ಬಂದಿದ್ದು ಸೇಲ್ಸ್‌ ಗರ್ಲ್‌ ಆಗಿ, ಮಾಡಿದ್ದು ಇ-ಮೇಲ್‌ ಹ್ಯಾಕ್‌ - ನಾಗಾಲ್ಯಾಂಡ್‌ ಗ್ಯಾಂಗ್‌ ಅಂದರ್

•   Wed, Mar 10 2021 10:18:18 AM



• ಬೆಂಗಳೂರು, ಮಾ.10 (DaijiworldNews/MB): ನಿವೃತ್ತ ಡಿಜಿಐಜಿಪಿ ಶಂಕರ್ ಬಿದರಿ ಇ-ಮೇಲ್ ಹ್ಯಾಕ್ ಮಾಡಿದ್ದ ನಾಗಾಲ್ಯಾಂಡ್ ಮೂಲದ ಗ್ಯಾಂಗ್‌ನ್ನು ಸೆರೆಹಿಡಿಯುವಲ್ಲಿ ಪೊಲೀಸರು ಯಶಸ್ವಿಯಾಗಿದ್ದಾರೆ. ನಾಗಾಲ್ಯಾಂಡ್‌ನಿಂದ ಬೆಂಗಳೂರಿಗೆ ನಾಲ್ಕು ವರ್ಷದ ಹಿಂದೆ ಬ್ಯೂಟಿ ಪಾರ್ಲರ್‌ ಸೇಲ್ಸ್ ಗರ್ಲ್ ಆಗಿ ಬಂದಾಕೆ ಈ ಹ್ಯಾಕ್‌ ಕೃತ್ಯದ ಮಾಸ್ಟರ್‌ ಮೈಂಡ್‌ ಆಗಿದ್ದು ಈಗ ತನ್ನ ಗ್ಯಾಂಗ್‌ನ್ನೊಂದಿಗೆ ಸೆರೆವಾಸ ಅನುಭವಿಸುತ್ತಿದ್ದಾಳೆ.

  

  ಬಂಧಿತರನ್ನು ನಾಗಾಲ್ಯಾಂಡ್‌ ಮೂಲದ ಥಿಯಾ (31), ಸೆರೋಪಾ (27) ಹಾಗೂ ಇಸ್ಟರ್ ಕೊನ್ಯಾಕ್ ಅಲಿಯಾಸ್​ ರುಬಿಕಾ ಎಂದು ಗುರುತಿಸಲಾಗಿದೆ.

  ಇ-ಮೇಲ್‌ ಖಾತೆಗಳನ್ನು ಹ್ಯಾಕ್‌ ಮಾಡಿ ಅದರ ಮೂಲಕ ಸಂದೇಶ ಕಳುಹಿಸಿ ಹಣ ದೋಚುತ್ತಿದ್ದ ಈ ಖದೀಮರು ನಿವೃತ್ತ ಡಿಜಿಐಜಿಪಿ ಶಂಕರ್ ಬಿದರಿ ಅವರ ಇ ಮೇಲ್‌ ಖಾತೆಯನ್ನೇ ಹ್ಯಾಕ್‌ ಮಾಡಿದ್ದರು. ಶಂಕರ್ ಬಿದರಿ ಅವರ ಇ-ಮೇಲ್‌ ಖಾತೆಯನ್ನು ಹ್ಯಾಕ್‌ ಮಾಡಿದ ಆರೋಪಿಗಳು ಬಿದರಿ ಅವರ ಸ್ನೇಹಿತರಿಗೆ ಹಣಕ್ಕಾಗಿ ಮೆಸೇಜ್‌ ಮಾಡಿದ್ದಾರೆ.

  ಇನ್ನು ಈ ಪೈಕಿ ಇ-ಮೇಲ್‌ ಮೆಸೇಜ್‌ ನೋಡಿದ ಬಿದರಿಯ ಸ್ನೇಹಿತರೋರ್ವರು ಬಿದರಿ ಅವರ ಖಾತೆ ಸಂಖ್ಯೆ ಎಂದು ಭಾವಿಸಿ ಆರೋಪಿಗಳ ಖಾತೆಗೆ 25 ಸಾವಿರ ರೂಪಾಯಿ ಹಣವನ್ನು ಜಮೆ ಮಾಡಿದ್ದಾರೆ. ಈ ನಡುವೆ ತನ್ನ ಇ-ಮೇಲ್‌ ಖಾತೆ ಹ್ಯಾಕ್‌ ಮಾಡಿ ದುರ್ಬಳಕೆ ಮಾಡಲಾಗುತ್ತಿದೆ ಎಂಬುದು ಶಂಕರ್‌ ಬಿದರಿ ಅವರ ಗಮನಕ್ಕೆ ಬಂದಿದ್ದು ಕೂಡಲೇ ಈ ಬಗ್ಗೆ ಆಗ್ನೇಯ ವಿಭಾಗದ ಸೈಬರ್ ಕ್ರೈಂ ಪೊಲೀಸ್ ಠಾಣೆಗೆ ದೂರು ನೀಡಿದ್ದರು. ಈ ದೂರಿನ ಆಧಾರದಲ್ಲಿ ಆರೋಪಿಗಳಿಗೆ ಬಲೆ ಬೀಸಿದ ಆಗ್ನೇಯ ವಿಭಾಗದ ಸೈಬರ್ ಕ್ರೈಂ ಪೊಲೀಸರು ಓರ್ವ ಮಹಿಳೆ ಸೇರಿ ಮೂವರನ್ನು ಬಂಧಿಸಿದ್ದಾರೆ.

  ಆರೋಪಿಗಳು ಕಳೆದ ವರ್ಷ ನವೆಂಬರ್​ನಿಂದ ಈವರೆಗೆ ಸುಮಾರು 60 ಬ್ಯಾಂಕ್‌ ಖಾತೆಯನ್ನು ತೆರೆದಿದ್ದಾರೆ. ಈ ಆರೋಪಿಗಳು ಬ್ಯಾಂಕ್‌ ಖಾತೆ ತೆರೆಯಲು ನಾಗಾಲ್ಯಾಂಡ್​ನ ನಿರುದ್ಯೋಗಿ ಯುವಕರಿಗೆ ಹಣದ ಆಮಿಷವೊಡ್ಡಿ ಆಧಾರ್ ಕಾರ್ಡ್, ಮನೆ ಬಾಡಿಗೆ ಪತ್ರ ಪಡೆಯುತ್ತಿದ್ದರು ಎಂದು ವರದಿಯಾಗಿದೆ.

  ಇನ್ನು ಈ ಕೃತ್ಯದ ಮಾಸ್ಟರ್‌ ಮೈಂಡ್‌ ಆಗಿರುವ ಬ್ಯೂಟಿ ಪಾರ್ಲರ್​ವೊಂದರ ಸೇಲ್ಸ್ ಗರ್ಲ್ ರುಬಿಕಾ ಫೇಸ್​ಬುಕ್​ನಲ್ಲಿ ಪೀಟರ್ ಹಾಗೂ ಜೇಮ್ಸ್ ಎಂಬವರನ್ನು ಪರಿಚಯ ಮಾಡಿಕೊಂಡು ಅವರೊಂದಿಗೆ ಸೇರಿ ಅಕೌಂಟ್‌ ಹ್ಯಾಕ್‌ ಮಾಡಿ ಹಣ ದೋಚುತ್ತಿದ್ದಳು ಎಂದು ತಿಳಿದು ಬಂದಿದೆ.