ಪಾಕಿಸ್ತಾನಕ್ಕೆ ವೀಸಾ ನಿರಾಕರಣೆ, ಭಾರತವನ್ನು ದೂರವಿಟ್ಟ-ವಿಶ್ವ ಕುಸ್ತಿ ಒಕ್ಕೂಟ

•   Tue, Mar 05 2019 03:00:59 PM



• ನವದೆಹಲಿ, ಮಾ 05(SM): ಭಾರತದಲ್ಲಿ ನಡೆದ ಶೂಟಿಂಗ್​ ವಿಶ್ವಕಪ್​ ವೇಳೆ ಪಾಕಿಸ್ತಾನದ ಶೂಟರ್​ಗಳಿಗೆ ವೀಸಾ ನಿರಾಕರಣೆ ಮಾಡಿರುವುದು ಭಾರತಕ್ಕೆ ಮುಳುವಾಗಿ ಪರಿಣಮಿಸಿದಂತಿದೆ. ಪಾಕ್ ಆಟಗಾರರ ವೀಸಾ ನಿರಾಕರಣ ಮಾಡಿದ್ದಕ್ಕೆ ಜಾಗತಿಕವಾಗಿ ಎಲ್ಲಾ ದೇಶದ ಫೆಡರೇಶನ್ ಗಳು ಭಾರತವನ್ನು ದೂರ ಇಡಬೇಕೆಂದು ವಿಶ್ವ ಕುಸ್ತಿ ಒಕ್ಕೂಟ ತಿಳಿಸಿದೆ.

  

  ಇತ್ತೀಚೆಗೆ ಜಮ್ಮುಕಾಶ್ಮೀರದ ಪುಲ್ವಾಮಾದಲ್ಲಿ ಉಗ್ರರ ಬಾಂಬ್​ ದಾಳಿಯಲ್ಲಿ 40ಕ್ಕೂ ಹೆಚ್ಚ ಭಾರತೀಯ ಸಿಆರ್​ಪಿಎಫ್​ ಯೋಧರು ಮೃತಪಟ್ಟ ಹಿನ್ನಲೆ ಪಾಕ್ ವಿರುದ್ಧ ದೇಶದೆಲ್ಲೆಡೆ ಆಕ್ರೋಶ ವ್ಯಕ್ತವಾಗಿತ್ತು. ಈ ಹಿನ್ನೆಲೆ ಪಾಕಿಸ್ತಾನದೊಂದಿಗೆ ಯಾವುದೇ ವ್ಯವಹಾರ ನಡೆಸಬಾರದೆಂದು ಭಾರತದಲ್ಲಿ ಕೂಗು ಜೋರಾಗಿತ್ತು. ಇದೇ ಕಾರಣದಿಂದ ಭಾರತ ಪಾಕಿಸ್ತಾನದ ಶೂಟರ್​ಗಳಿಗೆ ವೀಸಾ ನಿರಾಕರಿಸಿತ್ತು.

  ಈ ನಿರ್ಧಾರದ ಬೆನ್ನಲ್ಲೇ ಅಂತಾರಾಷ್ಟ್ರೀಯ ಒಲಂಪಿಕ್​ ಒಕ್ಕೂಟ ಭಾರತದಲ್ಲಿ ಯಾವುದೇ ಕ್ರೀಡಾಕೂಟ ಆಯೋಜನೆ ಮಾಡಲು ಅನುಮತಿ ನೀಡಬಾರದು ಎಂಬುದರ ಬಗ್ಗೆ ಚರ್ಚೆ ಕೂಡ ನಡೆಸಿತ್ತು. ಇದೀಗ ವಿಶ್ವ ಕುಸ್ತಿ ಒಕ್ಕೂಟ ತನ್ನ ನಿರ್ಧಾರ ಪ್ರಕಟಿಸಿದ್ದು, ತನ್ನ ಅಸೋಸಿಯೇಟ್ ರಾಷ್ಟ್ರಗಳಿಗೆ ಭಾರತದಿಂದ ದೂರ ಉಳಿಯುವಂತೆ ತಿಳಿಸಿದೆ ಎನ್ನಲಾಗಿದೆ.