ಐಪಿಎಲ್​ ಪ್ರಾಯೋಜಕತ್ವ ವಹಿಸಲು ಮುಂದಾದ ಪತಂಜಲಿ ಸಂಸ್ಥೆ

•   Mon, Aug 10 2020 05:31:00 PM



• ನವದೆಹಲಿ, ಆ 10(DaijiworldNews/HR): 2020ರ ಇಂಡಿಯನ್ ಪ್ರೀಮಿಯರ್ ಲೀಗ್ (ಐಪಿಎಲ್) ಪಂದ್ಯಾವಳಿಯಲ್ಲಿ ಬಾಬಾ ರಾಮದೇವ್ ಅವರ ಪತಂಜಲಿ ಆಯುರ್ವೇದ ಸಂಸ್ಥೆ ಪ್ರಾಯೋಜಕತ್ವ ವಹಿಸಲು ಆಸಕ್ತಿ ತೋರಿಸಿದೆ.

  

  ಐಪಿಎಲ್ ಪ್ರಾಯೋಜಕತ್ವದಿಂದ ಚೀನೀ ಮೊಬೈಲ್ ಫೋನ್ ಕಂಪೆನಿ ವಿವೋ ಹಿಂದೆ ಸರಿದಾಗ ಸರಿದಾಗ ಅನೇಕರು, ಬಾಬಾ ರಾಮ್​ದೇವ್​ ಅವರ ಪತಂಜಲಿ ಸಂಸ್ಥೆ ಪ್ರಾಯೋಜಕತ್ವ ವಹಿಸಲಿ ಎಂದು ತಮಾಷೆ ಮಾಡಿದ್ದರು. ಇದೀಗ ಇದು ನಿಜವಾಗುವ ಸಾಧ್ಯತೆ ಕಾಣಿಸಿದೆ. ಐಪಿಎಲ್​ 13ನೇ ಆವೃತ್ತಿಯ ಪ್ರಾಯೋಜಕತ್ವಕ್ಕೆ ಬಿಡ್​ ಸಲ್ಲಿಸಲು ಪತಂಜಲಿ ಆಯುರ್ವೇದ ಸಂಸ್ಥೆ ಆಸಕ್ತಿ ತೋರಿದೆ.

  ನಮ್ಮ ಪತಂಜಲಿ ಬ್ರ್ಯಾಂಡ್‍ ಗೆ ಜಾಗತಿಕ ಮಾರ್ಕೆಟಿಂಗ್ ವೇದಿಕೆ ಒದಗಿಸುವ ಉದ್ದೇಶ ನಮಗಿರುವುದರಿಂದ ಈ ಬಾರಿ ಐಪಿಎಲ್ ಪ್ರಾಯೋಜಕತ್ವ ವಹಿಸುವ ಕುರಿತಂತೆ ಪರಿಶೀಲಿಸುತ್ತಿದ್ದೇವೆ ಎಂದು ಪತಂಜಲಿ ಸಂಸ್ಥೆಯ ವಕ್ತಾರ ಎಸ್ ಕೆ ತಿಜರವಾಲ ಹೇಳಿದ್ದಾರೆ.

  ಇನ್ನು ಐಪಿಎಲ್ ಪ್ರಾಯೋಜಕತ್ವಕ್ಕಾಗಿ ಖ್ಯಾತ ಕಂಪೆನಿಗಳಾದ ಅಮೆಝಾನ್, ಜಿಯೋ, ಅದಾನಿ ಕೂಡ ಆಸಕ್ತಿ ವಹಿಸಿವೆ ಎನ್ನಲಾಗಿದೆ.

  ಬಿಡ್​ ಸಲ್ಲಿಸುವ ಬಗ್ಗೆ ಪತಂಜಲಿ ಸಂಸ್ಥೆ ಇನ್ನೂ ಅಂತಿಮ ನಿರ್ಧಾರ ಕೈಗೊಂಡಿಲ್ಲ ಎಂದು ತಿಜರವಾಲಾ ಸ್ಪಷ್ಟಪಡಿಸಿದ್ದಾರೆ. ಐಪಿಎಲ್​ ಶೀರ್ಷಿಕೆ ಪ್ರಾಯೋಜಕತ್ವಕ್ಕೆ ಆಗಸ್ಟ್​ 14 ರೊಳಗೆ ಬಿಡ್​ ಸಲ್ಲಿಸಬೇಕೆಂದು ಬಿಸಿಸಿಐ ಈಗಾಗಲೆ ತಿಳಿಸಿದೆ.