ದಶಕದ ಬಳಿಕ ಕಾಸರಗೋಡಿನ ಮಣ್ಣಿನಲ್ಲಿ ಕಂಬಳದ ಮಾರ್ದನಿ

•   Tue, Dec 11 2018 03:33:52 PM



• ಕಾಸರಗೋಡು, ಡಿ 11(MSP): ದಶಕದ ಬಳಿಕ ಕಾಸರಗೋಡಿನ ಮಣ್ಣಿನಲ್ಲಿ ಕಂಬಳ ಮಾರ್ದನಿಸತೊಡಗಿದೆ. ತುಳುನಾಡಿನ ಪುರಾತನ ಜಾನಪದ ಕ್ರೀಡೆ , ಇತಿಹಾಸ ಪ್ರಸಿದ್ಧ , ಅನಾದಿಕಾಲದಿಂದಲೂ ಸಂಪ್ರದಾಯಬದ್ಧವಾಗಿ ಆರಾಧನಾತ್ಮಕವಾಗಿ ಆಚರಿಸುಕೊಂಡು ಬರುತ್ತಿರುವ ಜೋಡುಕರೆಯಾಗಿ ಪ್ರಥಮ ವರ್ಷದ ಹೊನಲು ಬೆಳಕಿನ ಅಣ್ಣ - ತಮ್ಮ ಕಂಬಳ ಮತ್ತು ಜನಪದ ಗ್ರಾಮೀಣ ಕ್ರೀಡೆಗೆ ಪೈವಳಿಕೆ ಸಮೀಪದ ಬೋಳಂಗಳ ಸಜ್ಜಾಗಿ ನಿಂತಿದೆ .

  

  ಸಾಂದರ್ಭಿಕ ಚಿತ್ರ

  
  ಅಣ್ಣ - ತಮ್ಮ ಜೋಡುಕರೆ ಕಂಬಳ ಸಮಿತಿ ಬೋಳಂಗಳ ಹಾಗೂ ಶ್ರೀಕ್ಷೇತ್ರ ಧರ್ಮಸ್ಥಳ ಗ್ರಾಮಾಭಿವೃದ್ಧಿ ಯೋಜನೆ ಕಾಸರಗೋಡು ಇದರ ಸಹಯೋಗದಲ್ಲಿ ಡಿಸೆಂಬರ್ 13 ರಿಂದ 16 ತನಕ ತುಳುನಾಡ ಕಂಬಳ ಮತ್ತು ಗ್ರಾಮೀಣ ಮೇಳಕ್ಕೆ ಬೋಳಂಗಳ ವೇದಿಕೆಯಾಗುತ್ತಿದೆ. 13 ರಂದು ಬೆಳಿಗ್ಗೆ ಪೈವಳಿಕೆಯಿಂದ ಬೋಳಂಗಲಕ್ಕೆ ವೈಭವದ ಶೋಭಾಯಾತ್ರೆ ನಡೆಯಲಿದೆ. ಬಳಿಕ ಜಾನಪದ ಕ್ರೀಡೆ ಮತ್ತು ಗ್ರಾಮೀಣ ಮೇಳ ಆಯೋಜಿಸಲಾಗಿದೆ. 14 ರಂದು ಬೆಳಿಗ್ಗೆ ಪ್ರಗತಿ ಬಂಧು ಒಕ್ಕೂಟಗಳ ಪದಗ್ರಹಣ ಮತ್ತು ಜ್ಞಾನಜ್ಯೋತಿ ನವಜೀವನ ಸಮಿತಿ ಉದ್ಘಾಟನೆ, ಅಪರಾಹ್ನ ಆದರ್ಶ ದಂಪತಿ ಕಾರ್ಯಕ್ರಮ, ಮಹಿಳಾ ಕಬಡ್ಡಿ ಪಂದ್ಯಾಟ ನಡೆಯಲಿದೆ. 15 ರಂದು ಬೆಳಿಗ್ಗೆ 10 ರಿಂದ ಅಣ್ಣ - ತಮ್ಮ ಜೋಡುಕರೆ ಕಂಬಳ ನಡೆಯಲಿದೆ.

  ಹೊನಲು ಬೆಳಕಿನ ಕಂಬಳಕ್ಕೆ ಸಿದ್ಧತೆ ಪೂರ್ಣಗೊಂಡಿದೆ. ಕಂಬಳದ ಟ್ರ್ಯಾಕ್ ಕೂಡಾ ಸಿದ್ದವಾಗಿದ್ದು, ಪೂರ್ವಭಾವಿಯಾಗಿ ವೈದಿಕ ವಿಧಿ, ವಿಧಾನದ ಬಳಿಕ ಕುದಿ ಕಂಬಳ ನಡೆಯಿತು. ಪೈವಳಿಕೆಯ ಬೋಳಂಗಳದಲ್ಲಿ ಅಣ್ಣ - ತಮ್ಮ ಜೋಡುಕರೆ ಕಂಬಳ ಆಯೋಜನೆಯೊಂದಿಗೆ ಗಡಿ ಪ್ರದೇಶವಾದ ಕಾಸರಗೋಡು ಜಿಲ್ಲೆಯಲ್ಲಿ ಚೊಚ್ಚಲ ಶಾಶ್ವತ ಕಂಬಳ ಓಟದ ಟ್ರ್ಯಾಕ್ ಸಜ್ಜಾಗಿ ನಿಂತಿದೆ. ಬೋಳಂಗಳ ಪರಿಸರ ಮುಂದಿನ ವರ್ಷಗಳಲ್ಲಿ ಗ್ರಾಮೀಣ ಕ್ರೀಡೆ ಹಾಗೂ ಜನಪದ ಸಂಸ್ಕೃತಿ ಜೀವಂತವಾಗಿರಿಸಲು ವೇದಿಕೆಯಾಗಿ ಗಮನ ಸೆಳೆಯಲಿದೆ