ಕೊಡಗಿನ ಕೊರೊನಾ ಗುಣಮುಖ ವ್ಯಕ್ತಿಯಲ್ಲಿ ಮತ್ತೆ ಕಾಣಿಸಿಕೊಂಡ ಜ್ವರ - ಆಸ್ಪತ್ರೆಗೆ ದಾಖಲು

•   Wed, Apr 15 2020 04:37:41 PM



• ಕೊಡಗು, ಏ 15 (Daijiworld News/MSP): ಕೊರೊನಾ ವೈರಸ್‍ನಿಂದ ಕೊಡಗು ಜಿಲ್ಲೆ ಸದ್ಯ ಮುಕ್ತವಾಗಿದೆ ಎಂದು ನಿಟ್ಟಿಸಿರು ಬಿಡುವಷ್ಟರಲ್ಲಿ ಮತ್ತೆ ಗುಣಮುಖ ಸೋಂಕಿತ ವ್ಯಕ್ತಿಯಲ್ಲಿ ಜ್ವರ ಕಾಣಿಸಿಕೊಂಡಿದ್ದು, ಜಿಲ್ಲಾಡಳಿತಕ್ಕೆ ತಲೆನೋವಾಗಿ ಪರಿಣಮಿಸಿದೆ. ಗುಣಮುಖ ವ್ಯಕ್ತಿಯಲ್ಲಿ ಜ್ವರ ಕಾಣಿಸಿಕೊಂಡಿರುವ ಹಿನ್ನಲೆಯಲ್ಲಿ ಅವರನ್ನ ಐಸೋಲೇಷನ್​ ವಾರ್ಡ್​ಗೆ ದಾಖಲಿಸಲಾಗಿದೆ.

  

  35 ವರ್ಷದ ವ್ಯಕ್ತಿ ದುಬೈನಿಂದ ವಾಪಸ್ಸಾಗಿದ್ದರು, ಮಾರ್ಚ್ 19ರಂದು ಕೊರೊನಾ ಸೋಂಕಿರುವುದು ಪತ್ತೆಯಾಗಿತ್ತು. ಅವರನ್ನ 22 ದಿನಗಳ ಕಾಲ ಐಸೋಲೇಷನ್​ನಲ್ಲಿ ಇರಿಸಲಾಗಿತ್ತು, ನೆಗೆಟಿವ್ ವರದಿ ಬಂದ ಹಿನ್ನೆಲೆ ಏಪ್ರಿಲ್ 11 ರಂದು ಡಿಸ್ಚಾರ್ಜ್​ ಮಾಡಲಾಗಿತ್ತು.

  ಇದೀಗ ಮತ್ತೆ ಜ್ವರ ಕಾಣಿಸಿಕೊಂಡಿರುವ ಹಿನ್ನಲೆಯಲ್ಲಿ ವ್ಯಕ್ತಿಯನ್ನು ಆಸ್ಪತ್ರೆಗೆ ದಾಖಲು ಮಾಡಲಾಗಿದೆ. ವ್ಯಕ್ತಿಯ ಗಂಟಲು ದ್ರವವನ್ನ ಲ್ಯಾಬ್​ಗೆ ಕಳುಹಿಸಿದ್ದು ಇಂದು ಅಥವಾ ನಾಳೆ ವರದಿ ಬರುವ ನಿರೀಕ್ಷೆ ಇದೆ ವೈದ್ಯಕೀಯ ವರದಿ ಬಂದ ಬಳಿಕ ವಿಷಯ ಸ್ಪಷ್ಟವಾಗಲಿದೆ. ಜನತೆ ಆತಂಕ ಪಡುವುದು ಬೇಡ ಎಂದು ಕೊಡಗು ಜಿಲ್ಲಾಧಿಕಾರಿ ಅನೀಸ್ ಕಣ್ಮಣಿ ಜಾಯ್ ಸ್ಪಷ್ಟಪಡಿಸಿದ್ದಾರೆ.