ಮಂಗಳೂರು: ಜೂ. 1 ರಿಂದ ಅವಿಭಜಿತ ಜಿಲ್ಲೆಗಳಲ್ಲಿ ಖಾಸಗಿ ಬಸ್ ಸೇವೆಗೆ ನಿರ್ಧಾರ

•   Mon, May 25 2020 11:02:03 AM



• ಮಂಗಳೂರು,ಮೇ 25(Daijiworld News/MSP): ಖಾಸಗಿ ಮತ್ತು ಸಿಟಿ ಬಸ್ ಸೇವೆ ಜೂನ್ 1 ರಿಂದ ಉಡುಪಿ ಮತ್ತು ದಕ್ಷಿಣ ಕನ್ನಡ ಜಿಲ್ಲೆಗಳಲ್ಲಿ ಪ್ರಾರಂಭಿಸಲು ನಿರ್ಧರಿಸಿದೆ. ಆರಂಭದಲ್ಲಿ, ದ.ಕ ಜಿಲ್ಲೆಯಲ್ಲಿ ಶೇಕಡಾ 50 ರಷ್ಟು ಬಸ್ಸುಗಳು ಆರಂಭದಲ್ಲಿ ರಸ್ತೆಗಿಳಿಸಲು ಬಸ್ ಮಾಲಕರ ಸಂಘ ನಿರ್ಧರಿಸಿದೆ . ಅದೇ ಸಮಯದಲ್ಲಿ, ಉಡುಪಿಯಲ್ಲಿನ ಸಿಟಿ ಬಸ್ಸುಗಳು ಮೇ 25 ರಿಂದ ಪ್ರಯಾಣಿಕರಿಗೆ ಒಂದು ವಾರ ಉಚಿತ ಸೇವೆಯನ್ನು ಒದಗಿಸಲಿದ್ದು ಜೂನ್ 1 ರ ನಂತರ ಹಂತ ಹಂತವಾಗಿ ಬಸ್ಸುಗಳನ್ನು ರಸ್ತೆಗಿಳಿಸಲು ನಿರ್ಧರಿಸಲಾಗಿದೆ ಎಂದು ಸಿಟಿ ಬಸ್ ಮಾಲಕರ ಸಂಘ ತಿಳಿಸಿದೆ.

  

  ಸಾಮಾನ್ಯ ದಿನಗಳಲ್ಲಿ 325 ಸಿಟಿ ಬಸ್‌ಗಳು ಮಂಗಳೂರಿನ ವಿವಿಧ ಪ್ರದೇಶಗಳಿಗೆ ತೆರಳುತ್ತಿದ್ದು ಇದರಲ್ಲಿ ಸುಮಾರು 150 ಬಸ್‌ಗಳನ್ನು ಜೂನ್ 1 ರಿಂದ ಕಾರ್ಯಾಚರಣೆ ಮಾಡಲು ಯೋಚಿಸಲಾಗಿದೆ. ಈ ಬಗ್ಗೆ ಬುಧವಾರ ಬಸ್ ಮಾಲೀಕರ ಸಭೆ ನಡೆಯಲಿದ್ದು, ಇಲ್ಲಿ ಅಂತಿಮ ತೀರ್ಮಾನ ಕೈಗೊಳ್ಳಲಾಗುವುದು.

  ಸಿಟಿ ಬಸ್ ಮಾಲಕರ ಸಂಘದ ಅಧ್ಯಕ್ಷ ದಿಲ್ ರಾಜ್ ಆಳ್ವ ಪ್ರತಿಕ್ರಿಯಿಸಿ, " ಜೂನ್ 1 ರಿಂದ 50 ರಷ್ಟು ಬಸ್ಸುಗಳು ನಗರದಲ್ಲಿ ಕಾರ್ಯಾಚರಿಸಲಿದೆ. ಒಂದು ರೂಟ್ ನಲ್ಲಿ ಸರಾಸರಿ ನಾಲ್ಕು ಬಸ್‌ಗಳು ಸಂಚರಿಸಲಿದೆ. ಬಸ್ ಸೇವೆಗಳ ಕಾರ್ಯಾಚರಣೆಯ ಬಗ್ಗೆ ಬಸ್ ಮಾಲೀಕರು ಜಿಲ್ಲಾಡಳಿತದ ಮಾರ್ಗಸೂಚಿಗಳಿಗಾಗಿ ಕಾಯುತ್ತಿದ್ದಾರೆ " ಎಂದು ಅವರು ಹೇಳಿದರು.

