ದೇಶದ ಮೊದಲ ಲೋಕಪಾಲ್ ಆಗಿ ಪಿ.ಸಿ.ಘೋಷ್ ಆಯ್ಕೆ?

•   Sun, Mar 17 2019 05:16:16 PM



• ನವದೆಹಲಿ,ಮಾ.17(AZM):ಸುಪ್ರಿಂ ಕೋರ್ಟ್ ನಿವೃತ್ತ ನ್ಯಾಯಮೂರ್ತಿ ಪಿ.ಸಿ. ಘೋಷ್ ಅವರು ದೇಶದ ಮೊದಲ ಲೋಕಪಾಲ್ ಆಗಿ ಆಯ್ಕೆಯಾಗುವ ಸಾಧ್ಯತೆ ಇದೆ.

  
  

  ಪ್ರಧಾನಮಂತ್ರಿ, ಸುಪ್ರೀಂಕೋರ್ಟ್​ ಮುಖ್ಯ ನ್ಯಾಯಮೂರ್ತಿ, ಲೋಕಸಭಾ ಸ್ಪೀಕರ್​ ಹಾಗೂ ಪ್ರತಿಷ್ಠಿತ ಜ್ಯುರಿಗಳಿದ್ದ ಆಯ್ಕೆ ಸಮಿತಿಯು ಶುಕ್ರವಾರದಂದು ನಡೆದ ಸಭೆಯಲ್ಲಿ ನ್ಯಾ. ಪಿ.ಸಿ.ಘೋಷ್​​ ಅವರನ್ನು ದೇಶದ ಮೊದಲ ಲೋಕಪಾಲ್​ ಆಗಿ ಆಯ್ಕೆ ಮಾಡಿದೆ. ಈ ಕುರಿತು ಶೀಘ್ರದಲ್ಲಿ ಅಧಿಕೃತ ಘೋಷಣೆ ಹೊರಬೀಳಲಿದ್ದು, ಮುಂದಿನ ವಾರ ನ್ಯಾ.ಘೋಷ್​ ಅವರು ದೇಶದ ಮೊದಲ ಲೋಕಪಾಲ್​ ಆಗಿ ನೇಮಕವಾಗುವ ಸಾಧ್ಯತೆ ಇದೆ.ನ್ಯಾ.ಘೋಷ್ ಅವರು​ ಸುಪ್ರೀಂಕೋರ್ಟ್​ ನ್ಯಾಯಮೂರ್ತಿ ಸ್ಥಾನದಿಂದ ಮೇ 2017ರಂದು ನಿವೃತ್ತರಾಗಿದ್ದರು.

  ಹಾಲಿ ಪ್ರಧಾನಿ, ಮಾಜಿ ಪ್ರಧಾನಿ, ಕೇಂದ್ರ ಸಚಿವರು, ಲೋಕಸಭಾ ಸದಸ್ಯರು, ಸಾರ್ವಜನಿಕ ವಲಯದ ಸರ್ಕಾರಿ ಅಧಿಕಾರಿಗಳ ವಿರುದ್ಧ ಕಾನೂನು ಅಡಿಯಲ್ಲಿ ದೂರು ದಾಖಲಾದರೆ ಅವರನ್ನು ತನಿಖೆ ಮಾಡಬಹುದಾದ ಅಧಿಕಾರ ಲೋಕಪಾಲ್​ ಅವರಿಗೆ ಇದೆ. ಮತ್ತು ವರ್ಷಕ್ಕೆ 10 ಲಕ್ಷಕ್ಕಿಂತ ಹೆಚ್ಚಿನ ವಿದೇಶಿ ಧನಸಹಾಯ ಪಡೆದುಕೊಳ್ಳುತ್ತಿರುವ ಎನ್​ಜಿಒಗಳನ್ನು ತನಿಖೆ ನಡೆಸಬಹುದಾಗಿದೆ. ಲೋಕಪಾಲ್​ ಅಧಿಕಾರಾವಧಿ 4 ವರ್ಷವಾಗಿದೆ.