಯಾಗಿದ್ದು, ಸಿನಿಮಾ ಬಿಡುಗಡೆಯಾದ ಮೊದಲ ದಿನವೇ ಮಿಶ್ರ ಪ್ರತಿಕ್ರಿಯೆ ದೊರೆತಿದೆ. ಬಳಿಕ ಸಿನಿಮಾವನ್ನು ಸಾಮಾಜಿಕ ಜಾಲತಾಣದಲ್ಲಿ ಟ್ರೋಲ್ ಮಾಡಲು ಪ್ರಾರಂಭಿಸಿದ್ದು, ಅಂತವರ ವಿರುದ್ಧ 'ದಿ ಫ್ಯಾಮಿಲಿ ಸ್ಟಾರ್​' ಚಿತ್ರತಂಡ ಸೈಬರ್​ ಪೊಲೀಸರಿಗೆ ದೂರು ನೀಡಿದೆ.

  ನಟ ವಿಜಯ್ ದೇವರಕೊಂಡ ಅವರ ಅಭಿಮಾನಿಗಳು ಹೇಗಿದ್ದಾರೋ ಹಾಗೇಯೇ ಅವರನ್ನು ದ್ವೇಷಿಸುವ ಒಂದು ವರ್ಗವೂ ಇದೆ. ಹೀಗಾಗಿ ಅವರ 'ದಿ ಫ್ಯಾಮಿಲಿ ಸ್ಟಾರ್​' ಸಿನಿಮಾವನ್ನು ನೆಟ್ಟಿಗರು ಟ್ರೋಲ್ ಮಾಡುತ್ತಿದ್ದಾರೆ. ಈ ಹಿನ್ನಲೆ ಸಾಮಾಜಿಕ ಜಾಲತಾಣದಲ್ಲಿ ಟ್ರೋಲ್ ಮಾಡಿದವರ ವಿರುದ್ಧ ಚಿತ್ರತಂಡ ಕಾನೂನಿನಡಿ ಕ್ರಮ ಕೈಗೊಳ್ಳಲು ನಿರ್ಧರಿಸಿದೆ.

  ಈ ಬಗ್ಗೆ ವಿಜಯ್​ ದೇವರಕೊಂಡ ಅವರ ಮ್ಯಾನೇಜರ್​ ಹಾಗೂ ಅಭಿಮಾನಿ ಸಂಘದ ಅಧ್ಯಕ್ಷರು ಸೈಬರ್​ ಪೊಲೀಸರಿಗೆ ದೂರು ನೀಡಿದ್ದಾರೆ. ಇನ್ನು ದೂರಿನೊಂದಿಗೆ ಟ್ರೋಲ್​ ಮಾಡಿದ ಸೋಶಿಯಲ್​ ಮೀಡಿಯಾ ಖಾತೆಗಳ ಸ್ಕ್ರೀನ್​ ಶಾಟ್​ಗಳಂತಹ ಅನೇಕ ಸಾಕ್ಷಿಗಳನ್ನು ಪೊಲೀಸರಿಗೆ ನೀಡಿದ್ದಾರೆ. ಇನ್ನು ಪೊಲೀಸರು ಈ ಘಟನೆಯ ಬಗ್ಗೆ ಯಾವ ರೀತಿಯ ಕ್ರಮ ತೆಗೆದುಕೊಳ್ಳಲಿದ್ದಾರೆ ಎಂದು ಕಾದುನೋಡಬೇಕಿದೆ.