ಮಂಗಳೂರು: ಲಾಕ್‌ಡೌನ್‌ನಿಂದ ಸಂಕಷ್ಟದಲ್ಲಿರುವ ಟ್ಯಾಕ್ಸಿ ಚಾಲಕರ ಜೀವನ ಈಗ ಇನ್ನಷ್ಟು ಶೋಚನೀಯ

•   Mon, May 03 2021 01:05:25 PM



• ಮಂಗಳೂರು, ಮೇ 03 (DaijiworldNews/MB) : ಕೊರೊನಾ ಲಾಕ್‌ಡೌನ್‌ ಕಾರಣದಿಂದಾಗಿ ನಗರದ ಟ್ಯಾಕ್ಸಿ ಚಾಲಕರು ಅನೇಕ ಸಮಸ್ಯೆಗಳನ್ನು ಎದುರಿಸುತ್ತಿದ್ದಾರೆ. ಅವರಿಗೆ ಜೀವನ ಸಾಗಿಸುವುದೇ ಕಷ್ಟಕರವಾಗಿದೆ.

  

  ಕೇರಳ ಪ್ರವಾಸ ಕೈಗೊಂಡಿದ್ದ ಕರ್ನಾಟಕದ ಟ್ಯಾಕ್ಸಿಗಳು ಮತ್ತು ಮ್ಯಾಕ್ಸಿ ಕ್ಯಾಬ್‌ಗಳು ಅಲ್ಲಿ ಬಾಕಿ ಇರುವ ತೆರಿಗೆ ಪಾವತಿಸಬೇಕಾದ ಸಮಸ್ಯೆಯನ್ನು ಈಗ ಎದುರಿಸುತ್ತಿವೆ. ಇದೇ ಸಮಯದಲ್ಲಿ ಅಂತರರಾಷ್ಟ್ರೀಯ ವಿಮಾನ ನಿಲ್ದಾಣದಲ್ಲಿ ಪಾರ್ಕಿಂಗ್ ಶುಲ್ಕವನ್ನು ಹೆಚ್ಚಿಸಲಾಗಿದೆ. ಇದು ಟ್ಯಾಕ್ಸಿ ಚಾಲಕರಿಗೆ ದೊಡ್ಡ ಹೊಡೆತವನ್ನು ನೀಡಿದೆ. ಲಾ‌ಕ್‌ಡೌನ್‌ ಕಾರಣದಿಂದಾಗಿ ಈ ಟ್ಯಾಕ್ಸಿ ಚಾಲಕರಿಗೆ ತಮ್ಮ ಕಾರಲ್ಲಿ ದುಡಿಯುವ ಅವಕಾಶವೂ ಇಲ್ಲ. ಇವೆಲ್ಲದರ ನಡುವೆ ಸಿಲುಕಿರುವ ಟ್ಯಾಕ್ಸಿ ಚಾಲಕರ ಜೀವನ ಸಂಕಷ್ಟದಲ್ಲಿದೆ.

  ಕೆಲವು ವರ್ಷಗಳ ಹಿಂದೆ ಕರ್ನಾಟಕದಿಂದ ಕೇರಳಕ್ಕೆ ಬಾಡಿಗೆಗಾಗಿ ಹೋಗಿದ್ದ ಟ್ಯಾಕ್ಸಿಗಳು ಮತ್ತು ಮ್ಯಾಕ್ಸಿ ಕ್ಯಾಬ್‌ಗಳು ಪಾವತಿಸಲು ಬಾಕಿ ಇರುವ ತೆರಿಗೆಯನ್ನು ಇನ್ನೂ ಸಂಪೂರ್ಣವಾಗಿ ಪಾವತಿಸಲು ಚಾಲಕರಿಂದ ಸಾಧ್ಯವಾಗಿಲ್ಲ. ಪಾವತಿಸದ ಕಾರಣಕ್ಕಾಗಿ ಕೇರಳ ಸರ್ಕಾರ ಅವರನ್ನು ಕಪ್ಪು ಪಟ್ಟಿಗೆ ಸೇರಿಸಿರುವ ಕಾರಣ, ಈ ಟ್ಯಾಕ್ಸಿಗಳು ಕರ್ನಾಟಕ ಸರ್ಕಾರದ ಕಪ್ಪು ಪಟ್ಟಿಯಲ್ಲಿಯೂ ಕಂಡುಬರುತ್ತಿವೆ. ಆದ್ದರಿಂದ ಟ್ಯಾಕ್ಸಿ ಮಾಲೀಕರು ಬಾಡಿಗೆ ಆಧಾರದ ಮೇಲೆ ಈ ಕಾರನ್ನು ಚಲಾಯಿಸಲು ಆಗುವುದಿಲ್ಲ. ಅದನ್ನು ಮಾರಾಟ ಮಾಡಲು ಸಾಧ್ಯವಾಗುತ್ತಿಲ್ಲ. ದುಡಿಮೆ ಇಲ್ಲದೆ ಈ ಲಾಕ್‌ಡೌನ್‌ ಸಂದರ್ಭದಲ್ಲಿ ಬಾಕಿ ಹಣ ಪಾವತಿಸಲು ಸಾಧ್ಯವಾಗುತ್ತಿಲ್ಲ.

  ಸಾರಿಗೆ ಇಲಾಖೆಯ ಕಟ್ಟುನಿಟ್ಟಿನ ನಿಯಮದಿಂದಾಗಿ, ಅವರು ಕೇರಳಕ್ಕೆ ಹೋಗಲು ಸಾಧ್ಯವಿಲ್ಲ. ಹಾಗೆಯೇ ಕರ್ನಾಟಕದಲ್ಲಿ ಬಾಡಿಗೆಗೆ ಕಾರ್ಯನಿರ್ವಹಿಸಲು ಸಾಧ್ಯವಿಲ್ಲ. ಈಗಾಗಲೇ ಲಾಕ್‌ಡೌನ್‌ನಿಂದಾಗಿ ತೀರಾ ಸಂಕಷ್ಟದಲ್ಲಿರುವ ಟ್ಯಾಕ್ಸಿ ಚಾಲಕರಿಗೆ ಈಗ ಈ ಸಮಸ್ಯೆಯೂ ಭಾರೀ ಸಂಕಷ್ಟಕ್ಕೆ ದೂಡಿದೆ.