ಐಟಿ ದಾಳಿ: ತಮಿಳುನಾಡಿನ ಗೋದಾಮಿನಲ್ಲಿದ್ದ ಮೂಟೆ ಮೂಟೆ ಹಣ ವಶ

•   Mon, Apr 01 2019 02:10:56 PM



• ವೇಲೂರು,ಏ 1 (MSP): ಲೋಕಸಭೆ ಚುನಾವಣೆಗೆ ಸಜ್ಜಾಗುತ್ತಿರುವ ತಮಿಳುನಾಡಿನಲ್ಲಿ ಹಣದ ಹೊಳೆಯೇ ಹರಿಸಲಾಗುತ್ತಿದೆಯಾ ಎನ್ನುವ ಅನುಮಾನ ಕಾಡಲಾರಂಭಿಸಿದೆ. ಮಾರ್ಚ್‌ 29ರ ರಾತ್ರಿ ದಾಖಲೆಗಳಿಲ್ಲದ ಭಾರೀ ಪ್ರಮಾಣದ ನಗದು ಹಣವನ್ನು ಐಟಿ ಅಧಿಕಾರಿಗಳು ವಶಪಡಿಸಿಕೊಂಡಿದ್ದಾರೆ. ಅಂದು ನಡುರಾತ್ರಿ ಕಾಲೇಜೊಂದರಿಂದ ಹೊರಗೆ ಒಯ್ದು ಸಿಮೆಂಟ್​ ಗೋದಾಮಿನಲ್ಲಿ ಹಣ ಶೇಖರಿಸುತ್ತಿದ್ದಾಗ ಆದಾಯ ತೆರಿಗೆ ಅಧಿಕಾರಿಗಳು ದಾಳಿ ನಡೆಸಿದ್ದಾರೆ. ಈ ವೇಳೆ ಕಂತೆ ಕಂತೆ ಹಣ ಪತ್ತೆಯಾಗಿದೆ. ಈ ಹಣವನ್ನು ವಿಭಾಗ ಮತ್ತು ವಾರ್ಡ್‌ವಾರುಗಳಿಗೆ ಹಂಚಲೆಂದು ದೊಡ್ಡ ಮೊತ್ತದ ನಗದನ್ನು ರಟ್ಟಿನ ಪೆಟ್ಟಿಗೆಗಳಲ್ಲಿ ಬೇರೆ ಬೇರೆಯಾಗಿ ತುಂಬಿಸಿ ಇಡಲಾಗಿತ್ತು ಎನ್ನಲಾಗಿದೆ.

  

  ಐಟಿ ಅಧಿಕಾರಿಗಳು ಕಲೆ ಹಾಕಿದ ಮಾಹಿತಿಯಂತೆ ವೇಲೂರ್​​ನ ಕಾಟ್ಪಾಡಿಯಲ್ಲಿರುವ ಕಿಂಗ್ಸ್​ಟನ್​ ಎಂಜಿನಿಯರಿಂಗ್​ ಕಾಲೇಜು ಮತ್ತು ದೊರೈ ಮುರುಗನ್ ಬಿ.ಎಡ್ ಕಾಲೇಜಿನಿಂದ ಹಣದ ಮೂಟೆಗಳನ್ನು ಸಿಮೆಂಟ್​ ಗೋದಾಮಿ ಸಾಗಿಸಲಾಗಿತ್ತು ಎಂದು ತಿಳಿದುಬಂದಿದೆ. ಡಿಎಂಕೆ ಪಕ್ಷದ ಖಜಾಂಜಿ ​​ದೊರೈ ಮುರುಗನ್ ಅವರಿಗೆ ಈ ಎರಡೂ ಕಾಲೇಜುಗಳು ಸೇರಿದ್ದು ಎಂದು ತಿಳಿದುಬಂದಿದೆ. ಈ ಹಿನ್ನಲೆಯಲ್ಲಿ ದೊರೈ ಮುರುಗನ್ ನಿವಾಸದ ಮೇಲೂ ಅಧಿಕಾರಿಗಳು ದಾಳಿ ನಡೆಸಿದ್ದಾರೆ. ದೊರೈ ಮುರುಗನ್ ಪುತ್ರ ವೇಲೂರು ಲೋಕಸಭಾ ಕ್ಷೇತ್ರದಿಂದ ಡಿಎಂಕೆ ಪಕ್ಷದ ಅಭ್ಯರ್ಥಿಯಾಗಿ ಕಣಕ್ಕಿಳಿದಿದ್ದಾರೆ.

  ಮತದಾರರನ್ನು ಓಲೈಸಲು ಹಣ ಹಂಚುವ ಕೆಟ್ಟ ಪರಂಪರೆ ತಮಿಳುನಾಡಿನಲ್ಲಿ ಹಿಂದಿನಿಂದಲೂ ಚಾಲ್ತಿಯಲ್ಲಿದೆ.