  ಉಡುಪಿಯಲ್ಲಿ, ಮೇ 25 ರ ಸೋಮವಾರದಿಂದ ಸಿಟಿ ಬಸ್‌ಗಳು ಓಡಲಾರಂಭಿಸುತ್ತವೆ ಮತ್ತು ಬಸ್‌ಗಳು 15 ನಿಮಿಷಗಳ ಅಂತರದಲ್ಲಿ ಕಾರ್ಯಾಚರಿಸಲಿದೆ. ಜೂನ್ 1 ರ ನಂತರ ಹಂತ ಹಂತವಾಗಿ ಬಸ್ಸುಗಳನ್ನು ರಸ್ತೆಗಿಳಿಸಲು ನಿರ್ಧರಿಸಲಾಗಿದೆ ಎಂದು ಸಿಟಿ ಬಸ್ ಮಾಲೀಕರ ಸಂಘದ ಅಧ್ಯಕ್ಷ ಮತ್ತು ಕೆನರಾ ಬಿಸ್ ಮಾಲೀಕರ ಸಂಘದ ಪ್ರಧಾನ ಕಾರ್ಯದರ್ಶಿ ಕೆ ಸುರೇಶ್ ನಾಯಕ್ ತಿಳಿಸಿದ್ದಾರೆ. ಉಡುಪಿ ಜಿಲ್ಲೆಯ ಜಿಲ್ಲಾಧಿಕಾರಿಗಳು ಈಗಾಗಲೇ ಬಸ್ ಮಾಲೀಕರ ಸಭೆ ನಡೆಸಿ ಸರ್ಕಾರ ನಿಗದಿಪಡಿಸಿದ ಷರತ್ತುಗಳಿಗೆ ಒಳಪಟ್ಟು ಬಸ್‌ಗಳಿಗೆ ಓಡಿಸಲು ಸೂಚಿಸಿದ್ದಾರೆ.

  ಈಗಾಗಲೇ ಮುಡಿಪು ಭಾಗಕ್ಕೆ ನರ್ಮ್ ಬಸ್‌ಗಳು ಕಾರ್ಯಾಚರಿಸುತ್ತಿದೆ ಮತ್ತು ಇತರ ಮಾರ್ಗಗಳಲ್ಲಿ ಬಸ್‌ಗಳನ್ನು ಓಡಿಸುವ ಬಗ್ಗೆ ಒಂದೆರಡು ದಿನಗಳಲ್ಲಿ ತೀರ್ಮಾನಿಸಲಾಗುವುದು ಎಂದು ಕೆಎಸ್‌ಆರ್‌ಟಿಸಿ ಮಂಗಳೂರು ವಿಭಾಗ ನಿಯಂತ್ರಕ ಅರುಣ್ ಕುಮಾರ್ ತಿಳಿಸಿದ್ದಾರೆ.

  ಖಾಸಗಿ ಬಸ್ಸುಗಳ ಕಾರ್ಯಾಚರಣೆ ಕುರಿತು ಚರ್ಚಿಸಲು ಪ್ರಾದೇಶಿಕ ಸಾರಿಗೆ ಕಚೇರಿ ಮತ್ತು ಬಸ್ ಮಾಲೀಕರ ಸಭೆ ಶೀಘ್ರದಲ್ಲೇ ನಡೆಯಲಿದೆ ಎಂದು ದಕ್ಷಿಣ ಕನ್ನಡ ಜಿಲ್ಲೆಯ ಜಿಲ್ಲಾಧಿಕಾರಿ ಸಿಂಧು ಬಿ ರೂಪೇಶ್ ಹೇಳಿದ್ದಾರೆ. ಚಾಲಕರು, ನಡವಳಿಕೆಗಳು ಮತ್ತು ಪ್ರಯಾಣಿಕರು ಅನುಸರಿಸಬೇಕಾದ ಮಾರ್ಗಸೂಚಿಗಳನ್ನು ಶೀಘ್ರದಲ್ಲೇ ನೀಡಲಾಗುವುದು ಎಂದು ಅವರು ಹೇಳಿದ್ದಾರೆ