ಮಗನ ಪಬ್‍ಜಿ ಆಟದ ಹುಚ್ಚು - ತಾಯಿ ಬಲಿ, ತಂದೆಯ ಬಂಧನ

•   Thu, May 26 2022 09:27:58 AM



• ಚಿಕ್ಕಮಗಳೂರು, ಮೇ 25 (DaijiworldNews/HR): ಚಿಕ್ಕಮಗಳೂರು ತಾಲೂಕಿನ ಹಾಗಲಖಾನ್ ಎಸ್ಟೇಟ್ ಎಂಬಲ್ಲಿ ಮಗನ ಪಬ್‍ ಜಿ ಆಟದ ಹುಚ್ಚಿಗೆ ತಾಯಿ ಜೀವ ಕಳೆದುಕೊಂಡ ಘಟನೆ ನಡೆದಿದೆ.

  ಹಾಗಲಖಾನ್ ಎಸ್ಟೇಟ್‍ನಲ್ಲಿ ಕೆಲಸ ನಿರ್ವಹಿಸಿಕೊಂಡಿದ್ದ ಇಮ್ತಿಯಾಜ್ ಹಾಗೂ ಮೈಮುನಾ ದಂಪತಿಗಳ ಅಪ್ರಾಪ್ತ ವಯಸ್ಸಿನ ಬಾಲಕ ಯಾವಾಗಲೂ ಮೊಬೈಲ್‍ನಲ್ಲಿ ಪಬ್‍ ಜಿ ವಿಡಿಯೋ ಗೇಮ್ ಆಡುತ್ತಿದ್ದು, ಆಟ ಆಡದಂತೆ ಇಮ್ತಿಯಾಜ್ ಮಗನಿಗೆ ಅನೇಕ ಬಾರೀ ಹೇಳಿದ್ದರೂ ಮಗ ಪಬ್‍ ಜಿ ಆಟ ಆಡುವುದನ್ನು ನಿಲ್ಲಿಸಿರಲಿಲ್ಲ.

  ಇನ್ನು ಇಮ್ತಿಯಾಝ್ ಮದ್ಯಪಾನ ಮಾಡಿ ಮನೆಗೆ ಬಂದಿದ್ದು, ಈ ವೇಳೆ ಮಗ ಪಬ್‍ ಜಿ ಆಡುತ್ತಿದ್ದುದನ್ನು ಕಂಡು ಕೋಪಗೊಂಡು ಈ ವೇಳೆ ಅಪ್ಪ- ಮಗನ ನಡುವೆ ಜಗಳವಾಗಿದೆ. ಇದರಿಂದ ಸಿಟ್ಟಿಗೆದ್ದ ಇಮ್ತಿಯಾಝ್ ಮಗನಿಗೆ ನಾಡ ಬಂದೂಕು ತೋರಿಸಿ ಕೊಲ್ಲುವುದಾಗಿ ಹೆದರಿಸಿದ್ದಾನೆ. ಈ ವೇಳೆ ಇಮ್ತಿಯಾಝ್ ಅವರ ಪತ್ನಿ ಅಡ್ಡ ಬಂದು ಪತಿಯೊಂದಿಗೆ ಜಗಳ ಆಡಿ ಬಂದೂಕನ್ನು ಕಿತ್ತುಕೊಳ್ಳಲು ಪ್ರಯತ್ನಿಸಿದ್ದಾರೆ.

  ಈ ವೇಳೆ ಕುಡಿದ ಅಮಲಿನಲ್ಲಿದ್ದ ಇಮ್ತಿಯಾಝ್ ಗುಂಡು ಹಾರಿಸಿದ್ದು, ಗುಂಡು ಮಗನಿಗೆ ತಗಲುತ್ತದೆಂದು ತಾಯಿ ಮೈಮುನಾ ಮಗನಿಗೆ ಅಡ್ಡ ಬಂದ ಪರಿಣಾಮ ಬಂದೂಕಿನ ಗುಂಡು ಮೈಮುನಾಗೆ ತಾಗಿದ್ದು, ಮೃತಪಟ್ಟಿದ್ದಾರೆ.

  ಈ ಬಗ್ಗೆ ಗ್ರಾಮಾಂತರ ಪೊಲೀಸ್ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದ್ದು, ಇಮ್ತಿಯಾಜ್ ನನ್ನು ಬಂಧಿಸಲಾಗಿದೆ.