'ನಾನೇ ಮಾಡಿದ್ದು, ನಾನೇ ಕಟ್ಟಿದ್ದು ಎಂದು ಪ್ರತಾಪ್‌ ಸಿಂಹ ಹೇಳೋದು ಸರಿಯಲ್ಲ' - ಹೆಚ್‌.ವಿಶ್ವನಾಥ್‌

•   Sun, Aug 22 2021 02:34:26 PM



• ಮೈಸೂರು, ಆ 22 (DaijiworldNews/PY): "ಮೈಸೂರು-ಬೆಂಗಳೂರು ದಶಪಥ ಯೋಜನೆ ನಿಮ್ಮದಲ್ಲ. ನಾನೇ ಮಾಡಿದೆ, ನಾನೇ ಕಟ್ಟಿದೆ ಎಂದು ಹೇಳುವುದು ತಪ್ಪು" ಎಂದು ತಮ್ಮದೇ ಪಕ್ಷದ ಸಂಸದ ಪ್ರತಾಪ್‌ ಸಿಂಹ ಅವರಿಗೆ ವಿಧಾನಪರಿಷತ್‌‌ ಸದಸ್ಯ ಹೆಚ್‌. ವಿಶ್ವನಾಥ್‌‌‌ ಕುಟುಕಿದ್ದಾರೆ.

  

  ಮೈಸೂರಿನಲ್ಲಿ ಭಾನುವಾರ ಸುದ್ದಿಗೋಷ್ಠಿಯಲ್ಲಿ ಮಾತನಾಡಿದ ಅವರು, "ನಾನು ಸಂಸದನಾಗಿದ್ದ ಅವಧಿಯಲ್ಲಿ ಈ ಯೋಜನೆಗೆ ಡಿಆರ್‌ಡಿಪಿ ಸಿದ್ದವಾಗಿತ್ತು. ಅಂದು ತಯಾರಾಗಿದ್ದ ಯೋಜನೆ ಇಂದು ಕಾರ್ಯರೂಪಕ್ಕೆ ಬಂದಿದೆ. ನೀನು ಈಗ ಬಂದು ಎಲ್ಲವನ್ನೂ ನಾನೇ ಮಾಡಿದ್ದು ಎಂದರೆ ಹೇಗೆ?" ಎಂದು ಪ್ರಶ್ನಿಸಿದ್ದಾರೆ.

  "ಹೊಸದಾಗಿ ಬಂದವರು ಈ ಯೋಜನೆಯನ್ನು ನಾನು ಜಾರಿಗೆ ತಂದೆ ಎಂದು ಹೇಳುವುದು ಸರಿಯಲ್ಲ. ಸಂಸದರಾಗಿ ನೀವು ಏನು ಮಾಡಿದ್ದೀರಿ ಎನ್ನುವುದನ್ನು ಜನರ ಮುಂದೆ ಹೇಳಿ. ಅದು ಬಿಟ್ಟು ಎಲ್ಲವನ್ನು ನಾನೇ ಮಾಡಿದ್ದೇನೆ ಎಂದು ಹೇಳುವುದು ಸರಿಯಲ್ಲ. ಬೇರೆಯವರು ಹೆತ್ತು, ಹೊತ್ತು ಬೆಳೆಸಿದ ಮಗುವೊಂದು ಶಾಲೆಗೆ ಹೋಗುವ ವೇಳೆ, ಆ ಮಗು ನನ್ನದು ಎಂದರೆ ಹೇಗೆ?" ಎಂದು ವ್ಯಂಗ್ಯವಾಡಿದ್ದಾರೆ.

  "ದಶಪಥ ವಿಚಾರದ ಬಗ್ಗೆ ಮಂಡ್ಯದ ಸಂಸದೆ ಸುಮಲತಾ ಅವರು ಹೇಳಿದ್ದು ಸರಿಯಾಗಿಯೇ ಇದೆ. ಇದು 10-12 ವರ್ಷಗಳಷ್ಟು ಹಿಂದಿನ ಯೋಜನೆ. ಇದನ್ನು ನಾನೇ ಮಾಡಿದ್ದು ಎಂದು ಎಷ್ಟು ದಿನ ಸುಳ್ಳು ಹೇಳುತ್ತೀರಾ?. ನೀವು ಏನಾದರೂ ಹೊಸ ಯೋಜನೆ ತಂದಿದ್ದರೆ" ಹೇಳಿ ಎಂದಿದ್ದಾರೆ.

  "ಕೊರೊನಾದ ಈ ಸಂದರ್ಭ ರಾಜಕೀಯ ಸಭೆ, ಸಮಾರಂಭಗಳನ್ನು ಆಯೋಜಿಸುವುದು ಸೂಕ್ತವಲ್ಲ. ರಾಜಕೀಯ ಪಕ್ಷಗಳು, ಜನಸಂದಣಿ ಸೇರುವ ಕಾರ್ಯಕ್ರಮಗಳನ್ನು ಆಯೋಜಿಸಬಾರದು" ಎಂದು ತಿಳಿಸಿದ್ದಾರೆ.