ಅಕ್ರಮ ಚಿನ್ನ ಸಾಗಣೆ - ಇಂಡಿಗೊ, ಸ್ಪೈಸ್‌‌‌‌ಜೆಟ್‌ ಏರ್‌ಲೈನ್ಸ್‌‌ನ ಸಿಬ್ಬಂದಿ ಸೇರಿ ಏಳು ಮಂದಿಯ ಬಂಧನ

•   Sat, Jul 24 2021 06:00:06 PM



• ನವದೆಹಲಿ, ಜು 24 (DaijiworldNews/PY): ಅಕ್ರಮ ಚಿನ್ನ ಸಾಗಣೆ ಮಾಡಿದ ಆರೋಪ ಮೇಲೆ ಇಂಡಿಗೊ ಹಾಗೂ ಸ್ಪೈಸ್‌‌‌‌ಜೆಟ್‌ ಏರ್‌ಲೈನ್ಸ್‌‌ನ ನಾಲ್ವರು ಸಿಬ್ಬಂದಿಗಳು ಸೇರಿದಂತೆ ಏಳು ಮಂದಿಯನ್ನು ಕಸ್ಟಮ್ಸ್‌ ಇಲಾಖೆಯ ಅಧಿಕಾರಿಗಳು ಶನಿವಾರ ಬಂಧಿಸಿದ್ದಾರೆ.

  
  ಸಾಂದರ್ಭಿಕ ಚಿತ್ರ

  ಆರೋಪಿಗಳು ಸೌದಿ ಅರೇಬಿಯಾದಿಂದ ಇಲ್ಲಿನ ಇಂದಿರಾ ಗಾಂಧಿ ಅಂತರಾಷ್ಟ್ರೀಯ ವಿಮಾನ ನಿಲ್ದಾಣಕ್ಕೆ ಬಂದಿಳಿದಿದ್ದು, ಈ ವೇಳೆ ಆರೋಪಿಗಳನ್ನು ಬಂಧಿಸಲಾಗಿದೆ. ಆರೋಪಿಗಳು 72.46 ಲಕ್ಷ ರೂ. ಮೌಲ್ಯದ ಚಿನ್ನವನ್ನು ಅಕ್ರಮವಾಗಿ ಸಾಗಿಸುತ್ತಿದ್ದರು ಎಂದು ಅಧಿಕಾರಿಗಳು ಮಾಹಿತಿ ನೀಡಿದ್ದಾರೆ.

  ವಿಮಾನ ನಿಲ್ದಾಣದಲ್ಲಿ ಇಬ್ಬರು ಪ್ರಯಾಣಿಕರ ಬ್ಯಾಗ್‌ಗಳನ್ನು ತಪಾಸಣೆ ಮಾಡಿದ ವೇಳೆ 22 ಲಕ್ಷ ರೂ. ಮೌಲ್ಯದ 517.2 ಗ್ರಾಂ ತೂಕದ ಚಿನ್ನದ ಬಿಸ್ಕತ್‌‌ ಹಾಗೂ ಎರಡು ತುಣುಕುಗಳು ಪತ್ತೆಯಾದವು. ಹೆಚ್ಚಿನ ತನಿಖೆ ನಡೆಸಿದ ವೇಳೆ ಓರ್ವ ಪ್ರಯಾಣಿಕ 160 ಗ್ರಾಂ ತೂಕದ ಚಿನ್ನವನ್ನು ಇಂಡಿಗೊ ಏರ್‌ಲೈನ್ಸ್‌ ಸಿಬ್ಬಂದಿಯೋರ್ವರಿಗೆ ನೀಡಿರುವುದು ತಿಳಿದುಬಂದಿದೆ.

  ಕಾರ್ಯಾಚರಣೆಯ ನಂತರ ಉಳಿದ ಚಿನ್ನವನ್ನು ವಶಪಡಿಸಿಕೊಳ್ಳಲಾಯಿತು. ಇದರಲ್ಲಿ ಭಾಗಿಯಾಗಿರುವುದಾಗಿ ಸ್ಪೈಸ್‌ಜೆಟ್‌‌ ಹಾಗೂ ಇಂಡಿಗೊ ಸಿಬ್ಬಂದಿ ಒಪ್ಪಿಕೊಂಡಿದ್ದಾರೆ. ಎಲ್ಲಾ ಏಳು ಆರೋಪಿಗಳನ್ನು ಬಂಧಿಸಲಾಗಿದೆ ಎಂದು ಕಸ್ಟಮ್ಸ್‌ ಇಲಾಖೆ ಪ್ರಕಟಣೆಯಲ್ಲಿ ವಿವರಿಸಿದೆ.