ತಿರುವನಂತಪುರ ಕ್ಷೇತ್ರದಲ್ಲಿ ನಟ ಮೋಹನ್ ಲಾಲ್ ಬಿಜೆಪಿಯಿಂದ ಸ್ವರ್ಧೆ ?

•   Tue, Sep 04 2018 03:17:34 PM



• ತಿರುವನಂತಪುರ,ಸೆ 4 (MSP):ಮಲಯಾಳಂನ ಚಿತ್ರರಂಗದ ಶ್ರೇಷ್ಟ ನಟ ಮೋಹನ್ ಲಾಲ್ ಪ್ರಧಾನಿ ನರೇಂದ್ರ ಮೋದಿಯನ್ನು ಭೇಟಿಯಾಗಿರುವುದು ರಾಜಕೀಯ ವಲಯದಲ್ಲಿ ಬಿಸಿಬಿಸಿ ಚರ್ಚೆಗೆ ಕಾರಣವಾಗಿದೆ. ಈ ಭೇಟಿಯ ಬಳಿಕ ಮುಂಬರುವ ಲೋಕಸಭಾ ಚುನಾವಣೆಯಲ್ಲಿ ಕೇರಳದ ತಿರುವನಂತಪುರ ಕ್ಷೇತ್ರದಿಂದ ಮೋಹನ್ ಲಾಲ್ ಬಿಜೆಪಿಯಿಂದ ಕಣಕ್ಕಿಳಿಯುತ್ತಾರೆ ಎಂಬ ಸುದ್ದಿ ಹರಿದಾಡುತ್ತಿದೆ. 

  

  
  ನಟ ಮೋಹನ್ ಲಾಲ್ ತಮ್ಮ ವಿಶ್ವಶಾಂತಿ ಫೌಂಡೇಷನ್​​ನ ಕಾರ್ಯಕ್ರಮವೊಂದರ ಉದ್ಘಾಟನೆ ನೆರವೇರಿಸಲು ಮೋದಿಯನ್ನು ಆಹ್ವಾನಿಸಲು ಭೇಟಿಯಾಗಿದ್ದಾರೆ. ಆದ್ರೆ ಈ ಭೇಟಿ ಬೆನ್ನಲ್ಲೆ ಮೋಹನ್​​ ಲಾಲ್​​ ಬಿಜೆಪಿ ಸೇರಲಿದ್ದಾರೆ, ಅವರಿಗೆ ಲೋಕಸಭೆಯ ಟಿಕೆಟ್​​ ನೀಡುವ ಸಾಧ್ಯತೆ ಇದೆ ಎಂಬ ಸುದ್ದಿಗಳು ಹರಿದಾಡತೊಡಗಿದೆ. ಮೋಹನ್ ಲಾಲ್ ತಮ್ಮ ತಂದೆ ವಿಶ್ವನಾಥ್ ನಾಯರ್ ಮತ್ತು ಶಾಂತಾ ಕುಮಾರಿ ಅವರ ಸ್ಮರಣಾರ್ಥ ವಿಶ್ವಶಾಂತಿ ಫೌಂಡೇಷನ್​​ನ ವತಿಯಿಂಡ ಕ್ಯಾನ್ಸರ್ ಚಿಕಿತ್ಸಾ ಸಂಸ್ಥೆ ನಿರ್ಮಿಸಿದ್ದಾರೆ.

  ಕೇರಳದಲ್ಲಿ ಬಿಜೆಪಿ ತನ್ನ ನೆಲೆಯನ್ನು ಗಟ್ಟಿಮಾಡಿಕೊಳ್ಳಲು ಸ್ಟಾರ್​​ ಪವರ್​​ನ ಮೊರೆ ಹೋಗಿದೆ ಎನ್ನಲಾಗುತ್ತಿದ್ದು, ಮೋಹನ್​​ಲಾಲ್​ ಅವರನ್ನು ತಿರುವನಂತಪುರಂನಿಂದ 2009​​​, 2014 ರಲ್ಲಿ ಗೆದ್ದು ಬೀಗಿದ್ದ ಕಾಂಗ್ರೆಸ್​​ ಮುಖಂಡ ಶಶಿ ತರೂರ್ ವಿರುದ್ಧ ಕಣಕ್ಕಿಳಿಸುವ ಸಾಧ್ಯತೆ ಹೆಚ್ಚಾಗಿದೆ ಎಂದು ಸುದ್ದಿಯಾಗುತ್ತಿದೆ. ಅತ್ತ ಕಡೆ ಮೋಹನ್​ ಲಾಲ್​​ರನ್ನು ಭೇಟಿಯಾದ ಬಗ್ಗೆ ಪ್ರಧಾನಿ ಮೋದಿ ಮಂಗಳವಾರ ಬೆಳಗ್ಗೆ ಟ್ವೀಟ್​ ಮಾಡಿದ್ದು, ಮೋಹನ್ ಲಾಲ್ ಅವರ ಸಾಮಾಜಿಕ ಕಾರ್ಯ ಹಾಗೂ ಅವರ ನಮ್ರತೆಯ ಹೊಗಳಿ ಬರೆದಿದ್ದಾರೆ. ಇನ್ನು ಮೋಹನ್​ ಲಾಲ್​ ಕೂಡ ಪ್ರಧಾನಿ ಭೇಟಿ ಬಗ್ಗೆ ತಮ್ಮ ಫೇಸ್​​ಬುಕ್​ ಖಾತೆಯಲ್ಲಿ​​ ಪೋಸ್ಟ್​​ ಮಾಡಿದ್ದಾರೆ. ಇತ್ತೀಚಿನ ಪ್ರವಾಹದಿಂದ ತತ್ತರಿಸಿರುವ ಕೇರಳವನ್ನು ಮರುನಿರ್ಮಿಸಲು ಗ್ಲೋಬಲ್ ಮಲೆಯಾಳಿ ರೌಂಡ್​​ ಟೇಬಲ್​ನಲ್ಲಿ ಭಾಗವಹಿಸುವ ಬಗ್ಗೆ ಮೋದಿ ಭರವಸೆ ನೀಡಿದ್ದಾರೆ ಎಂದು ಮೋಹನ್​ ಲಾಲ್ ಪೋಸ್ಟ್​ನಲ್ಲಿ ತಿಳಿಸಿದ್ದಾರೆ.