ಶ್ರೀಲಂಕಾಗೆ ಅನಗತ್ಯ ಪ್ರಯಾಣ ಮಾಡಬೇಡಿ ಎಂದು ಭಾರತೀಯರಿಗೆ ಕೇಂದ್ರ ಸರ್ಕಾರದಿಂದ ಸೂಚನೆ

•   Sun, Apr 28 2019 08:11:00 AM



• ನವದೆಹಲಿ, ಎ28(Daijiworld News/SS): ಭಾರತದ ನಾಗರಿಕರಿಗೆ ವಿದೇಶಾಂಗ ವ್ಯವಹಾರಗಳ ಸಚಿವಾಲಯ ಸರಣಿ ಬಾಂಬ್ ಸ್ಫೋಟ ಹಿನ್ನೆಲೆಯಲ್ಲಿ ಶ್ರೀಲಂಕಾಗೆ ಅನಗತ್ಯ ಪ್ರಯಾಣವನ್ನು ಬೆಳೆಸದಿರಿ ಎಂದು ಸೂಚನೆ ನೀಡಿದೆ.

  

  ಈಸ್ಟರ್ ಭಾನುವಾರ ನಡೆದ ಆತ್ಮಹತ್ಯಾ ಬಾಂಬ್ ದಾಳಿಯಲ್ಲಿ 250 ಕ್ಕಿಂತಲೂ ಹೆಚ್ಚು ಜನ ಮೃತಪಟ್ಟ ಹಿನ್ನೆಲೆಯಲ್ಲಿ ಶ್ರೀಲಂಕಾಗೆ ಅನಗತ್ಯ ಪ್ರಯಾಣವನ್ನು ಬೆಳೆಸದಿರಿ ಎಂದು ಸೂಚನೆ ನೀಡಿದೆ. ಉಗ್ರ ದಾಳಿಯಾದ ಬಳಿಕ ಶ್ರೀಲಂಕಾದಾದ್ಯಂತ ಭದ್ರತೆಯ ದೃಷ್ಠಿಯಿಂದ ಶ್ರೀಲಂಕಾಕ್ಕೆ ಪ್ರಯಾಣಿಸಲು ಉದ್ದೇಶಿಸಿರುವ ಭಾರತೀಯರು ಅನಗತ್ಯ ಪ್ರಯಾಣವನ್ನು ಕೈಗೊಳ್ಳಬಾರದು ಎಂದು ವಿದೇಶಾಂಗ ಸಚಿವಾಲಯ ಸಲಹೆ ನೀಡಿದೆ.

  ಒಂದು ವೇಳೆ ಅಗತ್ಯ ಅಥವಾ ತುರ್ತು ಸಂದರ್ಭಗಳಲ್ಲಿ ಪ್ರಯಾಣ ಬೆಳೆಸಲೇಬೇಕಾಗಿದ್ದರೆ ಕೊಲಂಬೋದ ಭಾರತದ ಹೈ ಕಮೀಷನ್‌ ಅಥವಾ ಯಾವುದೇ ಸಹಾಯದ ಅಗತ್ಯವಿದ್ದರೆ ಕ್ಯಾಂಡಿ ಅಥವಾ ಕಾನ್ಸುಲೇಟ್‌ ಸಹಾಯಕ ಹೈ ಕಮಿಷನ್‌ನನ್ನು ಸಂಪರ್ಕಿಸಬಹುದು ಎಂದು ಹೇಳಿದೆ.

  ಇದಲ್ಲದೆ ಭಾರತೀಯ ಹೈ ಕಮಿಷನ್‌ನ ಸಹಾಯವಾಣಿ ನಂಬರ್‌ ಲಭ್ಯವಿದ್ದು, ಮಿಷನ್‌ ವೆಬ್‌ಸೈಟ್‌ನಲ್ಲಿ ಇವುಗಳನ್ನು ಪಡೆಯಬಹುದು ಎಂದು ತಿಳಿಸಿದೆ.

  ಈಗಾಗಲೇ ಶ್ರೀಲಂಕಾ ಸರ್ಕಾರವು ಲಂಕಾಕ್ಕೆ ಬಿಗಿ ಭದ್ರತೆಯನ್ನು ಒದಗಿಸಿದೆ. ರಾತ್ರಿ ಸೇರಿದಂತೆ ಎಲ್ಲೆಡೆ ಕರ್ಫ್ಯೂ ಜಾರಿಯಿದ್ದು, ದೇಶಾದ್ಯಂತ ಇರುವ ತುರ್ತು ಪರಿಸ್ಥಿತಿಯಿಂದಾಗಿ ಈ ವೇಳೆ ಪ್ರಯಾಣದ ಮೇಲೆ ಪರಿಣಾಮ ಬೀರಲಿದೆ.