ನವದೆಹಲಿ, ಮಾ 24 (DaijiworldNews/DB): ಈ ವರ್ಷದ ಸೆಪ್ಟಂಬರ್ನಲ್ಲಿ ನಡೆಯಲಿರುವ ಏಷ್ಯಾ ಕಪ್ ಕೂಟಕ್ಕೆ ಪಾಕಿಸ್ತಾನವು ಅತಿಥೇಯವಾಗುವುದು ಬಹುತೇಕ ಅಂತಿಮಗೊಂಡಿದೆ. ಆದರೆ ಟೀಂ ಇಂಡಿಯಾದ ಪಂದ್ಯಗಳು ಪಾಕ್ನಿಂದ ದೂರವಿರುವ ಸಾಗರೋತ್ತರ ತಟಸ್ಥ ಸ್ಥಳವೊಂದರಲ್ಲಿ ನಡೆಯಲಿದೆ.
![](https://daijiworld.ap-south-1.linodeobjects.com/Linode/img_tv247/DB-01032023-asia_cup.jpg)
ಏಷ್ಯಾ ಕಪ್ ಆತಿಥ್ಯ ಹಕ್ಕುಗಳ ಕುರಿತು ಪಿಸಿಬಿ ಮತ್ತು ಬಿಸಿಸಿಐ ನಡುವೆ ಸಂಘರ್ಷ ಏರ್ಪಟ್ಟಿತ್ತು. ಈ ಕೂಟದ ಆತಿಥ್ಯಕ್ಕಾಗಿ ಪಾಕಿಸ್ತಾನ ಪಟ್ಟು ಹಿಡಿದಿದ್ದು, ಇದೀಗ ಆತಿಥ್ಯವನ್ನು ಅದೇ ರಾಷ್ಟ್ರ ವಹಿಸಲಿದೆ ಎಂದು ತಿಳಿದು ಬಂದಿದೆ. ಆದರೆ ಟೀಂ ಇಂಡಿಯಾ ಈ ಪಂದ್ಯಕ್ಕೆ ಪಾಕಿಸ್ತಾನಕ್ಕೆ ತೆರಳಲು ನಿರಾಕರಿಸಿರುವುದರಿಂದ ಪಾಕ್ನಿಂದ ದೂರದಲ್ಲಿರುವ ಸಾಗರೋತ್ತರ ತಟಸ್ಥ ಸ್ಥಳವೊಂದರಲ್ಲಿ ಟೀಂ ಇಂಡಿಯಾ ಆಡಲಿದೆ ಎನ್ನಲಾಗಿದೆ. ಆದರೆ ಆ ತಟಸ್ಥ ಸ್ಥಳ ಯಾವುದು ಎಂಬುದು ಅಂತಿಮಗೊಂಡಿಲ್ಲ.
ಆರು ರಾಷ್ಟ್ರಗಳು ಏಷ್ಯಾ ಕಪ್ನಲ್ಲಿ ಭಾಗವಹಿಸಲಿದ್ದು, ಕ್ವಾಲಿಫೈಯರ್ ತಂಡದೊಂದಿಗೆ ಭಾರತ ಮತ್ತು ಪಾಕಿಸ್ತಾನ ಎರಡೂ ರಾಷ್ಟ್ರಗಳು ಒಂದೇ ಗುಂಪಿನಲ್ಲಿವೆ.