ಬಂಗಲೆ ಕೆಡವಿದಕ್ಕೆ 2 ಕೋಟಿ ಕೇಳಿದ ಕಂಗನಾ - ಪರಿಹಾರಕ್ಕೆ ಅರ್ಹವಲ್ಲ ಎಂದ ಬಿಎಂಸಿ

•   Sat, Sep 19 2020 12:07:27 PM



• ಮುಂಬಯಿ, ಸೆ.19(DaijiworldNews/HR): ನಟಿ ಕಂಗನಾ ರಾಣಾವತ್ ಅವರ ಬಂಗಲೆಯನ್ನು ಕಾನೂನು ದುರ್ಬಳಕೆ ಮಾಡಿಕೊಂಡು ಕೆಡವಿದ ಕ್ರಮವನ್ನು ಪ್ರಶ್ನಿಸಿ ಬಾಂಬ್ ಹೈಕೋರ್ಟ್​ನಲ್ಲಿ ರಿಟ್​ ಪಿಟಿಷನ್ ಸಲ್ಲಿಸಿ, 2 ಕೋಟಿ ರೂಪಾಯಿ ಪರಿಹಾರದ ಬೇಡಿಕೆಯನ್ನು ಕಂಗನಾ ಇಟ್ಟಿದ್ದು, ಇದನ್ನು ಪಿಟಿಷನ್ ವೆಚ್ಚದೊಂದಿಗೆ ತಿರಸ್ಕರಿಸಬೇಕು ಎಂದು ಬೃಹನ್ಮುಂಬೈ ಮಹಾನಗರಪಾಲಿಕೆ (ಬಿಎಂಸಿ) ಹೈಕೋರ್ಟ್​ಗೆ ಮನವಿ ಮಾಡಿದೆ.

  

  ಸೆಪ್ಟೆಂಬರ್ 9ರಂದು ಕಂಗನಾ ಅವರಿಗೆ ಸೇರಿದ ಪಾಲಿ ಹಿಲ್ ಬಂಗಲೆಯನ್ನು ಬಿಎಂಸಿ ಕೆಡವಿತ್ತು. ಅನುಮತಿ ತೆಗೆದುಕೊಳ್ಳದೇ ಅಕ್ರಮವಾಗಿ ಕಟ್ಟಡ ನಿರ್ಮಾಣ ಮಾಡಿದ್ದಾರೆ ಎಂಬ ಆರೋಪದ ಮೇರೆಗೆ ಈ ಕ್ರಮವನ್ನು ಕೈಗೊಂಡಿತ್ತು. ಅದೇ ದಿನ ಕಂಗನಾ ಕೋರ್ಟ್ ಮೆಟ್ಟಿಲೇರಿದ್ದರಿಂದ ಬಿಎಂಸಿಯ ನಡೆಗೆ ತಡೆ ಸಿಕ್ಕಿತ್ತು. ನ್ಯಾಯಮೂರ್ತಿ ಎಸ್​.ಜೆ.ಕಥಾವಲ್ಲಾ ಅವರಿದ್ದ ನ್ಯಾಯಪೀಠ ಈ ತಡೆ ನೀಡಿತ್ತು.

  ಇನ್ನು ಸೆಪ್ಟೆಂಬರ್ 15ರಂದು ಕಂಗನಾ ರಿಟ್ ಪಿಟಿಷನ್ ದಾಖಲಿಸಿದ್ದು, ಬಿಎಂಸಿಯಿಂದ 2 ಕೋಟಿ ರೂಪಾಯಿ ಪರಿಹಾರವನ್ನು ಅಪೇಕ್ಷಿಸಿದ್ದಾರೆ. ಇದಕ್ಕೆ ಉತ್ತರವಾಗಿ ಅಡ್ವೋಕೇಟ್ ಜೋಯೆಲ್ ಕಾರ್ಲೋಸ್ ಮೂಲಕ ಬಿಎಂಸಿ ಪ್ರತಿಕ್ರಿಯೆಯನ್ನು ಸಲ್ಲಿಸಿದೆ. ಅಲ್ಲದೆ ಅದರ ನಡೆಯನ್ನು ಸಮರ್ಥಿಸಿಕೊಳ್ಳುವ ಸಮಜಾಯಿಷಿಯನ್ನೂ ಕೋರ್ಟ್​ಗೆ ಸಲ್ಲಿಕೆ ಮಾಡಿದೆ, ಸೆ.22ಕ್ಕೆ ಮುಂದಿನ ವಿಚಾರಣೆ ನಿಗದಿಯಾಗಿದೆ.