ಪುತ್ರನಿಗೆ ಮಕ್ಕಳಿಲ್ಲವೆಂದು ಖಿನ್ನತೆಗೆ ಒಳಗಾಗಿ ದಂಪತಿ ಆತ್ಮಹತ್ಯೆ

•   Mon, Sep 21 2020 02:56:02 PM



• ನವದೆಹಲಿ, ಸೆ. 21 (DaijiworldNews/MB) : ಪುತ್ರನಿಗೆ ಮಕ್ಕಳಿಲ್ಲವೆಂದು ಖಿನ್ನತೆಗೆ ಒಳಗಾಗಿ ದಂಪತಿ ತಮ್ಮ ನಿವಾಸದಲ್ಲಿ ಆತ್ಮಹತ್ಯೆ ಮಾಡಿಕೊಂಡ ಘಟನೆ ರಾಷ್ಟ್ರ ರಾಜಧಾನಿ ದೆಹಲಿಯ ಸಿರಾಸ್ಪುರ್ ಪ್ರದೇಶದಲ್ಲಿ ನಡೆದಿದೆ.

  

  ವಿವಾಹವಾಗಿ 9 ವರ್ಷಗಳಾದರೂ ಪುತ್ರನಿಗೆ ಮಗು ಇಲ್ಲದ ಕಾರಣ ದಂಪತಿ ಖಿನ್ನತೆಗೆ ಒಳಗಾಗಿದ್ದರು ಎಂದು ಪ್ರಾಥಮಿಕ ತನಿಖೆಯಿಂದ ತಿಳಿದುಬಂದಿದೆ. ಮೃತರು 50 ವರ್ಷ ವ್ಯಕ್ತಿ ಹಾಗೂ ಅವರ 48 ವರ್ಷ ಪತ್ನಿಯಾಗಿದ್ದು ಈ ವ್ಯಕ್ತಿ ಅಲಿಪುರದ ಗೋಡೌನ್‌ನಲ್ಲಿ ಸೆಕ್ಯುರಿಟಿ ಗಾರ್ಡ್ ಆಗಿ ಕೆಲಸ ಮಾಡುತ್ತಿದ್ದರು ಎಂದು ವರದಿಯಾಗಿದೆ.

  ಈ ದಂಪತಿಗಳು ತಮ್ಮ ಪುತ್ರನಿಗೆ ಮಕ್ಕಳಿಲ್ಲ ಎಂಬ ಕಾರಣಕ್ಕೆ ಪುತ್ರನೊಂದಿಗೆ ಗಲಾಟೆ ಮಾಡುತ್ತಿದ್ದು ಕೆಲವು ದಿನಗಳ ಹಿಂದೆ ಈ ದಂಪತಿಗಳು ಮನೆಯಿಂದ ಹೊರಹೋಗುವ ನಿರ್ಧಾರವನ್ನು ಮಾಡಿದ್ದರು. ಹತ್ತಿರದಲ್ಲಿ ಬೇರೆ ಬಾಡಿಗೆ ಮನೆಯಲ್ಲಿ ವಾಸವಿದ್ದರು ಎಂದು ಹೇಳಲಾಗಿದೆ.

  ಭಾನುವಾರ ಮಧ್ಯಾಹ್ನ, ಈ ದಂಪತಿಯ ಸೊಸೆ ಅವರ ಮನೆಗೆ ಹೋದ ವೇಳೆ ಇಬ್ಬರೂ ಪ್ರಜ್ಞಾಹೀನ ಸ್ಥಿತಿಯಲ್ಲಿ ಮಲಗಿರುವುದನ್ನು ನೋಡಿದ್ದು ಇವರು ವಿಷ ಸೇವಿಸಿರುವುದಕ್ಕೆ ಪುರಾವೆ ಲಭಿಸಿದೆ. ದಂಪತಿಯನ್ನು ಆಸ್ಪತ್ರೆಗೆ ಕೊಂಡೊಯ್ಯಲಾಗಿದ್ದು ಆದರೆ ಅವರು ಸಾವನ್ನಪ್ಪಿದ್ದಾರೆ ಎಂದು ಪೊಲೀಸರು ತಿಳಿಸಿದ್ದಾರೆ.