ಸುಬ್ರಹ್ಮಣ್ಯದಲ್ಲಿ ಸುರಿದ ಆಲಿಕಲ್ಲಿನ ಮಳೆ-ಭಯಭೀತರಾದ ಜನತೆ

•   Fri, Apr 05 2019 09:03:00 PM



• ಸುಬ್ರಹ್ಮಣ್ಯ,ಏ05(AZM):ಸುಬ್ರಹ್ಮಣ್ಯ ಹಾಗೂ ಸುತ್ತಮುತ್ತಲ ಪ್ರದೇಶದಲ್ಲಿ ಇಂದು ಭಾರೀ ಗಾಳಿ ಗುಡುಗು ಸೇರಿದಂತೆ ಆಲಿಕಲ್ಲಿನ ಮಳೆ ಸುರಿದಿದ್ದು, ಕೆಲ ಕಾಲ ಜನರು ಭಯಭೀತರಾಗಿದ್ದರು.

  

  ಹದಿನೈದು ನಿಮಿಷಗಳ ಕಾಲ ನಿರಂತರ ಸುರಿದ ಆಲಿಕಲ್ಲಿನ ಮಳೆ ಗೆ ಸ್ಥಳೀಯ ಜನತೆ ಬೆಚ್ಚಿ ಬಿದ್ದಿದ್ದಾರೆ .ಅಲ್ಲದೆ ಮಳೆ ಬರುವ ಮುಂಚಿತವಾಗಿ ಬೀಸಿದ ಗಾಳಿಗೆ ಸುಬ್ರಹ್ಮಣ್ಯ ನೂಚಿಲ ಮನೆಯ ಮೇಲೆ ಬೃಹದಾಕಾರದ ಮರ ಬಿದ್ದು ಮನೆ ಹಾನಿಯಾಗಿದೆ. ಅದೃಷ್ಟಾವಶತ್ ಮನೆಯಲ್ಲಿ ಯಾರೂ ಇಲ್ಲದಿದ್ದುದರಿಂದ ಯಾವುದೇ ಪ್ರಾಣಾಪಾಯ ಸಂಭವಿಸಿಲ್ಲ .ಸುಬ್ರಹ್ಮಣ್ಯ ಅಲ್ಲದೆ ಸುತ್ತಮುತ್ತಲ ಪ್ರದೇಶಗಳ ಕೆಲವು ಕೃಷಿ ತೋಟಗಳು ವಿಪರೀತ ಗಾಳಿಗೆ ಹಾನಿಯಾಗಿದೆ.

  ನಿರಂತರ ಸುರಿದ ಮಳೆಗೆ ವಾತಾವರಣ ತಂಪಾಗಿದೆಯಾದರೂ ಆಲಿಕಲ್ಲಿನ ಮಳೆ ಜನರನ್ನು ಭಯಭೀತರನ್ನಾಗಿಸಿದೆ. ಹೆಂಗಸರು ಮಕ್ಕಳು ಸೇರಿದಂತೆ ಸಾರ್ವಜನಿಕರು ಮನೆಯಿಂದ ಹೊರಗೆ ಹೋಗಲು ಸಾಧ್ಯವಾಗದ ಪರಿಸ್ಥಿತಿ ಬಂದೊದಗಿತ್ತು.