150 ರೂಪಾಯಿಯಲ್ಲಿ ಮದುವೆ ಮುಗಿಸಿಕೊಂಡು ಕೊರೊನಾ ಹೋರಾಟಕ್ಕೆ ಧನಸಹಾಯ ನೀಡಿದ ಸ್ಟಾರ್ ಜೋಡಿ

•   Fri, May 07 2021 05:20:47 PM



• ಮುಂಬೈ, ಮೇ.07 (DaijiworldNews/HR): ಹಿಂದಿ ಕಿರುತೆರೆಯ ಸ್ಟಾರ್ ನಟ ವಿರಫ್ ಪಟೇಲ್ ಬಹುಕಾಲದ ಗೆಳತಿ ಸಲೋನಿ ಖನ್ನಾ ಅವರು ಮೇ 6ರಂದು ಅದ್ಧೂರಿ ಮದುವೆ ಮಾಡಿಕೊಳ್ಳಬೇಕೆಂದು ನಿಶ್ಚಯಿಸಿದ್ದರು, ಆದರೆ ಕೊರೊನಾದಿಂದಾಗಿ ವಿರಫ್ ಪಟೇಲ್ ಮತ್ತು ಸಲೋನಿ ಖನ್ನಾ ಸರಳವಾಗಿ ಮದುವೆ ಮಾಡಿಕೊಳ್ಳಲು ನಿರ್ಧರಿಸಿದ್ದರು.

  

  ವಿರಫ್ ಪಟೇಲ್ ಗುರುವಾರದಂದು ತಮ್ಮ ಬಹುಕಾಲದ ಗೆಳತಿ ಸಲೋನಿ ಖನ್ನಾ ಜತೆ ಸಪ್ತಪದಿ ತುಳಿದಿದ್ದಾರೆ. ಅದರಲ್ಲಿ ವಿಶೇಷ ಅಂದರೆ ಕೇವಲ 150 ರೂಪಾಯಿಯಲ್ಲಿ ಅವರ ಮದುವೆಯೇ ಮುಗಿದುಹೋಗಿದೆ.

  ಮದುವೆ ನೋಂದಣಿ ಮಾಡಲು 100 ರೂಪಾಯಿ, ವಧು ವರರ ಫೋಟೋಗಳಿಗೆ 50 ರೂಪಾಯಿ ಅಷ್ಟೇ ಖರ್ಚು ಮಾಡಿದ್ದಾರೆ ಎನ್ನಲಾಗಿದೆ.

  ಇನ್ನು ಮದುವೆಗಾಗಿ ಖರ್ಚು ಮಾಡಬೇಕೆಂದಿದ್ದ ಹಣವನ್ನೇ ಕೊರೊನಾ ವಿರುದ್ಧದ ಹೋರಾಟಕ್ಕೆ ಸದುಪಯೋಗ ಪಡಿಸಿಬೇಕು ಎಂದುಕೊಂಡಿದ್ದೇವೆ. ಇದರಿಂದ ನಮ್ಮ ಮದುವೆಗೂ ಒಂದು ಅರ್ಥ ಸಿಕ್ಕಂತಾಗುತ್ತದೆ ಎಂದು ನಟ ವಿರಫ್ ಪಟೇಲ್ ಹೇಳಿದ್ದಾರೆ.

  ಕೊರೊನಾ ಕಾರಣದಿಂದ ಕೇವಲ ಮೂವರು ಗೆಳೆಯರ ಸಮ್ಮುಖದಲ್ಲಿ ವಿರಫ್ ಮತ್ತು ಸಲೋನಿ ಹಸೆಮಣೆ ಏರಿದ್ದಾರೆ. ವಿರಫ್ ಪಟೇಲ್ ಪಾರ್ಸಿ ಜೊರಾಷ್ಟ್ರಿಯನ್ ಆದ ಕಾರಣ ಅವರ ಶಾಸ್ತ್ರದಂತೆ ಸಲೋನಿಯನ್ನು ಮನೆಗೆ ಕರೆದುಕೊಂಡು ಬರಲಾಗಿದೆ.

  ಇನ್ನು ನವದಂಪತಿಯ ಈ ನಿರ್ಧಾರಕ್ಕೆ ಎಲ್ಲೆಡೆಯಿಂದ ಮೆಚ್ಚುಗೆಯ ಮಾತುಗಳು ಕೇಳಿಬರುತ್ತಿದ್ದು, ಕೊರೊನಾದಂತಹ ಕಷ್ಟದ ಸಮಯದಲ್ಲಿ ಸ್ಟಾರ್ ಜೋಡಿಯ ಈ ಕಾರ್ಯ ಮೆಚ್ಚುವಂತಿದೆ.