'ದೇಶದಲ್ಲೇ ಶಸ್ತ್ರಾಸ್ತ್ರ ತಯಾರಿಸಿ ಸೈನಿಕರನ್ನು ಮತ್ತಷ್ಟು ಬಲಿಷ್ಠಗೊಳಿಸಬೇಕು' - ಪ್ರಧಾನಿ ಮೋದಿ

•   Fri, Feb 25 2022 02:44:51 PM



• ನವದೆಹಲಿ,ಫೆ 25 (DaijiworldNews/HR): ವಿದೇಶದಿಂದ ಆಮದು ಮಾಡಿಕೊಳ್ಳುವ ಶಸ್ತ್ರಾಸ್ತ್ರಗಳು ದೇಶದ ಸೈನಿಕರ ಕೈ ಸೇರುವ ಹೊತ್ತಿಗೆ ಅದು ಹಳತಾಗಿರುತ್ತದೆ. ಹೀಗಾಗಿ ದೇಶದಲ್ಲೇ ಶಸ್ತ್ರಾಸ್ತ್ರಗಳನ್ನು ತಯಾರಿಸಿ ಸೈನಿಕರಿಗೆ ನೀಡಿ ಅವರನ್ನು ಮತ್ತಷ್ಟು ಬಲಿಷ್ಠಗೊಳಿಸಬೇಕು ಎಂದು ಪ್ರಧಾನಿ ನರೇಂದ್ರ ಮೋದಿ ಹೇಳಿದ್ದಾರೆ.

  ಈ ಕುರಿತು ಮಾತನಾಡಿದ ಪ್ರಧಾನಿ ಅವರು, ನಾವು ಶಸ್ತ್ರಾಸ್ತ್ರಗಳು ಮತ್ತು ಮದ್ದುಗುಂಡುಗಳನ್ನು ಆಮದು ಮಾಡಿಕೊಳ್ಳುವಾಗ, ಈ ಪ್ರಕ್ರಿಯೆಯು ತುಂಬಾ ಸುದೀರ್ಘವಾಗಿರುತ್ತದೆ, ಅದು ನಮ್ಮ ಭದ್ರತಾ ಪಡೆಗಳನ್ನು ತಲುಪುವ ಹೊತ್ತಿಗೆ ಅವುಗಳಲ್ಲಿ ಹಲವು ಹಳೆಯದಾಗಿರುತ್ತವೆ. ಇದಕ್ಕೆ 'ಆತಮನಿರ್ಭರ್ ಭಾರತ್ ಅಭಿಯಾನ' ಮತ್ತು ಮೇಕ್ ಇನ್ ಇಂಡಿಯಾ ಪರಿಹಾರಾಗುತ್ತದೆ ಎಂದರು.

  ಇನ್ನು ಈ ಬಾರಿಯ ಬಜೆಟ್ ಸಂಶೋಧನೆ, ವಿನ್ಯಾಸ ಮತ್ತು ಅಭಿವೃದ್ಧಿಯಿಂದ ಉತ್ಪಾದನೆಗೆ ರೋಮಾಂಚಕ ಪರಿಸರ ವ್ಯವಸ್ಥೆಯನ್ನು ಅಭಿವೃದ್ಧಿಪಡಿಸುವ ನೀಲನಕ್ಷೆಯಾಗಿದೆ. ಸುಮಾರು ಶೇ.70ರಷ್ಟು ರಕ್ಷಣಾ ಹಂಚಿಕೆಯನ್ನು ಕೇವಲ ದೇಶೀಯ ಉದ್ಯಮಕ್ಕಾಗಿ ಇರಿಸಲಾಗಿದೆ. ಇಲ್ಲಿಯವರೆಗೆ, ರಕ್ಷಣಾ ಸಚಿವಾಲಯವು 200 ಕ್ಕೂ ಹೆಚ್ಚು ರಕ್ಷಣಾ ವೇದಿಕೆಗಳು ಮತ್ತು ಸಲಕರಣೆಗಳ ಸ್ವದೇಶೀಕರಣ ಪಟ್ಟಿಯನ್ನು ಬಿಡುಗಡೆ ಮಾಡಿದೆ ಎಂದಿದ್ದಾರೆ.

  ಬ್ರಿಟಿಷರ ಆಳ್ವಿಕೆಯಲ್ಲಿ ಮತ್ತು ಸ್ವಾತಂತ್ರ್ಯದ ನಂತರವೂ ನಮ್ಮ ರಕ್ಷಣಾ ಉತ್ಪಾದನಾ ಸಾಮರ್ಥ್ಯವು ತುಂಬಾ ಹೆಚ್ಚಿತ್ತು. ಭಾರತದಲ್ಲಿ ತಯಾರಿಸಲಾದ ಶಸ್ತ್ರಾಸ್ತ್ರಗಳು ಪ್ರಮುಖ ಪಾತ್ರವನ್ನು ವಹಿಸಿದ್ದು, ಮುಂದಿನ ವರ್ಷಗಳಲ್ಲಿ, ಈ ಶಕ್ತಿ ದುರ್ಬಲಗೊಂಡಿತು. ಆದರೆ ಭಾರತಕ್ಕೆ ಎಂದಿಗೂ ಸಾಮರ್ಥ್ಯಗಳ ಕೊರತೆ ಇರಲಿಲ್ಲ. ಮೇಕ್ ಇನ್ ಇಂಡಿಯಾಗೆ ಸರ್ಕಾರದ ಉತ್ತೇಜನದ ಪರಿಣಾಮವಾಗಿ ಕಳೆದ 7 ವರ್ಷಗಳಲ್ಲಿ 350 ಕ್ಕೂ ಹೆಚ್ಚು ಹೊಸ ಕೈಗಾರಿಕಾ ಪರವಾನಗಿಗಳನ್ನು ರಕ್ಷಣಾ ಉತ್ಪಾದನೆಗೆ ನೀಡಲಾಗಿದೆ ಎಂದು ಹೇಳಿದ್ದಾರೆ.