ಜೀವನದ ಮೂರು ಕಹಿ ಘಟನೆಗಳನ್ನು ಬಿಚ್ಚಿಟ್ಟ ನಟಿ ಸಮಂತಾ ರುತ್​ ಪ್ರಭು

•   Thu, Nov 09 2023 06:34:43 PM



• ಹೈದರಾಬಾದ್, ನ. 9 ( DaijiworldNews/SK): ಟಾಲಿವುಡ್ ಸ್ಟಾರ್ ಹೀರೋಯಿನ್ ಸಮಂತಾ ರುತ್ ಪ್ರಭು ​ಸಿನಿಮಾ ಇಂಡಸ್ಟ್ರಿಯಲ್ಲಿ ಸಖತ್​ ಸದ್ದು ಮಾಡಿರುವ ಚೆಲುವೆ. ಈಗಾಗಲೇ ವಿವಿಧ ಸಂದರ್ಶನಗಳು ಮತ್ತು ಸಾಮಾಜಿಕ ಮಾಧ್ಯಮಗಳ ಮೂಲಕ 'ಮಯೋಸಿಟಿಸ್‌'ನಿಂದ ಬಳಲುತ್ತಿರುವ ಬಗ್ಗೆ ಹೇಳಿಕೊಂಡಿರುವ ನಟಿ ಸಮಂತಾ ರುತ್ ಪ್ರಭು ಅವರು ಕಳೆದ ಎರಡು ವರ್ಷಗಳಲ್ಲಿ ಎದುರಿಸಿದ ವೈಯಕ್ತಿಕ ಮತ್ತು ವೃತ್ತಿಜೀವನದ ಸವಾಲುಗಳ ಕುರಿತು ಹಾರ್ಪರ್​ ಬಜಾರ್​ ಇಂಡಿಯಾ’ಗೆ ನೀಡಿದ ಸಂದರ್ಶನದಲ್ಲಿ ಬಹಿರಂಗ ಪಡಿಸಿದ್ದಾರೆ.

  ಇತ್ತೀಚೆಗೆ ಸಂದರ್ಶನವೊಂದರಲ್ಲಿ ಮಾತನಾಡಿದ ನಟಿ ಸಮಂತಾ ರುತ್​ ಪ್ರಭು ತಮ್ಮ ಜೀವನದ ಕಹಿ ಘಟನೆಗಳನ್ನು ನೆನಪಿಸಿಕೊಂಡರು. ದಾಂಪತ್ಯ ಜೀವನ ಅಂತ್ಯಗೊಂಡ ಸಂದರ್ಭ ಆರೋಗ್ಯ ಹದಗೆಟ್ಟಿತು. ಇದರ ಜೊತೆಗೆ ಸಿನಿ ವೃತ್ತಿಜೀವನಕ್ಕೂ ಹಿನ್ನಡೆಯಾಗಿತ್ತು. ಎಲ್ಲಾ ಸಮಸ್ಯೆಗಳೂ ಒಂದೇ ಬಾರಿ ನನ್ನ ಮೇಲೆ ಅಪ್ಪಳಿಸಿತ್ತು ಎಂದು ತಿಳಿಸಿದರು.

  ಈ ದೇಶದಲ್ಲಿ ಜನರು ಪ್ರೀತಿಸುವಂತಹ ಸ್ಟಾರ್​ ಆಗುವುದು ಸುಲಭದ ಮಾತಲ್ಲ ಅದೊಂದು ನನಗೆ ಬಹುದೊಡ್ದ ಉಡುಗೊರೆ. ಅಭಿಮಾನಿಗಳ ಪ್ರೀತಿಗೆ ನಾನೆಂದು ಚಿರಋಣಿಯಾಗಿರುತ್ತೇನೆ. ಕಳೆದ 2 ವರ್ಷಗಳಲ್ಲಿ ಬೇರೆ ನಟ-ನಟಿಯರ ಬಗ್ಗೆ ನಾನು ಓದಿ ತಿಳಿದುಕೊಂಡೆ. ಅನಾರೋಗ್ಯಕ್ಕೆ ಒಳಗಾಗಿ, ಟ್ರೋಲ್ ಗೆ​ ಒಳಗಾಗಿ ಮತ್ತೆ ಕಮ್​ಬ್ಯಾಕ್​ ಮಾಡಿದ ಕಲಾವಿದರ ಸಾಧನೆಯ ಕಥೆಗಳನ್ನು ತಿಳಿದು ನಾನು ಸ್ಪೂರ್ತಿ ಪಡೆದುಕೊಂಡಿದ್ದೇನೆ. ಮತ್ತು ಯಶಸ್ಸನ್ನು ಕೇವಲ ಬಾಕ್ಸ್ ಆಫೀಸ್ ಹಿಟ್‌ಗಳು, ಪ್ರಶಸ್ತಿಗಳು, ಪರ್ಫೆಕ್ಟ್​​ ಫಿಸಿಕಲ್​ ಲುಕ್​​ ಅಥವಾ ಫ್ಯಾಷನ್​ನಿಂದ ಮಾತ್ರ ತೂಗಬಾರದು. ಬದಲಿಗೆ ಹೋರಾಟ, ಕಷ್ಟ ಮತ್ತು ಜೀವನದಲ್ಲಿನ ಏರಿಳಿತಗಳು ನಮ್ಮನ್ನು ಗಟ್ಟಿಯಾಗಿಸುತ್ತವೆ ಎಂದು ತಿಳಿಸಿದ್ದಾರೆ.

  ಸಮಂತಾ ರುತ್ ಪ್ರಭು ಹಾಗೂ ನಾಗ ಚೈತನ್ಯ ಜೋಡಿ 2017ರ ಅಕ್ಟೋಬರ್​ನಲ್ಲಿ ದಾಂಪತ್ಯ ಜೀವನಕ್ಕೆ ಕಾಲಿಟ್ಟಿದ್ದರು. ಸುಮಾರು ನಾಲ್ಕು ವರ್ಷಗಳ ನಂತರ, 2021ರ ಅಕ್ಟೋಬರ್​​ನಲ್ಲಿ ತಾವು ಬೇರ್ಪಡುವುದಾಗಿ ಸಾಮಾಜಿಕ ಮಾಧ್ಯಮದಲ್ಲಿ ಹಂಚಿಕೊಳ್ಳುವ ಮೂಲಕ ಫ್ಯಾನ್ಸ್ ಗಳಿಗೆ ಬಿಗ್ ಶಾಕ್ ನೀಡಿದ್ದರು. ಇದರ ಬಗ್ಗೆ ಯಾವುದೇ ಮಾಹಿತಿಯನ್ನು ನೀಡದೆ ಇರುವುದು ಅಭಿಮಾನಿಗಳಲ್ಲಿ ನಿರಾಸೆ ಮೂಡಿಸಿದೆ.