ಯೋಧರ ಶವಗಳ ತಲೆ ಕತ್ತರಿಸಿ ವಿಕೃತಿ - ಲಡಾಖ್‌‌ ಪ್ರದೇಶದಲ್ಲಿ ಮತ್ತೆ ಉದ್ವಿಗ್ನ ಪರಿಸ್ಥಿತಿ

•   Thu, Jun 18 2020 05:30:40 PM



• ನವದೆಹಲಿ, ಜೂ 18 (DaijiworldNews/PY) : ಚೀನಾದ ಪೀಪಲ್ಸ್‌‌‌ ಲಿಬರೇಷನ್‌‌‌‌‌ ಆರ್ಮಿಯ ಯೋಧರು ಗಾಲ್ವಾನ್‌‌‌ ಕಣಿವೆಯಲ್ಲಿ ಭಾರತೀಯ ಯೋಧರ ಮೇಲೆ ಮುಳ್ಳಿನ ತಂತಿ ಸುತ್ತಿದ್ದ ಕಬ್ಬಿಣದ ಬಡಿಗೆಗಳಿಂದ ಹಲ್ಲೆ ಮಾಡಿದ್ದಾರೆ. ಈ ಘರ್ಷಣೆಯಲ್ಲಿ ಮೃತಪಟ್ಟ ಭಾರತೀಯ ಯೋಧರ ಶವಗಳ ತಲೆಯನ್ನು ಕತ್ತರಿಸಿ ವಿಕೃತಿ ಮೆರೆದಿದ್ದು, ಈ ಕಾರಣದಿಂದ ಮತ್ತೆ ಲಡಾಖ್‌‌ ಪ್ರದೇಶದಲ್ಲಿ ಉದ್ವಿಗ್ನ ಪರಿಸ್ಥಿತಿ ಉಂಟಾಗಿದೆ.

  

  ಸೋಮವಾರ ರಾತ್ರಿ ನಡೆದ ಈ ಘರ್ಷಣೆಯಲ್ಲಿ ಭಾರತದ 20 ಯೋಧರು ಹುತಾತ್ಮರಾಗಿದ್ದು, 76ಕ್ಕೂ ಅಧಿಕ ಯೋಧರು ಗಾಯಗೊಂಡಿದ್ದರು. ಉಭಯ ರಾಷ್ಟ್ರಗಳ ಮಿಲಿಟರಿ ಪಡೆಗಳ ಮೇಜರ್​ ಜನರಲ್​ ಮಟ್ಟದ ಅಧಿಕಾರಿಗಳ ಸಭೆ ನಡೆಯುತ್ತಿದ್ದು, ಗುರುವಾರ ನಡೆದ ಪ್ರಥಮ ಸುತ್ತಿನ ಸಭೆಯಲ್ಲಿ ಯಾವುದೇ ತೀರ್ಮಾನಕ್ಕೆ ಬರುವಲ್ಲಿ ವಿಫಲವಾಗಿದ್ದು, ಎರಡನೇ ಸುತ್ತಿನ ಮಾತುಕತೆ ಶುರುವಾಗಿದೆ. ಭಾರತೀಯ ಪಾಳೆಯದಲ್ಲಿ ಚೀನಿ ಯೋಧರು ಮಾಡಿರುವ ಕೃತ್ಯದ ಬಗ್ಗೆ ಆಕ್ರೋಶ ವ್ಯಕ್ತವಾಗಿದೆ. ಹಾಗಾಗಿ ಈ ಹಿನ್ನೆಲೆ ಯಾವುದೇ ಕ್ಷಣದಲ್ಲಿಯೂ ಇನ್ನೊಂದು ಸುತ್ತಿನ ಘರ್ಷಣೆ ಏರ್ಪಡುವ ವಾತಾವರಣ ಅಲ್ಲಿ ನಿರ್ಮಾಣವಾಗಲಿದೆ.

  ಈ ಕಾರಣದಿಂದಾಗಿ ಉಭಯ ರಾಷ್ಟ್ರಗಳ ಸೇನಾಪಡೆಗಳು ಪ್ಯಾಂಗಾಂಗ್‌‌ ತ್ಸೊ ವಲಯದಲ್ಲಿ ಮತ್ತೊಂದು ಸುತ್ತಿನ ಘರ್ಷಣೆ ಆಗದಂತೆ ನಿಯಂತ್ರಿಸಲು ಪ್ರಯತ್ನಿಸಿರುವುದಾಗಿ ಹೇಳಲಾಗುತ್ತಿದೆ. ಈ ಭಾಗದಲ್ಲಿ ಉಭಯ ರಾಷ್ಟ್ರಗಳ ಯೋಧರು ಕಳೆದ 40 ದಿನಗಳಲ್ಲಿ ಘರ್ಷಣೆ ನಡೆಸಿದ್ದು, ಪ್ಯಾಂಗಾಂಗ್​ ತ್ಸೊ ವಲಯದಲ್ಲಿ ಪರಿಸ್ಥಿಯು ತೀವ್ರಾ ಉದ್ವಿಗ್ನವಾಗಿರುವುದಾಗಿ ಹೇಳಲಾಗುತ್ತಿದೆ.